Water Plants: झाडांना नाही मातीची गरज! घरात लावा ही 5 सुंदर झाडं

घराची शोभा वाढवण्यासाठी पाण्यात वाढणारी झाडं एक उत्तम पर्याय आहेत. मनी प्लांटपासून इंग्लिश आयव्हीपर्यंत, ही ५ झाडं तुम्ही मातीशिवाय फक्त पाण्यात वाढवू शकता. जाणून घ्या त्यांची काळजी घेण्याच्या सोप्या टिप्स.

Water Plants For Home: घरात झाडं लावली की घर कसं प्रसन्न वाटतं, नाही का? पण मग माती आणा, कुंड्या खरेदी करा, हे सगळं अनेकांना थोडं कठीण वाटतं. तुमच्याकडे दुकानात जाऊन झाडांसाठी लागणारं सामान आणायला वेळ नसेल, तर अजिबात काळजी करू नका. आज आम्ही तुम्हाला अशा काही झाडांची माहिती देणार आहोत, जी वाढवण्यासाठी जास्त मेहनत लागत नाही आणि ती कमी जागेतही सहज वाढतात.

पाण्यात मनी प्लांट कसा वाढवायचा?

मनी प्लांट जवळजवळ प्रत्येक घरात दिसतोच. हे झाड मातीसोबत पाण्यातही छान वाढतं. जर तुम्हाला वॉटर गार्डनिंग करायचं असेल, तर या झाडाची ४-५ इंच लांबीची एक फांदी घ्या. खालच्या बाजूने गाठीजवळ कापून ती काचेच्या ग्लासमध्ये किंवा बरणीत पाण्यात ठेवा. काही दिवसांतच तुम्हाला मुळं दिसायला लागतील. मनी प्लांटमध्ये 'ऑक्सिन' (auxin) नावाचं नैसर्गिक हॉर्मोन असल्यामुळे ते पाण्यात खूप वेगाने वाढतं.

लकी बांबूची काळजी कशी घ्यावी?

लकी बांबू (Lucky Bamboo) हे एक प्रसिद्ध इनडोअर प्लांट आहे. हा ड्रेसीना (Dracaena) झाडाचाच एक प्रकार असून फेंगशुईमध्ये त्याला शुभ मानलं जातं. जर तुम्हाला कमी देखभालीत सुंदर झाड वाढवायचं असेल, तर हे नक्की लावा. हे झाड वाढवण्यासाठी RO वॉटर वापरणं चांगलं असतं.

कोलियस पाण्यात कसं लावायचं?

कोलियस (Coleus) हे रंगीबेरंगी पानांचं एक सुंदर झाड आहे. तुम्हाला जर पानाफुलांची आवड असेल, तर हा एक उत्तम पर्याय आहे. याची एक छोटी फांदी कापून पाण्याच्या बरणीत ठेवा आणि अशा ठिकाणी ठेवा जिथे ५-६ तास थेट ऊन येणार नाही, पण चांगला उजेड असेल.

ट्रेडेस्कॅन्शिया कसं वाढवतात?

या झाडाला 'वॉन्डरिंग ज्यू' (Wandering Jew) किंवा 'स्पायडरवॉर्ट' (Spiderwort) असंही म्हणतात. हे दिसायला खूप सुंदर आणि पाण्यात झपाट्याने वाढणारं झाड आहे. याची फांदी काचेच्या बाटलीत ठेवा, पण पाणी इतकंच भरा की फांदीचा काही भाग त्यात बुडेल. या झाडाला थेट ऊन आवडत नाही. दर ३-४ दिवसांनी पाणी बदलायला विसरू नका.

इंग्लिश आयव्ही प्लांट

इंग्लिश आयव्ही (English Ivy) पाण्यात वाढवणं खूप सोपं आहे. हे फक्त एक झाड नाही, तर घराच्या सजावटीसाठीही (Home Décor) उत्तम काम करतं. एका निरोगी फांदीची कटिंग घ्या आणि बरणीत इतकं पाणी भरा की फांदीचे किमान दोन नोड (गाठी) पाण्यात बुडतील. आता ही बरणी थेट ऊन न येणाऱ्या ठिकाणी ठेवा. १५-२० दिवसांत मुळं फुटायला सुरुवात होईल.

वॉटर गार्डनिंग कसं करावं?

• वॉटर गार्डनिंग करणं सोपं आहे, पण काही गोष्टी लक्षात ठेवणं गरजेचं आहे, नाहीतर सगळी मेहनत वाया जाईल.
• स्वच्छ पाणी वापरा.
• नळाच्या पाण्यात क्लोरीन जास्त असेल तर ते पाणी २-४ तास उघडं ठेवा.
• आठवड्यातून ३-४ वेळा पाणी बदला.
• पाण्यातल्या झाडांना थेट ऊन आवडत नाही, त्यांना उजेडात ठेवा.
• गरज वाटल्यास लिक्विड खताचा (liquid fertilizer) वापर करा.

पाण्यात झाडं वाढवण्याचे फायदे

• ऐकायला विचित्र वाटेल, पण मातीतल्या झाडांपेक्षा यांना पाणी कमी लागतं.
• मातीत अनेक प्रकारचे किडे आणि बुरशी असतात, पण पाण्यातल्या झाडांसाठी कीटकनाशकांची गरज जवळजवळ लागत नाही.
• ही झाडं कमी जागेतही सहज लावता येतात.