ChatGPT Virtual Try-On : आता कपडे विकत घेण्यापूर्वी स्वतःवर ट्राय करून पाहता येणार!

OpenAI ने ChatGPT मध्ये एक भन्नाट 'व्हर्च्युअल ट्राय-ऑन' फीचर आणलं आहे. आता तुम्ही तुमचा सेल्फी अपलोड करून एखादा ड्रेस तुमच्यावर कसा दिसेल, हे खरेदी करण्यापूर्वीच पाहू शकता. यात 'फेव्हरेट्स'चा पर्यायही असून, हे फीचर ChatGPT Images 2.5 मॉडेलवर चालतं, ज्यामुळे रिझल्ट्स एकदम रिअल वाटतात.

मुंबई : Open AI ने ChatGPT वर एक नवं फीचर आणलंय, ज्यामुळे तुमची ऑनलाइन शॉपिंग आणखी सोपी होणार आहे. या AI चॅटबॉटच्या मदतीने आता तुम्ही ऑनलाइन कपडे खरेदी करण्यापूर्वी ते व्हर्च्युअली ट्राय करून पाहू शकता. एखादा नवीन शर्ट किंवा जॅकेट तुमच्यावर कसं दिसेल, याचा अचूक अंदाज तुम्हाला यातून येईल. या 'व्हर्च्युअल ट्राय-ऑन' फीचरसोबतच 'फेव्हरेट्स' (Favourites) नावाचा एक ऑप्शनही दिलाय, जिथे तुम्ही तुमचे आवडते कपडे सेव्ह करून ठेवू शकता.

हे नवीन फीचर कसं वापरायचं?

हे टूल वापरण्यासाठी तुम्हाला तुमचा एक सेल्फी किंवा पूर्ण उंचीचा फोटो ChatGPT वर अपलोड करावा लागेल. या फोटोच्या आधारे, एखादा ड्रेस किंवा ॲक्सेसरी तुमच्यावर प्रत्यक्षात कशी दिसेल, हे AI तुम्हाला दाखवेल. यासाठी ChatGPT च्या शॉपिंग रिझल्ट्समध्ये एक नवीन "Try On" बटण देण्यात आलंय. तुम्ही एखाद्या कपड्याचा फोटो शेअर करून, तो ट्राय करतानाचा तुमचा फोटो तयार करायलाही ChatGPT ला सांगू शकता.

कंपनीच्या माहितीनुसार, हे फीचर त्यांच्या 'ChatGPT Images 2.5' मॉडेलवर चालतं. या मॉडेलमध्ये कपड्यांचं टेक्सचर आणि नॅचरल लाइटिंग खूप चांगल्या प्रकारे दिसतं. शिवाय, हे मॉडेल युजरच्या सूचना अचूक पाळतं आणि फोटो तयार करायला वेळही कमी घेतं. OpenAI चं म्हणणं आहे की, या सुधारणांमुळे ट्राय-ऑन केलेले फोटो अगदी खऱ्याखुऱ्या फोटोंसारखे दिसतील.

यातील दुसरं फीचर म्हणजे 'फेव्हरेट्स' (Favourites). यात तुम्ही तुम्हाला आवडलेले कपडे ॲपमधील 'लायब्ररी'मध्ये (Library) सेव्ह करून ठेवू शकता. नंतर कधीही ॲप उघडून तुम्ही हे सेव्ह केलेले कपडे पाहू शकता. कंपनीने सांगितलंय की, सेव्ह केलेले हे प्रॉडक्ट्स ट्राय-ऑन फोटोंसोबतच दिसतील, ज्यामुळे दोन्ही टूल्स एकाच ठिकाणी वापरणं सोपं होईल.

याशिवाय, शॉपिंगशी संबंधित इतर अनेक कामांसाठीही ChatGPT चा वापर करता येईल, असा दावा OpenAI ने केलाय. तुम्हाला एखादा विशिष्ट लूक ट्राय करायचा असेल, तर तुम्ही या AI चॅटबॉटला तसं सांगू शकता. तो लूक पूर्ण करण्यासाठी लागणारे कपडे आणि ॲक्सेसरीज शोधून काढण्याचं काम चॅटबॉट करेल. एवढंच नाही, तर एखाद्या सेलिब्रिटीच्या कपड्यांचा फोटो अपलोड करून, तसे कपडे कुठे विकत मिळतील, हे शोधायलाही तुम्ही ChatGPT ला सांगू शकता.

OpenAI च्या या ट्राय-ऑन टूलसारखंच एक फीचर गुगलने (Google) २०२५ मध्ये त्यांच्या 'सर्च' (Search) मध्ये आणलं होतं. या फीचरमध्येही युजर्स स्वतःचे फोटो अपलोड करून वेगवेगळ्या कपड्यांमध्ये ते कसे दिसतात, हे पाहू शकत होते.

मात्र, फोटो अपलोड करताना युजर्सनी काळजी घ्यावी, असा सल्ला OpenAI ने दिलाय. तुम्ही जर सेटिंग्जमध्ये जाऊन 'ऑप्ट आउट' (opt out) केलं नाही, तर तुमच्या पर्सनल अकाऊंटवरून अपलोड केलेले फोटो AI ला ट्रेनिंग देण्यासाठी वापरले जाऊ शकतात. सध्या ही दोन्ही नवीन फीचर्स जगभरातील सर्व ChatGPT मेंबर्ससाठी उपलब्ध करून दिली जात आहेत.