Bhuvneshwar Kumar Comeback : 'भुवी'च्या कमबॅकवर सुरेश रैना खूश, म्हणाला...

जवळपास ४ वर्षांनंतर भारतीय टी-२० संघात पुनरागमन करणाऱ्या भुवनेश्वर कुमारचं सुरेश रैनाने कौतुक केलं आहे. रैनाने भुवीच्या जिद्दीला सलाम करत हे कमबॅक 'हक्काचं' असल्याचं म्हटलं आहे.

मुंबई : भारताचा माजी फलंदाज सुरेश रैनाने वेगवान गोलंदाज भुवनेश्वर कुमारच्या भारतीय टी-२० संघात ४ वर्षांनंतर झालेल्या पुनरागमनाचं जोरदार स्वागत केलं आहे. रैनाने भुवीची शिस्त, मेहनत आणि जिद्दीचं भरभरून कौतुक केलं. हे कमबॅक त्याच्या हक्काचं होतं, असं रैना म्हणाला. उत्तर प्रदेशपासून आयपीएल आणि आता पुन्हा राष्ट्रीय संघापर्यंतचा भुवीचा प्रवास खूप प्रेरणादायी आहे. सातत्याने मेहनत केल्यावर फळ नक्की मिळतं, हेच यातून दिसतं, असंही रैनाने सांगितलं.

२०२२ मध्ये अ‍ॅडलेडमध्ये इंग्लंडविरुद्ध झालेल्या टी-२० वर्ल्ड कप सेमीफायनलनंतर भुवीची भारतीय संघातील जागा हुकली होती. आता जवळपास ४ वर्षांनंतर, आयपीएलमधील सातत्यपूर्ण कामगिरीच्या जोरावर ३६ वर्षीय भुवीने पुन्हा एकदा राष्ट्रीय संघात धडक मारली आहे.

'मेहनतीला नेहमीच फळ मिळतं'

"वेलकम बॅक, भुवी! भारताच्या सर्वात उत्कृष्ट आणि कौशल्यपूर्ण गोलंदाजांपैकी एकाला पुन्हा एकदा त्याची ओळख मिळताना पाहून खूप आनंद झाला. गेल्या काही वर्षांत त्याने दाखवलेली शिस्त, मेहनत आणि जिद्द खरोखरच प्रेरणादायी आहे. उत्तर प्रदेशपासून आयपीएल आणि आता पुन्हा भारतीय टी-२० संघात, हे कमबॅक त्याच्या हक्काचं आहे. अशीच प्रेरणा देत राहा, @BhuviOfficial. तुझा प्रवास हेच सांगतो की मेहनतीला नेहमीच फळ मिळतं," अशी पोस्ट रैनाने 'X' वर लिहिली आहे.

वेलकम बॅक, भुवी! 🇮🇳💙 भारताच्या सर्वात उत्कृष्ट आणि कौशल्यपूर्ण गोलंदाजांपैकी एकाला पुन्हा एकदा त्याची ओळख मिळताना पाहून खूप आनंद झाला. गेल्या काही वर्षांत त्याने दाखवलेली शिस्त, मेहनत आणि जिद्द खरोखरच प्रेरणादायी आहे. उत्तर प्रदेशपासून आयपीएल आणि आता पुन्हा भारतीय टी-२० संघात — हे कमबॅक त्याच्या हक्काचं आहे. 👏 अशीच प्रेरणा देत राहा, @BhuviOfficial तुझा प्रवास हेच सांगतो की मेहनतीला नेहमीच फळ मिळतं. 🙌🏽🇮🇳 — सुरेश रैना🇮🇳 (@ImRaina) ७ ऑक्टोबर २०२६

आगामी दौरा आणि भारतीय संघ

३६ वर्षीय भुवीने २०२२ मध्ये शेवटचा भारतासाठी सामना खेळला होता. त्याने आतापर्यंत सर्व फॉरमॅटमध्ये मिळून २२९ सामने खेळले आहेत. यात त्याने २९.५० च्या सरासरीने २९४ विकेट्स घेतल्या आहेत, ज्यामध्ये सात वेळा पाच विकेट्स घेण्याचा पराक्रमही सामील आहे.

या दौऱ्याची सुरुवात २२ ऑक्टोबरपासून ५ टी-२० सामन्यांनी होणार आहे. त्यानंतर ५ वनडे आणि २ कसोटी सामने खेळवले जातील.

भारताचा टी-२० संघ: श्रेयस अय्यर (कर्णधार), अभिषेक शर्मा, संजू सॅमसन (विकेटकीपर), वैभव सूर्यवंशी, इशान किशन (विकेटकीपर), तिलक वर्मा (उपकर्णधार), अक्षर पटेल, शिवम दुबे, नितीश कुमार रेड्डी, नमन धीर, प्रिन्स यादव, मयंक यादव, अर्शदीप सिंग, भुवनेश्वर कुमार, वरुण चक्रवर्ती, कुलदीप यादव.