Rishabh Pant : दिल्ली कॅपिटल्समध्ये ऋषभ पंतची भूमिका काय? प्रशिक्षक सौरव गांगुलीने केला खुलासा

आम्हाला मधल्या फळीत एका तगड्या फलंदाजाची गरज होती आणि त्यासाठी ऋषभ पंत एकदम परफेक्ट आहे. याआधीही दिल्लीत असताना त्याने टीमसाठी जबरदस्त कामगिरी केली आहे, असं सौरव गांगुलीने स्पष्ट केलं.

नवी दिल्ली : लखनौ सुपर जायंट्सकडून ट्रेड होऊन दिल्ली कॅपिटल्समध्ये परतलेला विकेटकीपर-बॅटर ऋषभ पंत टीमच्या मधल्या फळीसाठी एकदम परफेक्ट आहे, असं दिल्लीचे नवे मुख्य प्रशिक्षक सौरव गांगुली यांनी स्पष्ट केलं. आगामी आयपीएल हंगामात पंतकडून सर्वोत्तम कामगिरी करून घेता येईल, असा विश्वास भारताचे माजी कर्णधार असलेल्या गांगुलीने व्यक्त केला. दिल्लीच्या अरुण जेटली स्टेडियमवर बॅटिंग करायला पंतला नेहमीच आवडतं आणि पुढच्या हंगामात तो दिल्लीच्या जर्सीत नक्कीच कमाल करेल, असंही गांगुलीने सांगितलं.

"आम्हाला मधल्या फळीत एका तगड्या फलंदाजाची गरज होती. त्यासाठी ऋषभ पंत हाच सर्वात योग्य खेळाडू आहे. याआधी दिल्लीत असताना त्याने टीमसाठी जबरदस्त खेळ केला आहे. आगामी हंगामातील सामने आणि अनुभवातून पंत आणखी चांगला खेळाडू बनेल," असं गांगुली म्हणाला. बंगाल क्रिकेट असोसिएशनचा (CAB) अध्यक्ष असताना दिल्ली कॅपिटल्सचा मुख्य प्रशिक्षक बनल्याने 'हितसंबंधांचा संघर्ष' (conflict of interest) होत असल्याचा आरोप गांगुलीने फेटाळून लावला. भारत-उरुग्वे फुटबॉल सामन्यानंतर पत्रकारांशी बोलताना तो म्हणाला की, या प्रकरणी बीसीसीआयच्या लोकपालांचा स्पष्ट आदेश आपल्याकडे आहे.

२०१९ मध्ये गांगुली दिल्ली टीमचा सल्लागार म्हणून जोडला गेला होता. त्यानंतर त्याने 'डायरेक्टर ऑफ क्रिकेट' हे पदही सांभाळलं. आता प्रशिक्षक म्हणून त्याचा हा पहिलाच आयपीएल हंगाम असणार आहे. २०२० मध्ये आयपीएलची फायनल गाठणं, ही दिल्लीची आतापर्यंतची सर्वात मोठी कामगिरी आहे. गेल्या हंगामात टीम पॉईंट्स टेबलमध्ये सहाव्या स्थानावर होती.

यंदा दिल्लीकडे केएल राहुल, अक्षर पटेल, ऋषभ पंत, मिचेल स्टार्क, डेव्हिड मिलर, लुंगी एन्गिडी आणि ट्रिस्टन स्टब्स अशी तगडी फौज आहे. टीमला पहिलं आयपीएल जेतेपद मिळवून देणं हेच आपलं मुख्य लक्ष्य असल्याचं गांगुलीने स्पष्ट केलं. हेमांग बदानी यांच्या जागी गांगुलीने दिल्ली कॅपिटल्सच्या मुख्य प्रशिक्षकपदाची जबाबदारी स्वीकारली आहे. दक्षिण आफ्रिकेतील टी-२० लीगमध्ये दिल्ली टीमची सिस्टर फ्रँचायझी असलेल्या 'प्रिटोरिया कॅपिटल्स'ला फायनलपर्यंत पोहोचवण्याचा अनुभव गांगुलीच्या गाठीशी आहे. याशिवाय युवराज सिंग (बॅटिंग कोच/मेंटॉर), चमिंडा वास (बॉलिंग कोच) आणि अमित मिश्रा (स्पिन कोच) अशा तगड्या सपोर्ट स्टाफची साथही गांगुलीला मिळणार आहे.