Shubman Gill Temple Device: न्यूझीलंड वनडे सीरिजआधी शुभमन गिलच्या डोक्यावर दिसलं नवं ट्रॅकिंग डिव्हाइस; 'टेम्पल'ची जोरदार चर्चा

न्यूझीलंडविरुद्धच्या वनडे सीरिजसाठी सराव करताना भारतीय क्रिकेटर शुभमन गिलने 'टेम्पल' नावाचं एक नवीन फिटनेस डिव्हाइस घातल्याचं दिसलं. हे डिव्हाइस मेंदूचे सिग्नल्स आणि रक्तप्रवाह ट्रॅक करतं. याआधी पीव्ही सिंधूनेही या तंत्रज्ञानाचा वापर केला होता.

ऑकलंडमध्ये न्यूझीलंडविरुद्धच्या वनडे सीरिजसाठी टीम इंडिया जोरदार सराव करत आहे. या सरावादरम्यान भारतीय कॅप्टन शुभमन गिलने वापरलेलं एक नवीन फिटनेस डिव्हाइस सध्या क्रीडा विश्वात चर्चेचा विषय ठरलं आहे. ऑकलंडमधील प्रॅक्टिस सेशनमध्ये गिलच्या कपाळावर 'टेम्पल' (Temple) नावाचं एक फिटनेस ट्रॅकिंग डिव्हाइस दिसलं. नेहमीच्या फिटनेस बँडपेक्षा हे खूप वेगळं आहे. हे डिव्हाइस खास मेंदूशी संबंधित सिग्नल्स ट्रॅक करण्यासाठी डिझाइन केलं आहे.

याआधी भारताची स्टार बॅडमिंटनपटू पीव्ही सिंधूनेही हे डिव्हाइस वापरलं होतं, तेव्हाही याची बरीच चर्चा झाली होती. मात्र, आपण हे डिव्हाइस का वापरत आहोत, याबद्दल गिलने अद्याप कोणतीही माहिती दिलेली नाही. भारताच्या दोन मोठ्या खेळाडूंनी हे नवीन तंत्रज्ञान वापरल्यामुळे क्रीडा चाहत्यांमध्ये याबद्दल मोठी उत्सुकता निर्माण झाली आहे.

काय आहे हे 'टेम्पल' डिव्हाइस?

झोमॅटोचे सह-संस्थापक दीपंदर गोयल यांच्याशी संबंधित एका टीमने हे डिव्हाइस तयार केलं आहे. हे डिव्हाइस कपाळाच्या बाजूला लावलं जातं. याच्या मदतीने मेंदूतील रक्तप्रवाह आणि मेंदूच्या कार्याशी संबंधित इतर शारीरिक सिग्नल्स ट्रॅक करता येतात. फक्त हार्ट रेट आणि झोप ट्रॅक करणाऱ्या स्मार्टवॉचपेक्षा हे खूप वेगळं आहे. मानसिक ताण आणि त्यावर शरीराची होणारी प्रतिक्रिया समजून घेणं, हा या डिव्हाइसचा मुख्य उद्देश आहे.

हे डिव्हाइस ऑप्टिकल सेन्सर्सचा वापर करून मेंदूतील रक्तप्रवाहातील बदल टिपतं. मात्र, तज्ज्ञांच्या मते हे कोणतंही वैद्यकीय उपकरण (मेडिकल डिव्हाइस) नाही. हे फक्त वेलनेस आणि संशोधनासाठी बनवलं आहे. तसेच, खेळांमध्ये याचा नेमका किती फायदा होतो, हे अद्याप पूर्णपणे सिद्ध झालेलं नाही.