हे दैनंदिन वापरातील 5 पदार्थ पुन्हा गरम करू नका, आरोग्याला आहेत हानीकारक

अन्न वाया घालवू नये म्हणून दुपारी शिजवलेले जेवण रात्री गरम करून खाल्ले जाते. हे अजिबात चांगले नाही, विशेषतः काही पदार्थ वारंवार गरम करून खाल्ल्याने आजार होतात असे डॉक्टर सांगतात. वारंवार गरम करू नये असे ५ पदार्थ कोणते ते जाणून घेऊया.   

चहा, कॉफी वारंवार गरम करू नये

नातेवाईक किंवा मित्रमंडळी घरी आली की त्यांना चहा, कॉफी देण्याची पद्धत असते. कधीकधी सकाळी केलेला चहा शिल्लक राहतो. तो गरम करून दिला जातो. चहाच्या दुकानातही जुना चहा वारंवार गरम करून दिला जातो. तो चविष्ट वाटत असला तरी वारंवार गरम केलेल्या चहा, कॉफीमधील पोषक घटक नष्ट होतात. चहाच्या पानातील, कॉफीच्या बीन्समधील चवही बदलते. त्यात हानिकारक जिवाणू तयार होऊन शरीरात जातात आणि आरोग्य समस्या निर्माण करतात. 

बटाट्यांमुळे मळमळ, उलट्या

बटाटेही वारंवार गरम करून खाणे चांगले नाही. सकाळी शिल्लक राहिलेली भाजी संध्याकाळी गरम करून खाल्ली जाते. यात बटाट्याची भाजी असेल तर ती अजिबात गरम करू नये. यामुळे बटाट्यातील नायट्रेट्स शरीरासाठी हानिकारक ठरतात. वारंवार गरम केलेले बटाटे खाल्ल्याने मळमळ, उलट्या होऊ शकतात. 

अंडी आणि पोट फुगणे, आम्लपित्त

सर्वाधिक वापरल्या जाणाऱ्या मांसाहारी पदार्थांमध्ये अंडी अग्रेसर असतात. ऑम्लेटसाठी ताजी अंडी वापरली जातात, पण बिर्याणी, करीसाठी उकडलेली अंडी वापरतात. उकडलेली अंडी वारंवार गरम करून खाल्ल्याने पोट फुगणे, आम्लपित्त होऊ शकते. 

पालक धोकादायक

पालकात भरपूर पोषक घटक असतात. म्हणूनच पालक भाज्यांमध्ये वापरला जातो. पालक डाळ, पालक पनीर असे अनेक पदार्थ बनवले जातात. पण वारंवार गरम केल्याने त्यातील नायट्रेट्स विषारी बनतात. नायट्रेट्स पोटातील अमिनो आम्लांशी संयोग पावून कर्करोगाचा धोका निर्माण करतात. 

मशरूम आणि हृदयरोग

मशरूममध्ये अनेक पोषक घटक असतात, पण ते योग्य पद्धतीने वापरले नाहीत तर धोकादायक ठरू शकतात. मशरूम रेस्टॉरंट्स आणि ढाब्यांमध्ये जास्त वापरले जातात. वारंवार गरम केल्याने त्यांचा रंग आणि चव बदलते. पोटात जिवाणू वाढतात. अन्न पचत नाही आणि हृदयरोगाचा धोका निर्माण होतो.