Bike Parcel : ट्रेनने बाईक दुसऱ्या शहरात पाठवताय? हे नियम आणि कागदपत्रं माहित नसतील तर बसेल मोठा फटका

तुम्हाला तुमची बाईक ट्रेनने दुसऱ्या शहरात पाठवायची आहे का? मग तुम्हाला काही महत्त्वाचे नियम आणि कागदपत्रं माहित असायलाच हवीत. नाहीतर तुम्हाला मोठा दंड भरावा लागू शकतो. चला, जाणून घेऊया काय आहेत हे नियम.

ट्रेनने बाईक बुक करण्यासाठी काही महत्त्वाची कागदपत्रं

ट्रेनने बाईक बुक करण्यासाठी काही महत्त्वाची कागदपत्रं लागतात. यात बाईकची मूळ आरसी (RC), फर्स्ट पार्टी इन्शुरन्सची कॉपी, तुमचं आधार कार्ड आणि एक चालू मोबाईल नंबर यांचा समावेश आहे. गाडीला काही नुकसान झाल्यास भरपाईसाठी फर्स्ट पार्टी इन्शुरन्स अनिवार्य आहे. बाईक तुमच्या नावावर नसल्यास, मूळ मालकाचं परवानगी पत्र (Authorization Letter) दाखवावं लागतं. स्टेशनवरच्या पार्सल ऑफिसमध्ये तुम्हाला एक अर्ज भरावा लागेल.

रेल्वेचे काही कडक नियम

सुरक्षेसाठी रेल्वेचे काही कडक नियम आहेत. बाईक बुक करण्यापूर्वी तिच्या टाकीतील पेट्रोल पूर्णपणे रिकामं करावं लागतं. टाकीत थोडं जरी पेट्रोल आढळलं, तरी मोठा दंड आकारला जातो. प्रवासात गाडीला ओरखडे येऊ नयेत म्हणून साईड मिरर काढून ठेवा. स्टेशनवरच्या तज्ज्ञांकडून गवताने आणि गोणपाटाने बाईक व्यवस्थित पॅक करून घ्या. या पॅकिंगसाठी गाडीच्या आकारानुसार साधारणपणे ३०० ते ६०० रुपये लागतात. ८०० किलोमीटर अंतरासाठी बाईक पाठवण्याचा एकूण खर्च सुमारे ३००० रुपयांपर्यंत येतो.

सहा दिवसांच्या आत डिलिव्हरी घ्या

पार्सल बुकिंग झाल्यावर अधिकारी तुम्हाला एक पावती देतील. ही पावती खूप जपून ठेवा. कारण इच्छित स्थळी पोहोचल्यावर ही मूळ पावती दाखवल्यावरच तुम्हाला तुमची बाईक परत मिळेल. कधीकधी, तुमच्या ट्रेनमध्ये जागा नसल्यास, रेल्वे कर्मचारी तुमची बाईक दुसऱ्या ट्रेनने पाठवू शकतात. त्यामुळे स्टेशनवर पोहोचल्यावर पार्सल विभागात चौकशी करा. बाईक स्टेशनवर आल्यावर सहा दिवसांच्या आत डिलिव्हरी घ्या, नाहीतर रेल्वे अतिरिक्त पार्किंग किंवा डेमरेज शुल्क आकारते.