Natural Hair Dye: केमिकलला म्हणा Bye! चहा-कॉफीने घरच्या घरी करा केस काळेभोर आणि शायनी

केमिकल वापरून केस खराब झालेत? आता काळजी सोडा. तुमच्या किचनमधल्या चहा आणि कॉफीचा वापर करून घरच्या घरी नॅचरल हेअर डाय कसा बनवायचा आणि पांढऱ्या केसांना नैसर्गिक काळा रंग कसा द्यायचा, याची सोपी पद्धत जाणून घ्या.

Hair Dye Without Chemical: आजकाल केस लवकर पांढरे होणं आणि केस गळणं ही एक खूपच कॉमन समस्या झाली आहे. पूर्वी कसं, वय झाल्यावरच केस पांढरे व्हायचे. पण आता १८-२० वर्षांच्या तरुण मुला-मुलींमध्येही ही समस्या वेगाने वाढताना दिसतेय. अशावेळी, लोक लगेच केमिकल हेअर डाय वापरतात. पण सतत केमिकल कलर लावल्यामुळे केस हळूहळू कोरडे, कमजोर आणि निर्जीव होऊन जातात. तुम्हालाही केसांना काहीही नुकसान न होऊ देता नैसर्गिकरित्या हलका ब्राऊन किंवा डार्क शेड द्यायचा असेल, तर तुमच्या किचनमधल्या दोन गोष्टी खूप उपयोगी पडू शकतात.

घरी नॅचरल हेअर डाय कसा बनवायचा?

• सगळ्यात आधी एक सोपा नैसर्गिक काढा तयार करायचा आहे.
• एका भांड्यात १ कप पाणी घ्या. त्यात २-३ चमचे ब्लॅक टी (चहा पावडर) आणि कॉफी टाका.
• हे मिश्रण मंद आचेवर १५-२० मिनिटं चांगलं उकळू द्या.
• जेव्हा पाण्याचा रंग गडद तपकिरी (डार्क ब्राऊन) होईल, तेव्हा समजा की तुमचा नॅचरल डाय तयार आहे. यानंतर, हे पाणी गाळून घ्या आणि पूर्णपणे थंड होऊ द्या.
• एक गोष्ट लक्षात ठेवा, गरम मिश्रण कधीही थेट केसांवर लावू नका. यामुळे टाळूला (स्कॅल्पला) इजा होऊ शकते.

केसांना हा नॅचरल डाय कसा लावायचा?

• सर्वात आधी, केस एखाद्या सौम्य (माईल्ड) शॅम्पूने स्वच्छ धुवा. केसांमधलं तेल आणि धूळ निघून जाईल. स्वच्छ केसांवर नैसर्गिक रंग जास्त चांगला टिकतो.
• आता तयार केलेला चहा-कॉफीचा काढा हळूहळू केसांच्या मुळांपासून ते टोकांपर्यंत लावा. तुम्ही हवं तर ब्रशचा वापर करू शकता, म्हणजे रंग सगळीकडे सारखा लागेल.
• यानंतर, हलक्या हातांनी ३-४ मिनिटं टाळूची मसाज करा. यामुळे रंग सगळीकडे व्यवस्थित पसरेल.
• आता केस शॉवर कॅप किंवा प्लास्टिकच्या पिशवीने झाका आणि ३० ते ६० मिनिटं तसेच ठेवा.
• तुम्हाला जर अधिक चांगला आणि गडद रंग हवा असेल, तर ही प्रक्रिया आठवड्यातून २ ते ३ वेळा नक्की करा.

काय फायदे होतात?

चहा आणि कॉफी फक्त पांढऱ्या केसांना हलका डार्क शेड देत नाहीत, तर केस मऊ, रेशमी आणि चमकदार (सॉफ्ट, सिल्की आणि शायनी) सुद्धा बनवतात. हा एक सुरक्षित आणि केमिकल-फ्री उपाय आहे, ज्यामुळे केसांना काहीही नुकसान होत नाही.

सतत विचारले जाणारे प्रश्न (FAQs)

प्रश्न १. केमिकलशिवाय केसांना कलर करता येतो का?

हो, चहा आणि कॉफीसारख्या नैसर्गिक गोष्टींनी केसांना हलका ब्राऊन शेड देता येतो.

प्रश्न २. नॅचरल हेअर कलरचा परिणाम दिसायला किती वेळ लागतो?

नियमित वापरल्यास साधारण २-३ आठवड्यांत फरक दिसू लागतो.

प्रश्न ३. घरगुती हेअर कलर वापरणं सुरक्षित आहे का?

हो, हा उपाय पूर्णपणे केमिकल-फ्री असल्यामुळे केसांसाठी सुरक्षित आहे आणि त्याने नुकसान होत नाही.