Sachin Tendulkar : मास्टर ब्लास्टरची लोणावळ्यात 70 कोटींची जमीन खरेदी; सचिन तेंडुलकरचा पुढचा प्लॅन समोर

क्रिकेटचा देव सचिन तेंडुलकरने महाराष्ट्राचं आवडतं हिल स्टेशन असलेल्या लोणावळ्यात तब्बल ७० कोटी रुपयांची जमीन खरेदी केली आहे. या ३.८६ एकर जागेवर तो काय उभारणार, याची जोरदार चर्चा सुरू झाली आहे.

मुंबई : क्रिकेटचा देव, 'मास्टर ब्लास्टर' सचिन तेंडुलकर फक्त मैदानातच नाही, तर रिअल इस्टेटमध्येही 'मास्टर स्ट्रोक' मारत आहे. सचिनने महाराष्ट्राचं सर्वात प्रसिद्ध आणि सुंदर हिल स्टेशन असलेल्या लोणावळ्यात तब्बल ७० कोटी रुपयांची ३.८६ एकर जमीन खरेदी केली आहे. या बातमीमुळे सध्या तो पुन्हा एकदा चर्चेत आला आहे.

४ सप्टेंबर २०२६ रोजी झाला मोठा सौदा

प्रॉपर्टी रजिस्ट्रेशनची माहिती देणाऱ्या 'झॅपकी' (Zapkey) या संस्थेच्या अधिकृत कागदपत्रांनुसार, हा मोठा व्यवहार ४ सप्टेंबर २०२६ रोजी पार पडला. सचिन तेंडुलकरने एकूण तीन वेगवेगळ्या करारांमधून ही जमीन आपल्या नावावर केली आहे.

पहिला प्लॉट (३.०९ एकर) - या सर्वात मोठ्या जमिनीसाठी सचिनने तब्बल ६३.६९ कोटी रुपये मोजले आणि याची १०० टक्के मालकी मिळवली.

दुसरा प्लॉट - यामध्ये ५० टक्के हिस्सा ४.५६ कोटी रुपयांना खरेदी करण्यात आला.

तिसरा प्लॉट - यातही ५० टक्के हिस्सा १.७५ कोटी रुपयांना विकत घेतला गेला.

सचिनने या तिन्ही जमिनी नंदन धनंजय मेहता आणि विवस्वत धनंजय मेहता यांच्याकडून खरेदी केल्या आहेत. या करारामध्ये फक्त रिकामी जमीनच नाही, तर तिथे असलेल्या काही बांधकामांचाही समावेश आहे. या मोठ्या खरेदीच्या नोंदणीसाठी सचिनने ४.२० कोटी रुपये मुद्रांक शुल्क (Stamp Duty) आणि ९०,००० रुपये नोंदणी शुल्क भरले आहे.

लोणावळ्यात सचिन तेंडुलकर काय बांधणार?

सचिनच्या या गुंतवणुकीची बातमी समोर येताच त्याच्या चाहत्यांमध्ये आणि रिअल इस्टेट क्षेत्रात मोठी उत्सुकता निर्माण झाली आहे. सोशल मीडियावर सुरू असलेल्या चर्चेनुसार दोन शक्यता वर्तवल्या जात आहेत:

१. आलिशान 'सेकंड होम' (फार्महाऊस) - मुंबईच्या धावपळीतून दूर, शांत वातावरणात सुट्ट्या घालवण्यासाठी सचिन आपल्या कुटुंबासाठी सर्व सोयीसुविधांनी युक्त असं एक मोठं फार्महाऊस किंवा व्हिला बांधण्याच्या तयारीत आहे.

२. हॉस्पिटॅलिटी प्रोजेक्ट - लोणावळा हे पर्यटकांचं आवडतं ठिकाण असल्यामुळे, या जागेवर एखादं वर्ल्ड क्लास इको-रिसॉर्ट किंवा वेलनेस सेंटर उभारण्याची शक्यताही तज्ज्ञ व्यक्त करत आहेत.

सेलिब्रिटींचं आवडतं ठिकाण लोणावळा

मुंबईपासून सुमारे १०० किमी आणि पुण्यापासून ६० किमी अंतरावर असलेलं लोणावळा हे महाराष्ट्रातील एक प्रमुख हिल स्टेशन आहे. विशेषतः पावसाळ्यात आणि हिवाळ्यात हजारो पर्यटक इथे गर्दी करतात. मुंबई, पुणे आणि गुजरातचे मोठे उद्योजक, बॉलिवूड सेलिब्रिटी आणि अनिवासी भारतीय (NRI) इथे फार्महाऊस, व्हिला आणि बंगले खरेदी करण्यास पसंती देतात.

मुंबईत आहे १०० कोटींचा बंगला

सचिन तेंडुलकर सध्या मुंबईतील वांद्रे (Bandra) येथील आपल्या आलिशान बंगल्यात कुटुंबासोबत राहतो. २००७ मध्ये त्याने सुमारे ३९ कोटी रुपयांना हा बंगला खरेदी केला होता. ६,००० चौरस फुटांच्या या बंगल्यात अनेक मजले असून, एकाच वेळी ५० गाड्या पार्क करता येतील एवढं मोठं बेसमेंट आहे. सध्या या वांद्रे येथील बंगल्याची किंमत १०० कोटींपेक्षा जास्त असल्याचा अंदाज आहे. आता लोणावळ्यातील ७० कोटींच्या या गुंतवणुकीमुळे सचिनचा रिअल इस्टेट पोर्टफोलिओ आणखी मजबूत झाला आहे.