हार्ट अटॅकनंतर ९० दिवस खूप महत्त्वाचे : या टिप्स पाळा, शरीर लवकर निरोगी होईल

हिवाळ्या थंडीमुळे  हार्ट अटॅक येण्याचे प्रमाण जास्त असते.हार्ट अटॅकनंतर  पहिले ९० दिवस खूप महत्त्वाचे असतात, कारण या काळात दुसऱ्यांदा अटॅक येण्याचा धोका असतो.  

हिवाळ्यात थंडीचे प्रमाण वाढते. त्यामुळे या काळात हृदयविकाराचा झटका येण्याचे प्रमाण  वाढते. त्यामुळे  हृदयाच्या आरोग्याविषयी जागरूकता निर्माण करणे आणि हृदय सुरक्षित ठेवण्याबद्दल माहिती देणे आवश्यक असते.  आजच्या जीवनशैलीत चुकीच्या खाण्याच्या सवयी, मानसिक ताण आणि व्यायामाच्या अभावामुळे हार्ट अटॅकच्या घटनांमध्ये लक्षणीय वाढ होत आहे.

एकेकाळी ही समस्या फक्त वृद्धांपुरती मर्यादित होती, पण आता ती सर्व वयोगटातील लोकांमध्ये दिसून येत आहे. हार्ट अटॅकनंतर बरे झाल्यावर जीवनशैलीत कसे बदल करावे आणि पहिल्या ९० दिवसांत कोणती काळजी घ्यावी, याबद्दल या लेखात जाणून घ्या.

हार्ट अटॅकनंतर ९० दिवसांची काळजी कशी घ्यावी?

हार्ट अटॅक ही एक गंभीर वैद्यकीय आणीबाणी आहे, ज्यातून बरे होण्यासाठी वेळ आणि सावधगिरीची आवश्यकता असते. हॉस्पिटलमधून डिस्चार्ज मिळणे म्हणजे तुम्ही पूर्णपणे बरे झाला आहात असे नाही. पहिले ९० दिवस खूप महत्त्वाचे असतात. हा काळ हृदय आणि शरीराच्या स्नायूंना बरे होण्यासाठी अत्यंत आवश्यक असतो. या काळात दुसऱ्यांदा हार्ट अटॅक येण्याचा धोका असतो. संशोधनानुसार, योग्य काळजी घेतल्यास हा धोका २३-३० टक्क्यांनी कमी केला जाऊ शकतो. बरे होण्यासाठी या गोष्टी लक्षात ठेवा.

डॉक्टरांशी नियमित संपर्क:

बरे होण्याच्या काळात डॉक्टरांशी नियमित संपर्कात रहा. रक्तदाब, साखरेची पातळी, कोलेस्ट्रॉल आणि हृदयाचे ठोके नियमितपणे तपासा. डॉक्टरांच्या सल्ल्यानुसार रक्त पातळ करणारी औषधे, बीटा-ब्लॉकर्स आणि स्टॅटिनसारखी औषधे काटेकोरपणे घ्या.

रक्तदाब आणि साखर तपासणी:

घरीच रक्तदाब आणि साखरेच्या पातळीवर लक्ष ठेवा. यामुळे उपचारादरम्यान डॉक्टरांना मदत होईल.

हलका व्यायाम:

डॉक्टरांच्या सल्ल्यानुसार, बरे होण्याच्या काळात दररोज १०-१५ मिनिटे चालण्यापासून सुरुवात करा. कठोर शारीरिक हालचाली टाळा.

आहारातील बदल:

चरबीयुक्त पदार्थ, प्रक्रिया केलेले पदार्थ आणि जंक फूड कमी करा. फळे, भाज्या, ओट्स, मासे, सुकामेवा आणि आरोग्यदायी चरबीयुक्त पदार्थांना प्राधान्य द्या. मीठ खाणे कमी करा आणि ऑलिव्ह ऑइलसारखे आरोग्यदायी तेल वापरा.

मानसिक तणाव नियंत्रण:

मानसिक ताण हृदयाच्या आरोग्यासाठी हानिकारक आहे. ध्यान, योग किंवा दीर्घ श्वास घेण्याचे व्यायाम करा. पुरेशी झोप घ्या आणि सकारात्मक मानसिकता ठेवा.

धूम्रपान आणि मद्यपान सोडा:

धूम्रपान आणि मद्यपानामुळे हार्ट अटॅकचा धोका वाढतो. या सवयी पूर्णपणे सोडा.

डॉक्टर काय म्हणतात?

प्रसिद्ध हृदयरोग तज्ज्ञ डॉ. सुधीर सक्सेना (मॅक्स सुपर स्पेशालिटी हॉस्पिटल, मोहाली) म्हणतात, 'बरे होण्याच्या ९० दिवसांच्या काळात जीवनशैलीतील बदलांसोबतच औषधांकडेही विशेष लक्ष दिले पाहिजे. योग्य काळजी घेतल्यास दुसऱ्यांदा हार्ट अटॅकची शक्यता लक्षणीयरीत्या कमी करता येते.'

हार्ट अटॅकनंतरचे पहिले ९० दिवस बरे होण्यासाठी अत्यंत महत्त्वाचे आहेत. योग्य जीवनशैली, औषधोपचार, डॉक्टरांशी नियमित संपर्क आणि हलका व्यायाम करून तुम्ही निरोगी जीवनात परत येऊ शकता. जागतिक हृदय दिनानिमित्त, तुमच्या हृदयाचे आरोग्य जपण्यासाठी या टिप्सचे अनुसरण करा आणि दुसऱ्या हार्ट अटॅकचा धोका कमी करा. आपले हृदय सुरक्षित ठेवा, निरोगी जीवनाचा आनंद घ्या!