New UPI Rule : Google Pay, PhonePe वापरता? नवा नियम न पाळल्यास अकाउंट बंद होईल

New UPI Rule : नॅशनल पेमेंट्स कॉर्पोरेशन ऑफ इंडियाच्या (NPCI) नवीन नियमानुसार, जे UPI आयडी बऱ्याच काळापासून न वापरलेल्या किंवा बंद झालेल्या मोबाईल नंबरशी लिंक आहेत, ते बंद केले जाऊ शकतात.

UPI वापरकर्त्यांनो लक्ष द्या -

आजकाल चहाच्या टपरीपासून ते मोठ्या शॉपिंग मॉलपर्यंत, सर्वत्र पेमेंटसाठी Google Pay, PhonePe किंवा Paytm सारखे UPI ॲप्स वापरले जातात. पण, तुमच्या एका छोट्याशा चुकीमुळे तुमचं UPI अकाउंट तात्पुरतं बंद होऊ शकतं. त्यामुळे, लागू करण्यात आलेल्या एका महत्त्वाच्या नवीन नियमाबद्दल वापरकर्त्यांनी नक्कीच जाणून घेतलं पाहिजे.

UPI अकाउंट का ब्लॉक केलं जातं? -

अनेक वेळा आपला UPI आयडी निष्क्रिय केला जातो, पण आपल्याला ते कळत नाही. पेमेंट अयशस्वी झाल्यावरच अनेकांना कळतं की त्यांचं अकाउंट ब्लॉक झालं आहे. यामागे चुकीची किंवा कालबाह्य झालेली माहिती वापरणं हे मुख्य कारण आहे.

नवीन नियम काय सांगतो? -

नॅशनल पेमेंट्स कॉर्पोरेशन ऑफ इंडियाने (NPCI) आणलेल्या नवीन नियमानुसार, प्रत्येक UPI अकाउंट एका सक्रिय (Active) आणि योग्य मोबाईल नंबरशी लिंक असणं आवश्यक आहे.

जर एखादा वापरकर्ता आपला मोबाईल नंबर बऱ्याच काळापासून वापरत नसेल किंवा तो नंबर बंद (Disconnected) झाला असेल, तर त्या नंबरशी लिंक असलेला UPI आयडी 'धोकादायक' मानला जाईल.

ज्या अकाउंट्सची ओळख पडताळणी (KYC) पूर्ण झालेली नाही किंवा ज्यांवरून बऱ्याच काळापासून कोणताही व्यवहार झालेला नाही, त्यांच्यावर निर्बंध लादले जातील.

हा नियम का आणला गेला?

सायबर गुन्हे रोखण्यासाठी आणि आर्थिक फसवणूक कमी करण्यासाठी ही कठोर कारवाई करण्यात आली आहे.

सिम कार्डचे पुनर्वितरण: जेव्हा एखादा वापरकर्ता आपला मोबाईल नंबर वापरणं थांबवतो, तेव्हा तो नंबर दुसऱ्या नवीन व्यक्तीला दिला जाण्याची शक्यता असते.

चुकीचे व्यवहार: जर जुन्या वापरकर्त्याने आपलं UPI अकाउंट डिलीट केलं नसेल, तर नवीन वापरकर्ता तो नंबर वापरताना जुन्या बँक खात्याशी संपर्क साधू शकतो.

सुरक्षितता: डेटा चोरी आणि चुकीचे आर्थिक व्यवहार टाळण्यासाठीच ही पडताळणी पद्धत अनिवार्य करण्यात आली आहे.