Poco X8 Pro: पोकोचे दोन नवे फोन लवकरच बाजारात, 'प्रो मॅक्स' मॉडेलही येणार!

पोकोचे नवीन X8 प्रो आणि X8 प्रो मॅक्स स्मार्टफोन लवकरच ग्लोबल मार्केटमध्ये दाखल होणार आहेत. UAE च्या TDRA सर्टिफिकेशनवर हे मॉडेल दिसले असून, हे रेडमी टर्बो 5 सीरिजचे रिब्रँडेड व्हर्जन असण्याची शक्यता आहे.

पोको आपल्या नवीन स्मार्टफोन सीरिज, X8 प्रो सीरिजसोबत ग्लोबल मार्केटमध्ये धुमाकूळ घालण्यासाठी सज्ज झाला आहे. या सीरिजमधील दोन मॉडेल्सना UAE च्या TDRA सर्टिफिकेशन डेटाबेसमध्ये जागा मिळाली आहे, ज्यामुळे त्यांच्या लवकरच होणाऱ्या लाँचबद्दलच्या चर्चांना उधाण आलं आहे. कोणत्याही फोनला असं सर्टिफिकेशन मिळणं म्हणजे, कंपनी लवकरच त्याबद्दल अधिकृत घोषणा करणार असल्याचे संकेत असतात. रिपोर्ट्सनुसार, पोको X8 प्रो आणि X8 प्रो मॅक्स हे दोन्ही फोन चीनमध्ये लाँच झालेल्या रेडमी टर्बो 5 आणि रेडमी टर्बो 5 प्रो मॅक्सचे रिब्रँडेड व्हर्जन असू शकतात.

पोको X8 प्रो आणि पोको X8 प्रो मॅक्स

TDRA वेबसाइटवर मिळालेल्या माहितीनुसार, 2511FPC34G मॉडेल नंबर असलेला फोन पोको X8 प्रो नावाने, तर 2602BPC18G मॉडेल नंबर असलेला फोन पोको X8 प्रो मॅक्स नावाने लाँच केला जाईल. या लिस्टिंगमध्ये फोनच्या फीचर्सबद्दल कोणतीही माहिती दिलेली नाही, पण 'प्रो मॅक्स' हे नाव पहिल्यांदाच अधिकृतपणे समोर आलं आहे, हे विशेष.

लीक झालेल्या माहितीनुसार, पोको X8 प्रो मध्ये मॅट फिनिश असलेलं सपाट बॅक पॅनल, किंचित वक्र कडा आणि डाव्या बाजूला वरच्या कोपऱ्यात गोळीच्या आकाराचा (pill-shaped) कॅमेरा मॉड्यूल असेल. यात दोन वेगवेगळे लेन्स रिंग्स दिसतात. हा फोन काळा, पांढरा आणि फिरोजी (turquoise) रंगांमध्ये उपलब्ध होण्याची शक्यता आहे. समोरच्या बाजूला पातळ बेझल्स असलेला फ्लॅट डिस्प्ले आणि मध्यभागी होल-पंच कॅमेरा कटआऊट अपेक्षित आहे. उजव्या बाजूला पॉवर आणि व्हॉल्यूम बटणे असतील, ज्यात पॉवर बटणाला केशरी रंगाने हायलाइट केलेलं दिसेल.

फीचर्सबद्दल बोलायचं झाल्यास, पोको X8 प्रो मध्ये 6.59-इंचाचा 1.5K TCL M10 OLED डिस्प्ले, 120Hz रिफ्रेश रेट, 2000 निट्सपर्यंत ब्राईटनेस आणि 3840Hz PWM डिमिंग सपोर्ट मिळू शकतो. या फोनला मीडियाटेक डायमेन्सिटी 8500 अल्ट्रा चिपसेटची ताकद मिळेल. कॅमेऱ्यामध्ये 50MP सोनी IMX882 प्रायमरी सेन्सर, 8MP अल्ट्रा-वाइड लेन्स आणि 20MP फ्रंट कॅमेरा असू शकतो. तसेच, 6500mAh बॅटरी, 100W वायर्ड चार्जिंग आणि 27W रिव्हर्स चार्जिंग सपोर्ट मिळण्याची शक्यता आहे.

दुसरीकडे, पोको X8 प्रो मॅक्समध्ये 6.83-इंचाचा 1.5K OLED डिस्प्ले आणि मीडियाटेक डायमेन्सिटी 9500S प्रो प्रोसेसर मिळण्याची अपेक्षा आहे. यात OIS सपोर्टसह 50MP लाईट हंटर 600 प्रायमरी कॅमेरा आणि तब्बल 8500mAh क्षमतेची मोठी बॅटरी हे मुख्य आकर्षण ठरू शकतात.