Android Performance: Google ची जादू! तुमचा Android फोन आता होणार सुपरफास्ट, बॅटरीही टिकणार जास्त

Android Performance: तुमचा अँड्रॉइड स्मार्टफोन लवकरच आणखी वेगवान होणार आहे आणि त्याची बॅटरी लाईफही वाढणार आहे. गुगल एका नव्या टेक्नॉलॉजीवर काम करतंय, ज्यामुळे हे शक्य होईल. चला, जाणून घेऊया हे नेमकं काय आहे.

हा बदल युझरला थेट दिसणार नाही

गुगल 'AutoFDO' (ऑटोमॅटिक फीडबॅक-डायरेक्टेड ऑप्टिमायझेशन) वापरून अँड्रॉइड कर्नल अपडेट करत आहे, अशी माहिती अँड्रॉइड LLVM टूलचेन टीमने दिली आहे. हा बदल युझरला थेट दिसणार नाही, पण यामुळे अँड्रॉइड फोनच्या एकूण कामगिरीत मोठी सुधारणा होईल, असं कंपनीचं म्हणणं आहे.

नेहमीच सर्वोत्तम असतील असं नाही

जेव्हा एखादा स्मार्टफोन चालू असतो, तेव्हा त्याची सिस्टीम बॅकग्राउंडमध्ये हजारो छोटे-मोठे निर्णय घेत असते. उदाहरणार्थ, एखादं फंक्शन इनलाइन करायचं की नाही, किंवा कंडिशनल स्टेटमेंटमध्ये कोणती ब्रांच वापरायची, हे कंपाइलर ठरवतो. पण हे निर्णय सहसा स्टॅटिक कोड हिंट्सवर आधारित असतात. त्यामुळे प्रत्यक्ष वापराच्या वेळी ते नेहमीच सर्वोत्तम असतील असं नाही.

जेव्हा कर्नल पुन्हा बिल्ड केलं जातं, तेव्हा

या समस्येवर AutoFDO हे एक उत्तम उत्तर आहे. हे तंत्रज्ञान, प्रोग्राम प्रत्यक्ष वापरात कसा काम करतो हे शोधून काढतं आणि त्यानुसार कंपाइलरला अधिक प्रभावी बनवण्यासाठी मदत करतं. हे CPU च्या ब्रांचिंग हिस्ट्रीची तपासणी करून ठरवतं की कोणते एक्झिक्युशन पाथ्स जास्त वापरले जातात. त्यानंतर, जेव्हा कर्नल पुन्हा बिल्ड केलं जातं, तेव्हा कंपाइलर ही माहिती वापरून अधिक चांगल्या प्रकारे ऑप्टिमायझेशन करतो.

ॲप पुन्हा उघडण्याचा वेळ कमी झाला

अँड्रॉइड कर्नलसाठी लागणारा हा डेटा थेट युझर्सच्या फोनमधून गोळा केला जात नाही. त्याऐवजी, लॅबमध्ये प्रत्यक्ष वापरासारखी परिस्थिती निर्माण करून ही माहिती तयार केली जाते. गुगलने केलेल्या सुरुवातीच्या चाचण्यांमध्ये काही स्पष्ट सुधारणा दिसून आल्या आहेत. फोनचा बूट टाइम सुमारे २.१ टक्क्यांनी वेगवान झाला आहे. तर, पूर्णपणे बंद केलेला ॲप पुन्हा उघडण्याचा वेळ ४.३ टक्क्यांपर्यंत कमी झाला आहे. याशिवाय इतरही काही सुधारणा झाल्या आहेत, ज्या युझर्सना थेट जाणवणार नाहीत.

गुगलने काय सांगितलं?

ही सिस्टीम डिफॉल्टनुसार काम करेल. म्हणजे, जिथे गाईड पॅटर्न उपलब्ध नसतील, तिथे सिस्टीम जुन्या ऑप्टिमायझेशन पद्धती वापरेल. रिपोर्ट्सनुसार, अँड्रॉइड कर्नलच्या अँड्रॉइड 16-6.12, अँड्रॉइड 15-6.6 आणि आगामी अँड्रॉइड 17-6.18 व्हर्जनमध्ये हे बदल समाविष्ट असतील. यामुळे युझर्सना अधिक वेगवान इंटरफेस, फास्ट ॲप स्विचिंग आणि चांगली बॅटरी लाईफ मिळेल, असं गुगलने सांगितलं आहे.