Tesla Roadster : उडणारी कार खरंच आली! टेस्लाच्या कारने हवेत मारली पलटी

इलॉन मस्कच्या टेस्ला कंपनीने 'स्पेसएक्स' तंत्रज्ञानाचा वापर करून आपली 'रोडस्टर' इलेक्ट्रिक कार चक्क हवेत उडवली आहे. या कारने हवेत चकरा मारून नवा इतिहास रचलाय. २०२८ मध्ये या उडणाऱ्या कारचं कमर्शियल प्रोडक्शन सुरू होण्याची शक्यता आहे.

बंगळुरू: इलॉन मस्कच्या 'टेस्ला' (Tesla) कंपनीने उडणाऱ्या कारचं (Flying Cars) माणसाचं अनेक दशकांचं स्वप्न आता सत्यात उतरवलं आहे. अमेरिकेतल्या टेक्सासमध्ये असलेल्या 'स्पेसएक्स' (SpaceX) रॉकेट टेस्टिंग सेंटरमध्ये एक खास कार्यक्रम झाला. तिथे टेस्लाची नवीन डिझाईन केलेली 'रोडस्टर' (Roadster) इलेक्ट्रिक सुपर कार थेट हवेत उडाली. एवढंच नाही, तर ती उलटी (Upside Down) झाली, तिने हवेत खतरनाक पलटी मारली आणि सुरक्षितपणे जमिनीवर लँडही झाली. नेक्स्ट जनरेशन इलेक्ट्रिक स्पोर्ट्स कारची संकल्पना मांडल्यानंतर तब्बल नऊ वर्षांनी हा थरारक स्टंट झालाय. याने ऑटोमोबाईल क्षेत्रात एक नवा इतिहास रचला आहे.

रॉकेट तंत्रज्ञानावर आधारित 'स्पेसएक्स'ची कमाल!

मस्क यांनी या खतरनाक स्टंटचा व्हिडिओ त्यांच्या 'एक्स' (X) अकाऊंटवर शेअर केलाय. "भविष्यात उडणाऱ्या कार असतील, हे अखेर खरं ठरलंय!" असं त्यांनी या पोस्टमध्ये म्हटलंय. टेस्लाच्या अधिकृत अकाऊंटवरूनही हा व्हिडिओ शेअर करण्यात आला आहे.

मस्क यांच्या रॉकेट बनवणाऱ्या 'स्पेसएक्स' कंपनीने विकसित केलेलं 'कोल्ड गॅस थ्रस्टर्स' (Cold-gas thrusters) तंत्रज्ञान या नवीन रोडस्टर कारमध्ये वापरण्यात आलंय. हे तंत्रज्ञान हाय प्रेशर गॅस (Pressurised Gas) बाहेर सोडतं, ज्यामुळे कारला हवेत उडण्यासाठी लागणारी ताकद (Thrust) मिळते. याच तंत्रज्ञानामुळे आणि कारच्या खास डिझाईनमुळे, सामान्य कारला जे शक्यच नाही, अशा हवेतल्या कोलांट्याउड्या मारणं या कारला शक्य झालंय.

सामान्य रस्त्यांवर चालवण्यासाठी अनेक आव्हाने

हा डेमो अतिशय नियंत्रित वातावरणात (Controlled conditions) करण्यात आला होता. ही नवीन 'रोडस्टर' कार सामान्य रस्त्यांवर किंवा हवेत चालवण्यासाठी कायदेशीर परवानगी मिळाली आहे का, याबाबत अजून काहीही स्पष्ट झालेलं नाही. सुरक्षेचे नियम, सरकारी परवानग्या आणि रोजच्या वापरात ही कार किती प्रॅक्टिकल असेल, असे अनेक प्रश्न अजूनही सुटलेले नाहीत.

टेस्लाने त्यांच्या या नेक्स्ट जनरेशन 'रोडस्टर' कारची घोषणा पहिल्यांदा नोव्हेंबर २०१७ मध्ये केली होती. सुरुवातीला याचं प्रोडक्शन लवकरच सुरू होईल असा अंदाज होता. पण, या प्रोजेक्टला अनेक वेळा उशीर झाल्याने ग्राहकांना वर्षानुवर्षे वाट पाहावी लागली.

२०२८ मध्ये कमर्शियल प्रोडक्शनची शक्यता

रिपोर्ट्सनुसार, या कारच्या डेमो नंतर अशी माहिती समोर आलीय की, टेस्ला २०२८ मध्ये या कारचं प्रोडक्शन सुरू करण्याचा विचार करत आहे. त्यामुळे सामान्य लोकांना किंवा ग्राहकांना ही इलेक्ट्रिक उडणारी कार विकत घेण्यासाठी अजून काही वर्षे वाट पाहावीच लागणार आहे. या भन्नाट डेमोने भविष्यातल्या गाड्या कशा असतील याची झलक दाखवली असली, तरी उडणाऱ्या कार आपल्या रोजच्या प्रवासाचा भाग कधी बनतील, हे पाहणं महत्त्वाचं ठरणार आहे. सध्या तरी टेस्लाच्या या नव्या प्रयोगाने जगभरात खळबळ उडवून दिली आहे.

Real life, baby https://t.co/3QEqn18wig

— Tesla (@Tesla) १६ ऑक्टोबर २०२६