सावधान! आता एकाच घरात LPG आणि PNG दोन्ही चालणार नाही; केंद्र सरकारचा मोठा निर्णय, जाणून घ्या नवे नियम

new lpg and png connection rules: केंद्र सरकारने गॅस वापराबाबत नवीन नियम जारी केला असून, ज्या घरांमध्ये पाईपलाईन गॅस (PNG) कनेक्शन आहे, त्यांना आता LPG सिलेंडर वापरता येणार नाही. सबसिडीचा गैरवापर रोखणे, वाढती मागणी पूर्ण करण्यासाठी हा निर्णय घेतलाय.

सावधान! आता एकाच घरात LPG आणि PNG दोन्ही चालणार नाही

मुंबई: केंद्र सरकारने गॅस वापराबाबतच्या नियमावलीत मोठी फेरबदल केली असून, आता घरगुती गॅस वापरकर्त्यांसाठी नवीन 'डेडलाईन' समोर आली आहे. ज्या कुटुंबांकडे पाईपलाईनद्वारे गॅस (PNG) येतो, त्यांना आता घरगुती एलपीजी सिलेंडर वापरता येणार नाही. पेट्रोलियम आणि नैसर्गिक गॅस मंत्रालयाने (MoPNG) याबाबतचे आदेश जारी केले आहेत. 

नेमका नवा नियम काय आहे?

मंत्रालयाच्या सुधारित मार्गदर्शक तत्त्वांनुसार, एकाच छताखाली पीएनजी आणि एलपीजी या दोन्ही सुविधा ठेवण्यावर आता पूर्णपणे बंदी घालण्यात आली आहे.

सिलेंडर सरेंडर करणे बंधनकारक: ज्यांच्याकडे पीएनजी कनेक्शन आहे, त्यांनी आपले एलपीजी सिलेंडर तात्काळ गॅस एजन्सीकडे जमा करणे आवश्यक आहे.

रिफिलिंगवर बंदी: अशा ग्राहकांना आता नवीन सिलेंडर बुक करता येणार नाही.

नवीन कनेक्शन नाही: पीएनजी वापरकर्त्यांना भविष्यात नवीन एलपीजी जोडणी घेता येणार नाही. 

सरकारने हा कठोर निर्णय का घेतला?

१. सबसिडीचा गैरवापर रोखणे: शहरात पीएनजीची सोय असूनही अनेक लोक सबसिडीचे सिलेंडर अडवून ठेवतात. हा गैरप्रकार थांबवून गरजूंपर्यंत गॅस पोहोचवण्याचा सरकारचा मानस आहे.

२. वाढती मागणी आणि इंधन टंचाई: पश्चिम आशियातील तणावामुळे आंतरराष्ट्रीय पुरवठ्यावर परिणाम झाला आहे. देशात सिलेंडरची मागणी ७५ लाखांवरून थेट ८८ लाखांवर पोहोचली आहे, हा ताण कमी करण्यासाठी हे पाऊल उचलले आहे.

३. साठेबाजीला लगाम: प्रशासनाने आता 'सर्च ऑपरेशन' सुरू केले असून, घरगुती सिलेंडरचा व्यावसायिक वापर करणाऱ्यांवर छापे टाकले जात आहेत. 

ग्राहकांसाठी महत्त्वाची सूचना

जर तुमच्याकडे दोन्ही कनेक्शन असतील, तर कारवाईची वाट न पाहता स्वेच्छेने एलपीजी कनेक्शन जवळच्या वितरकाकडे जमा करा. नियमांचे उल्लंघन केल्यास गॅस पुरवठा खंडित होऊ शकतो किंवा दंडात्मक कारवाई होऊ शकते.