Virat Kohli : प्रेमानंद महाराजांच्या आश्रमात जाण्यासाठी 5 कोटी घेतले? विराट कोहलीने सांगितलं सत्य, अधिकृत माहिती समोर

भारताचा माजी कर्णधार विराट कोहलीने प्रेमानंद महाराजांच्या आश्रमात जाण्यासाठी ५ कोटी रुपये घेतल्याची अफवा फेटाळून लावली आहे. दिनेश फलहारी यांनी केलेले हे आरोप खोटे आणि निराधार असल्याचं विराट कोहलीच्या टीमने स्पष्ट केलं आहे.

मुंबई : भारताचा माजी कर्णधार आणि स्टार फलंदाज विराट कोहली याने नुकतीच एक मोठी अफवा फेटाळून लावली आहे. प्रेमानंद महाराजांच्या आश्रमात जाण्यासाठी विराटने ५ कोटी रुपये घेतल्याचा दावा केला जात होता, जो त्याने पूर्णपणे चुकीचा ठरवला आहे.

सध्या विराट त्याच्या खेळापेक्षा एका वेगळ्याच वादामुळे चर्चेत आला आहे. श्री कृष्ण जन्मभूमी संघर्ष न्यासचे अध्यक्ष दिनेश फलहारी यांनी असा दावा केला होता की, वृंदावनमधील प्रेमानंद महाराजांच्या आश्रमाचं प्रमोशन करण्यासाठी विराटला पैसे देण्यात आले होते.

जानेवारी २०२३ पासून विराट कोहली आणि त्याची पत्नी, अभिनेत्री अनुष्का शर्मा हे दोघेही वृंदावनला जात आहेत. तिथे ते जगभरातील लाखो भाविकांचे श्रद्धास्थान असलेल्या प्रेमानंद महाराजांची भेट घेऊन त्यांचे आशीर्वाद घेतात.

विराटच्या टीमने फेटाळले पैशांचे आरोप

दिनेश फलहारी यांच्या या आरोपांनंतर सोशल मीडियावर (विशेषतः X वर) एकच खळबळ उडाली. अनेकांनी या दाव्याच्या सत्यतेवर प्रश्नचिन्ह निर्माण केले. यानंतर विराटच्या टीमने तातडीने यावर स्पष्टीकरण दिलं.

विराट कोहलीच्या प्रवक्त्याने एक निवेदन जारी करत हे सर्व दावे 'खोटे, निराधार आणि वस्तुस्थितीला धरून नसलेले' असल्याचं म्हटलं आहे. विराटने केवळ आपली वैयक्तिक श्रद्धा आणि प्रेमानंद महाराजांवरील भक्तीपोटी वृंदावनला भेट दिल्याचे त्यांनी स्पष्ट केले. तसेच, अशा अफवा पसरवण्यापूर्वी मीडियाने बातम्यांची सत्यता पडताळून पाहावी, अशी विनंतीही त्यांनी केली.

“आम्ही हे स्पष्ट करू इच्छितो की, फलहारी महाराज दिनेश शर्मा यांनी विराट कोहलीबद्दल केलेले दावे पूर्णपणे खोटे, निराधार आणि चुकीचे आहेत,” असं प्रवक्त्याने सांगितलं.

“विराट कोहली हे केवळ त्यांच्या मनातील गाढ श्रद्धा आणि प्रेमानंद महाराज जी यांच्यावरील आदरापोटी त्यांच्या दर्शनाला जातात.

“आम्ही या आरोपांचं ठामपणे खंडन करतो. मीडियाने कोणतीही बातमी देण्यापूर्वी किंवा असे दावे पसरवण्यापूर्वी योग्य ती काळजी घ्यावी आणि जबाबदारीने रिपोर्टिंग करावं, अशी आमची विनंती आहे,” असंही प्रवक्त्याने पुढे म्हटलं.

जानेवारी २०२३ पासून विराट आणि अनुष्का शर्मा यांनी अनेकदा प्रेमानंद महाराजांच्या आश्रमाला भेट दिली आहे. हे जोडपं वृंदावनमध्ये जाऊन महाराजांचे आशीर्वाद घेताना अनेकदा दिसलं आहे.