Holi Tips: होळीचे पक्के रंग काढण्याच्या नादात चेहरा खराब करू नका! हे २ सोपे घरगुती उपाय ट्राय करा

होळी खेळायला खूप मजा येते, पण चेहऱ्याला आणि हाताला लागलेले पक्के रंग काढताना नाकी नऊ येतात. हे रंग त्वचेला नुकसान न पोहोचवता कसे काढायचे, यासाठी काही सोपे उपाय जाणून घेऊया.

रंगांचा सण होळी म्हणजे नुसती धम्माल आणि मजा! पण जेव्हा चेहऱ्यावर आणि हातांवर जमलेले हट्टी रंग काढायची वेळ येते, तेव्हा मात्र सगळा उत्साह निघून जातो. अनेकदा केमिकलवाले रंग त्वचेला इतके चिकटतात की ते लवकर निघत नाहीत. आपण साबणाने किंवा फेसवॉशने त्वचा इतकी घासतो की चेहरा लाल होतो आणि पुरळ येतात. पण काही सोप्या घरगुती उपायांनी तुम्ही हे रंग सहज काढू शकता, तेही त्वचेला कोणतंही नुकसान न होऊ देता. आम्ही तुम्हाला असे दोन सोपे पॅक सांगणार आहोत, ज्यांच्या मदतीने तुम्ही हातावरचे आणि चेहऱ्यावरचे रंग सहज काढू शकाल.

हातांसाठी इन्स्टंट क्लिनिंग पॅक

जर तुमच्या हातांवर होळीचा गडद रंग लागला असेल, तर हा सोपा उपाय करून पाहा.

कसा वापरायचा:

एक ताजं लिंबू घ्या आणि ते मधोमध कापा. लिंबाच्या कापलेल्या भागावर थोडंसं इनो आणि कोणताही शॅम्पू लावा. आता हे मिश्रण हातांवर ५-१० मिनिटं हलक्या हातांनी चोळा आणि मग पाण्याने धुऊन टाका.

हे कसं काम करतं?

लिंबामध्ये असलेलं सायट्रिक ॲसिड आणि शॅम्पूचे क्लिनिंग गुणधर्म त्वचेवरचा रंग हलका करायला मदत करतात. यामुळे हात स्वच्छ आणि मऊ दिसतात.

चेहऱ्यासाठी नॅचरल ग्लो फेस पॅक

चेहऱ्याची त्वचा नाजूक असते, त्यामुळे होळीचे रंग काढण्यासाठी सौम्य आणि नैसर्गिक पॅक वापरणं गरजेचं आहे.

फेस पॅक बनवण्याची पद्धत:

• २ चमचे बेसन
• १ चिमूट हळद
• १ चमचा मध
• थोडंसं कच्चं दूध

या सगळ्या गोष्टी एकत्र करून एक गुळगुळीत पेस्ट तयार करा. ही पेस्ट चेहरा आणि मानेवर लावा. ५-७ मिनिटं हलक्या हातांनी मसाज करा आणि मग पाण्याने धुऊन टाका. रंग सहज निघून जाईल.

याचा फायदा काय?

हा फेस पॅक रंग काढण्यासोबतच त्वचेला पोषणही देतो. बेसन आणि हळद त्वचा स्वच्छ करतात, तर मध आणि दूध त्वचेला मॉइश्चराइझ करण्याचं काम करतात.

या गोष्टी लक्षात ठेवा

जास्त जोरजोरात त्वचा घासू नका, नाहीतर त्वचेचं नुकसान होऊ शकतं. पॅक लावल्यानंतर चेहऱ्याला मॉइश्चरायझर नक्की लावा. होळी खेळायला जाण्यापूर्वी त्वचेवर तेल किंवा मॉइश्चरायझर लावा, म्हणजे रंग जास्त बसणार नाही.