Gardening Tip: तुरटीच्या पाण्याने पुदिन्याचं रोपटं बनेल हिरवंगार! अनुभव घेऊन बघा

Gardening Tip: उन्हाळ्यात झाडं लवकर सुकतात, त्यातही पुदिन्याचं रोपटं तर लगेच कोमेजून जातं. पण एका खास प्रकारच्या पाण्यामुळे तुमचं पुदिन्याचं रोपटं पुन्हा हिरवंगार आणि पानांनी भरगच्च होऊ शकतं. जाणून घ्या हा सोपा उपाय.

पुदिन्याचे रोप हिरवेगार वाढवण्यासाठी

उन्हाळ्यात आपण ताक किंवा लिंबू सरबतात पुदिना हमखास वापरतो. यामुळे चव तर वाढतेच, पण एक छान सुगंधही येतो. अनेकांच्या घरी पुदिन्याचं रोपटं असतं, पण ते उन्हाळ्यात लवकर सुकतं. पानं निस्तेज होतात. पण एका सोप्या उपायाने तुम्ही हे रोपटं पुन्हा पानांनी भरगच्च करू शकता. यासाठी बाजारात सहज मिळणारी तुरटी वापरा.

तुरटीचा अशा प्रकारे करा वापर

एका भांड्यात पाणी घेऊन त्यात तुरटीचा खडा टाका आणि तो विरघळू द्या. किंवा तुम्ही तुरटीची पावडर करूनही ठेवू शकता. ही पावडर पाण्यात मिसळून ते पाणी पुदिन्याच्या कुंडीत टाका. तुरटीमुळे मातीचा pH स्तर कमी होतो, म्हणजेच माती आम्लयुक्त (acidic) बनते. यामुळे पुदिन्याच्या रोपाला पोषक तत्वं शोषून घ्यायला मदत होते आणि त्याची वाढ चांगली होते.

पुदिन्याचे फायदे

घरात पुदिन्याचं रोपटं लावल्यास त्याचा आणखी एक फायदा होतो. पुदिन्याच्या वासामुळे कीटकं दूर राहतात. कधीकधी मुंग्या किंवा बुरशी रोपाच्या मुळांना लागते. अशावेळी तुरटीचं पाणी खूप उपयोगी ठरतं. तुरटीमध्ये अँटी-बॅक्टेरियल आणि अँटी-फंगल गुणधर्म असतात, जे रोपाला कीटक, बुरशी आणि मुंग्यांपासून वाचवतात.

तुरटीचे पाणी कसे बनवायचे

एक लिटर स्वच्छ पाण्यात तुरटीचा एक छोटा तुकडा टाका. तो 15 मिनिटं तसंच राहू द्या. जर तुम्ही तुरटीची पावडर वापरत असाल, तर एक लिटर पाण्यात दोन चमचे पावडर टाकून चांगलं मिसळा. आता हे पाणी थेट रोपाच्या पानांवर न टाकता, फक्त मातीत मुळांजवळ ओता. दोन-तीन दिवसांतच तुम्हाला फरक दिसेल आणि पुदिना पुन्हा हिरवागार होऊ लागेल.