EaseMyTrip ने भारतात लाँचसाठी केली पार्टनरशिप, बुकिंग होणार सोपे; वाचा संपूर्ण डिटेल्स
सार
भारतात Apple Pay लाँच झाले असून, EaseMyTrip ने त्यांचा लाँच पार्टनर म्हणून हातमिळवणी केली आहे. प्रवाशांना आता अधिक वेगाने आणि सुरक्षित पेमेंट करता येईल, अशी माहिती सह-संस्थापक रिकांत पिट्टी यांनी दिली.
मुंबई : EaseMyTrip आता भारतात Apple Pay चा लाँच पार्टनर बनला आहे. प्रवाशांना तिकीट बुकिंग करताना पेमेंट करणं अधिक सोपं आणि वेगवान व्हावं, यासाठी हा निर्णय घेतल्याची माहिती कंपनीचे सह-संस्थापक रिकांत पिट्टी यांनी लिंक्डइनवर दिली.
"प्रवास आता आणखी सोपा झाला आहे," असं सांगत पिट्टी यांनी या पार्टनरशिपची घोषणा केली. भारतात Apple Pay चे लाँच पार्टनर होताना आम्हाला खूप आनंद होत असल्याचंही ते म्हणाले.
Apple Pay आता भारतात लाईव्ह झालं आहे. त्यामुळे EaseMyTrip चे युजर्स आता अधिक वेगाने, सोयीस्कर आणि सुरक्षितपणे त्यांचं बुकिंग पूर्ण करू शकतील. युजर्सचा अनुभव सुधारण्यासाठी पेमेंटची प्रक्रिया सोपी करण्यावर कंपनीचा भर आहे. "EaseMyTrip मध्ये बुकिंगच्या प्रक्रियेत केलेली प्रत्येक छोटी सुधारणा आमच्यासाठी महत्त्वाची असते," असं पिट्टी यांनी स्पष्ट केलं.
Apple Pay ची भारतात अधिकृत एन्ट्री
ॲपलने (Apple) बुधवारी भारतात अधिकृतपणे Apple Pay लाँच केलं. यामुळे आयफोन (iPhone) आणि आयपॅड (iPad) वापरणाऱ्या ग्राहकांना ॲप्स आणि वेबवर खरेदी करणं सोपं होणार आहे. लवकरच ही सुविधा मॅकवरही (Mac) उपलब्ध होईल. आता ग्राहकांना वारंवार कार्डची माहिती किंवा पत्ता टाकण्याची गरज पडणार नाही. या लाँचिंगसाठी ॲपलने ॲक्सिस बँक (Axis Bank) आणि सीसीॲव्हेन्यू (CCAvenue) यांच्यासोबतही पार्टनरशिप केली आहे. यामुळे त्यांच्या ग्राहक आणि व्यापाऱ्यांनाही या पेमेंट सेवेचा फायदा मिळणार आहे.
डिजिटल अनुभवावर कंपनीचा फोकस
या नव्या सुविधेमुळे EaseMyTrip च्या युजर्सना ट्रॅव्हल बुकिंग करताना Apple Pay चा एक नवा पर्याय मिळाला आहे. प्रवाशांना आता पेमेंट करण्यासाठी एक 'जलद आणि सोपा मार्ग' मिळेल, असा विश्वास पिट्टी यांनी व्यक्त केला.
EaseMyTrip सध्या त्यांच्या मूळ ट्रॅव्हल बुकिंग व्यवसायासोबतच इतर क्षेत्रातही विस्तार करत आहे. कंपनीची इलेक्ट्रिक मोबिलिटी शाखा असलेल्या 'इझी ग्रीन मोबिलिटी'ने (EMTev) नुकतंच भोपाळमध्ये इलेक्ट्रिक बसेस सुरू केल्या आहेत. येत्या पाच वर्षांत दरवर्षी ५,००० इलेक्ट्रिक बसेस तयार करण्याचं कंपनीचं उद्दिष्ट आहे.असं असलं तरी, Apple Pay सोबतची ही पार्टनरशिप EaseMyTrip च्या डिजिटल बुकिंग व्यवसायासाठी एक मोठं पाऊल आहे. पेमेंट करताना ग्राहकांना वेग, सोय आणि सुरक्षितता देण्यावर कंपनीने लक्ष केंद्रित केलं आहे.