PF Withdrawal Rules : EPFO 3.0 मुळे पीएफ काढणे होणार सोपे! आता UPI द्वारे थेट खात्यात पैसे; किती रक्कम काढता येणार?

PF Withdrawal Rules : EPFO 3.0 अंतर्गत सदस्यांना UPI आणि UPI-सक्षम ATM द्वारे PF रक्कम थेट बँक खात्यात ट्रान्सफर करता येणार आहे. या सुविधेमुळे PF काढण्याची प्रक्रिया जलद आणि पेपरलेस होणार आहे. सदस्यांना त्यांच्या EPF खात्यातील 50 ते 75 टक्के रक्कम काढण्याची परवानगी मिळू शकते.

PF Withdrawal Rules : कर्मचारी भविष्य निर्वाह निधी संघटना म्हणजेच EPFO आपल्या सदस्यांसाठी मोठा डिजिटल बदल घेऊन येत आहे. EPFO 3.0 अंतर्गत आता PF खात्यातील पैसे थेट UPI पेमेंट गेटवेच्या माध्यमातून बँक खात्यात ट्रान्सफर करण्याची सुविधा उपलब्ध होणार आहे. या नव्या सुविधेमुळे कागदपत्रांची गरज कमी होणार असून PF रक्कम मिळण्यासाठी लागणारा वेळही मोठ्या प्रमाणात कमी होणार आहे. मात्र अनेक सदस्यांच्या मनात एकच प्रश्न आहे की, PF खात्यातून नेमकी किती रक्कम काढता येणार आणि संपूर्ण पैसे काढण्याची परवानगी असेल का?

काय आहे EPFO 3.0?

EPFO 3.0 हा कर्मचारी भविष्य निर्वाह निधी संघटनेचा मोठा डिजिटल अपग्रेड प्रकल्प आहे. या नव्या प्रणालीमुळे सदस्यांना PF रक्कम त्वरित आणि पेपरलेस पद्धतीने काढता किंवा ट्रान्सफर करता येणार आहे. यामध्ये UPI आणि UPI-सक्षम ATM च्या मदतीने PF खात्यातील पैसे थेट बँक खात्यात जमा होतील. त्यामुळे प्रोसेसिंगमध्ये होणारा विलंब कमी होईल आणि सदस्यांना काही मिनिटांत पैसे मिळू शकतील.

PF खात्यातून किती पैसे काढता येणार?

EPFO 3.0 अंतर्गत सदस्यांना त्यांच्या EPF खात्यातील एकूण रकमेपैकी 50 ते 75 टक्के रक्कम काढण्याची परवानगी मिळू शकते. मात्र यासाठी काही नियम लागू असतील. EPFO च्या नियमानुसार खात्यात किमान 25 टक्के रक्कम कायम ठेवणे बंधनकारक असणार आहे. ही रक्कम सदस्यांच्या भविष्यातील आर्थिक सुरक्षेसाठी राखीव ठेवली जाईल.

ऑटो-सेटलमेंट मर्यादा वाढली

EPFO ने ऑटो-सेटलमेंटची मर्यादा मोठ्या प्रमाणात वाढवली आहे. यापूर्वी ही मर्यादा 1 लाख रुपये होती. आता ती वाढवून 5 लाख रुपये करण्यात आली आहे. त्यामुळे वैद्यकीय उपचार, शिक्षण, लग्न किंवा घर खरेदी आणि बांधकामासाठी सदस्यांना तीन दिवसांच्या आत PF रक्कम मिळू शकणार आहे.

EPFO 3.0 कधी सुरू होणार?

केंद्रीय कामगार मंत्री Mansukh Mandaviya यांनी नुकतीच या सुविधेची चाचणी पूर्ण झाल्याची माहिती दिली आहे. त्यांनी सांगितले की, सदस्यांना UPI पेमेंट गेटवेच्या माध्यमातून PF रक्कम थेट बँक खात्यात मिळणार आहे. मात्र ही सेवा नेमकी कोणत्या तारखेपासून सुरू होणार याबाबत अद्याप अधिकृत घोषणा करण्यात आलेली नाही.

PF पैसे कसे ट्रान्सफर होणार?

नव्या प्रणालीअंतर्गत सदस्यांना त्यांच्या EPF खात्यातील उपलब्ध रक्कम पाहता येणार आहे. त्यानंतर लिंक केलेल्या UPI पिनच्या मदतीने व्यवहार पूर्ण करता येईल. पैसे थेट सदस्यांच्या बँक खात्यात जमा होतील. त्यानंतर सदस्य हे पैसे ऑनलाइन पेमेंटसाठी वापरू शकतील किंवा डेबिट कार्डच्या मदतीने ATM मधून रोख रक्कम काढू शकतील.

सात कोटींहून अधिक सदस्यांना फायदा

सध्या EPFO चे देशभरात सात कोटींहून अधिक सदस्य आहेत. नव्या डिजिटल सुविधेमुळे लाखो कर्मचाऱ्यांना PF रक्कम जलद आणि सोप्या पद्धतीने मिळणार असल्याने मोठा दिलासा मिळण्याची शक्यता आहे.