Diwali Online Shopping : भारतीयांनी दिवाळीत ऑनलाइन सर्वात जास्त काय खरेदी केलं माहितीये का?

Diwali Shopping: दिवाळी म्हटलं की नवीन कपडे, मिठाई, पूजेचं साहित्य आणि सोनं खरेदी करणं आलंच. पण या वर्षी दिवाळीत भारतीयांनी ऑनलाइन खरेदी केलेल्या वस्तूंमध्ये काही आश्चर्यकारक बदल पाहायला मिळाले आहेत.

भारतीयांनी ऑनलाइन सर्वात जास्त खरेदी केलेली वस्तू

दिवाळी म्हटलं की नवीन कपडे, मिठाई, फटाके, पूजेचं साहित्य, सोनं आणि चांदी खरेदी करण्याची भारतीयांची पद्धत आहे. पूर्वी हे सगळं घेण्यासाठी प्रत्यक्ष दुकानात किंवा बाजारात जावं लागायचं. पण आता क्विक कॉमर्स ॲप्समुळे काही मिनिटांतच वस्तू घरपोच मिळतात. या वर्षी दिवाळीत स्विगी इन्स्टामार्ट (Swiggy Instamart) आणि झेप्टो (Zepto) ने जाहीर केलेल्या विक्रीच्या आकडेवारीवरून भारतीयांच्या खरेदीच्या सवयींमध्ये झालेला बदल दिसून येतोय. विशेषतः गिफ्ट हॅम्पर्स, मिठाई, फुलं, पणत्या, सजावटीच्या वस्तूंसोबतच सोनं आणि चांदीच्या नाण्यांनाही ऑनलाइन चांगली मागणी मिळाली आहे.

गिफ्ट हॅम्पर्सच्या मागणीत तिप्पट वाढ

झेप्टोने दिलेल्या माहितीनुसार, गेल्या वर्षीच्या तुलनेत या वर्षी दिवाळी गिफ्ट हॅम्पर्सच्या ऑर्डर्समध्ये तिप्पट वाढ झाली आहे. तसेच सणासुदीच्या काळात ४.६८ लाख पणत्यांची ऑर्डर नोंदवली गेली आहे. फुलं आणि हारांच्या ऑर्डर्समध्येही गेल्या वर्षीपेक्षा २.५ पटीने वाढ झाली आहे. पारंपरिक सजावटीच्या वस्तूंसोबतच सौंदर्य प्रसाधनांनाही दिवाळीत मोठी मागणी होती, असं कंपनीने सांगितलं. सणाचे कपडे आणि पारंपरिक दागिन्यांची खरेदीही दुप्पट झाली आहे. यावरून दिवाळीच्या शॉपिंगमध्ये भेटवस्तू आणि सजावटीच्या वस्तूंचं महत्त्व वाढल्याचं स्पष्ट होतंय.

डाएट कोकच्याही सर्वाधिक ऑर्डर्स

मिठाईशिवाय दिवाळीचं सेलिब्रेशन पूर्ण होत नाही. स्विगी इन्स्टामार्टवर सर्वात जास्त ऑर्डर केली गेलेली मिठाई म्हणून काजू कतलीने पहिला क्रमांक पटकावला आहे. त्यानंतर मोतीचूर लाडू आणि बेसनाचे लाडू यांचा नंबर लागतो. दुसरीकडे, झेप्टोवर सर्वात जास्त वेळा ऑर्डर केलेली मिठाई लाडू असली तरी एकूण विक्रीमध्ये सोनपापडीने बाजी मारली आहे. मित्र आणि नातेवाइकांसोबत साजरी करण्यासाठी खाद्यपदार्थांची खरेदीही वाढली आहे. स्विगी इन्स्टामार्टवर पार्टीसाठीच्या ऑर्डर्समध्ये गेल्या वर्षीच्या तुलनेत १६२ टक्के वाढ झाली आहे. स्नॅक्सच्या ऑर्डर्स ४२ टक्क्यांनी वाढल्या आहेत. दिवाळीच्या आदल्या दिवशी किराणा व्यतिरिक्त सर्वाधिक ऑर्डर केलेली वस्तू म्हणजे डाएट कोक होती.

सोनं, चांदी खरेदीतील रंजक माहिती

धनत्रयोदशीला सोनं आणि चांदी खरेदी करण्याची भारतीयांची पारंपरिक पद्धत आहे. यंदाही लोकांनी क्विक कॉमर्स ॲप्सद्वारे मौल्यवान धातूंची खरेदी केली आहे. स्विगी इन्स्टामार्टवर ६ नोव्हेंबरला रात्री १२ वाजून ३० सेकंदांनी हैदराबादमधून फुलांची नक्षी असलेल्या २४ कॅरेट सोन्याच्या नाण्याची पहिली ऑर्डर नोंदवली गेली. त्यानंतर चार सेकंदांनी बंगळुरूमधून चांदीच्या नाण्याची पहिली ऑर्डर आली. खरेदी केलेल्या सोन्याच्या नाण्यांपैकी दोन तृतीयांश नाण्यांवर फुलांची डिझाईन होती. चांदीच्या नाण्यांपैकी ७३ टक्के नाण्यांवर लक्ष्मी आणि गणपतीची प्रतिमा होती. संध्याकाळी ६.३८ च्या सुमारास सोने आणि चांदीच्या नाण्यांसाठी सर्वाधिक ऑर्डर्स आल्या आहेत.

चेन्नईचा ग्राहकही यादीत

या दिवाळीत सर्वात जास्त रकमेची सिंगल ऑर्डर मुंबईत नोंदवली गेली आहे. तिथे एका व्यक्तीने लक्ष्मी, गणपती आणि कमळाची नक्षी असलेली सोन्याची नाणी आणि इतर वस्तू मिळून तब्बल १.११ लाख रुपयांची खरेदी केली. हैदराबादमध्ये एका व्यक्तीने २ ग्रॅमचं सोन्याचं नाणं आणि १०० ग्रॅमची चांदीची वीट असलेली ५२,२१५ रुपयांची ऑर्डर दिली. बंगळुरूमध्ये २ ग्रॅमचं लक्ष्मी डिझाईन असलेलं सोन्याचं नाणं आणि ऑलिव्ह ऑइलसह इतर वस्तूंवर ३२,२९८ रुपये खर्च केले गेले. चेन्नईतही एका व्यक्तीने एक ग्रॅमचं लक्ष्मी डिझाईन असलेलं सोन्याचं नाणं आणि ५० ग्रॅमची चांदीची वीट २६,७७० रुपयांना खरेदी केली. ८ नोव्हेंबरला सकाळी ११ ते १२ दरम्यान सर्वाधिक ऑर्डर्स आल्या. विशेषतः सकाळी ११.१८ वाजता एकाच मिनिटात सर्वाधिक ऑर्डर्स आल्या होत्या. मदुराईसह इतर शहरांमध्येही सणासुदीची खरेदी जोरात झाल्याचं सांगण्यात आलं आहे.