
मुंबई : आजकाल आपल्या रोजच्या जीवनात पॉवर बँक खूप महत्त्वाची झाली आहे. पण ती चुकीच्या पद्धतीने वापरली तर फोनची बॅटरी खराब होण्यापासून ते स्फोट होण्यापर्यंत अनेक मोठे अपघात होऊ शकतात. जाणून घ्या कोणत्या ५ चुका टाळणे आवश्यक आहे.
स्मार्टफोनशिवाय आजकाल आपण एक क्षणही राहू शकत नाही. आणि फोनची बॅटरी संपली की आपला एकच आधार असतो, तो म्हणजे पॉवर बँक. ऑफिस, कॉलेज किंवा प्रवास असो - पॉवर बँक आता आपली नेहमीची सोबत असते. पण तुम्हाला माहिती आहे का, तुमच्या एका छोट्याशा चुकीमुळे तुमचा महागडा फोन आणि पॉवर बँक दोन्ही खराब होऊ शकतात, आणि एखादा मोठा अपघातही होऊ शकतो. त्यामुळे पॉवर बँक वापरताना खालील चुका टाळा.
अनेकजण रात्री पॉवर बँक चार्जिंगला लावून झोपतात. ही खूप मोठी चूक आहे. जास्त चार्जिंगमुळे बॅटरी गरम होऊन फुगू शकते, तिचे आयुष्य कमी होते आणि स्फोटाचा धोका वाढतो. त्यामुळे १००% चार्ज झाल्यावर लगेच प्लग काढून टाका. आता जरी बऱ्याच चांगल्या ब्रँड्समध्ये ऑटो कट-ऑफ सिस्टम असली, तरी काळजी घेणे नेहमीच चांगले असते.
पॉवर बँकेने फोन चार्ज होत असताना त्यावर गेम खेळणे, व्हिडिओ पाहणे किंवा बोलणे टाळा. यामुळे फोन आणि पॉवर बँक दोन्ही एकत्र गरम होतात. बॅटरीवर दुप्पट ताण पडतो, बॅटरी लवकर खराब होते आणि हिटिंगचा प्रॉब्लेम वाढतो.
पॉवर बँक चार्ज करण्यासाठी कंपनीने दिलेली किंवा चांगल्या प्रतीची केबल आणि अडॅप्टर वापरा. स्वस्त, लोकल केबलमध्ये व्होल्टेज कमी-जास्त होते. त्यामुळे चार्जिंग हळू होते, पॉवर बँकेचे सर्किट खराब होते आणि फोनच्या बॅटरीवरही वाईट परिणाम होतो.
पॉवर बँक कधीही उन्हात, गाडीच्या डॅशबोर्डवर, खिशात किंवा उशीखाली ठेवू नका. लिथियम-आयन बॅटरी उष्णतेला खूप संवेदनशील असते. जास्त उष्णतेमुळे बॅटरी फुगण्याचा, लीक होण्याचा किंवा स्फोट होण्याचा धोका असतो. त्यामुळे ती नेहमी थंड आणि कोरड्या जागी ठेवा.
अनेकजण पॉवर बँक पूर्ण संपेपर्यंत वापरतात आणि फोनलाही १००% पर्यंत चार्ज करतात. ही सवय बॅटरीसाठी नुकसानकारक आहे. पॉवर बँकेची चार्जिंग २०% च्या खाली जाण्याआधीच ती चार्ज करायचा प्रयत्न करा आणि फोन ८०-९०% चार्ज झाला की काढून घ्या. यामुळे बॅटरीचे आरोग्य चांगले राहते.
बोनस टिप्स: - महिन्यातून किमान एकदा पॉवर बँक पूर्ण चार्ज आणि डिस्चार्ज करा. - पॉवर बँक खाली पडली किंवा फुगली असेल तर ती पुन्हा वापरू नका. - नेहमी ISI किंवा BIS सर्टिफाइड ब्रँडचीच पॉवर बँक खरेदी करा.