सिगारेट, तंबाखू-कोलावरील जीएसटी ३५%

जीएसटीमध्ये नवीन स्लॅब. ३५ टक्के कर या उत्पादनांवर. १०,००० रुपयांपेक्षा जास्त किमतीचे कपडे आता आलिशान वस्तू.  

वस्तू आणि सेवा करामध्ये एक नवीन कर स्लॅब येत आहे. ५ टक्के, १२ टक्के, १८ टक्के, २८ टक्क्यांव्यतिरिक्त नवीन ३५ टक्के कर स्लॅब लागू करण्याचा निर्णय वस्तू आणि सेवा कराशी संबंधित मंत्रीस्तरीय समितीने घेतला आहे. यामुळे सर्वात कमी कर दर पाच टक्के आणि सर्वात जास्त ३८ टक्के असेल. तंबाखू, सिगारेट, कोलासह कार्बोनेटेड पेये यांवर ३५% कर लागू केला जाईल. यामुळे सिगारेट, तंबाखू, कोलासह पेयांच्या किमती वाढतील. यांचा जीएसटी दर २८ टक्क्यांवरून ३५ टक्के करण्यात आल्याने किमती वाढतील. येत्या एकविसाव्या तारखेला अर्थमंत्री निर्मला सीतारामन यांच्या अध्यक्षतेखाली होणाऱ्या जीएसटी कौन्सिलच्या बैठकीत यावर चर्चा होईल, अशी अपेक्षा आहे. जैसलमेर येथे होणाऱ्या बैठकीत इतर अनेक विषयांवर चर्चा होईल. लेदर बॅगा, सौंदर्यप्रसाधने, घड्याळे, शूज यासारख्या अनेक आलिशान वस्तूंवरील जीएसटी दर १८ टक्क्यांवरून २८ टक्के करण्याची शिफारस मंत्र्यांच्या गटाने केली आहे.

केरळचे अर्थमंत्री के. एन. बाळगोपाल, पश्चिम बंगालच्या अर्थमंत्री चंद्रिमा भट्टाचार्य, उत्तर प्रदेशचे अर्थमंत्री सुरेश कुमार खन्ना, राजस्थानचे आरोग्य सेवा मंत्री गजेंद्र सिंग खिंसर हे मंत्रीस्तरीय समितीच्या बैठकीत सहभागी झाले होते. कपड्यांसाठीची कर रचना सुधारण्याचाही निर्णय घेण्यात आला आहे. यानुसार १५०० रुपयांपेक्षा जास्त किमतीच्या कपड्यांवर ५% वस्तू आणि सेवा कर असेल. १५०० ते १०००० रुपयांपर्यंतच्या कपड्यांवर १८% कर भरावा लागेल. १०००० रुपयांपेक्षा जास्त किमतीच्या कपड्यांवर २८ टक्के वस्तू आणि सेवा कर असेल. १०००० रुपयांपेक्षा जास्त किमतीचे कपडे आलिशान वस्तूंप्रमाणेच मानले जातील. सध्या १००० रुपयांपर्यंतच्या कपड्यांवर ५ टक्के आणि त्यापेक्षा जास्त किमतीच्या वस्तूंवर १२ टक्के जीएसटी लागू आहे.

घरातील रोजच्या वापराच्या वस्तूंवर वस्तू आणि सेवा करामधील सर्वात कमी म्हणजेच पाच टक्के कर आकारला जातो. आलिशान उत्पादनांवर सर्वात जास्त कर आहे. कार, लक्झरी स्पा इत्यादी यामध्ये येतात.