Tilak Varma: 'टेस्ट क्रिकेट माझ्या रक्तात आहे'; तिलक वर्माचा BCCI निवड समितीला थेट संदेश?
सार
दुलीप ट्रॉफीमध्ये दमदार शतक झळकावल्यानंतर टीम इंडियाचा युवा खेळाडू तिलक वर्माने कसोटी क्रिकेट खेळण्याची तीव्र इच्छा व्यक्त केली आहे. केवळ आयपीएलच्या कामगिरीवर खेळाडूंना लेबल लावण्याच्या बीसीसीआयच्या निवड धोरणावर त्याने अप्रत्यक्षपणे प्रश्नचिन्ह उपस्थित केले आहे.
दुलीप ट्रॉफीच्या उपांत्य फेरीत नाबाद ११६ आणि नाबाद ५१ धावांची खेळी करून आपल्या संघाला अंतिम फेरीत पोहोचवणारा टीम इंडियाचा युवा स्टार तिलक वर्माने आता कसोटी क्रिकेट खेळण्याच्या आपल्या स्वप्नाबद्दल मनमोकळेपणाने भाष्य केले आहे. त्याच्या या विधानांमुळे एक नवी चर्चा सुरू झाली आहे - की तो बीसीसीआयच्या निवड प्रक्रियेवर आणि केवळ आयपीएलच्या कामगिरीच्या आधारावर खेळाडूंना मर्यादित षटकांच्या क्रिकेटसाठी 'ब्रँड' करण्याच्या पद्धतीवर प्रश्नचिन्ह निर्माण करत आहे का?
तिलकने BCCI च्या धोरणावर टीका केली?
सामन्यानंतर बोलताना तिलक वर्मा म्हणाला, "मला सुरुवातीपासूनच रेड-बॉल क्रिकेट खेळायला आवडतं. मी भारतासाठी मर्यादित षटकांचे (T20, ODI) क्रिकेट खेळण्याचे स्वप्न कधीच पाहिले नव्हते. पण ती देवाची इच्छा होती." यातून त्याने स्पष्ट केले आहे की, त्याला व्हाइट-बॉल क्रिकेटपेक्षा कसोटी क्रिकेटमध्ये जास्त रस आहे.
तो पुढे म्हणाला, "आयपीएलमधील कामगिरीमुळे माझी व्हाइट-बॉल फॉरमॅटमध्ये निवड झाली. पण त्याआधी मी रेड-बॉल क्रिकेटमध्ये खूप अनुभव मिळवला होता. मी १० वर्षांचा असल्यापासून कसोटी क्रिकेटसाठी मेहनत घेत आहे. रेड-बॉल क्रिकेट माझ्या रक्तात आहे." हे विधान म्हणजे केवळ आयपीएलची कामगिरी पाहून खेळाडूंची निवड करण्याच्या बीसीसीआयच्या धोरणाला दिलेला एक अप्रत्यक्ष टोला मानला जात आहे.
आणखी एक खंत
आंतरराष्ट्रीय सामन्यांच्या व्यस्त वेळापत्रकामुळे देशांतर्गत क्रिकेटमध्ये रेड-बॉल सामने खेळायला वेळ मिळत नसल्याची खंतही तिलक वर्माने व्यक्त केली. "गेल्या ३-४ वर्षांपासून मी रणजी ट्रॉफी खेळण्याचा प्रयत्न करत आहे. पण आंतरराष्ट्रीय सामन्यांमध्ये व्यस्त असल्यामुळे ते शक्य होत नाहीये. मला अधिक रेड-बॉल सामने खेळून भारतीय कसोटी संघात स्थान मिळवायचे आहे," अशी इच्छा त्याने व्यक्त केली.
सध्या टी-२० संघाचा उपकर्णधार असलेला तिलक वर्माने आतापर्यंत ५३ टी-२० आणि ५ एकदिवसीय सामने खेळले आहेत. मात्र, त्याने अजून कसोटी क्रिकेटमध्ये पदार्पण केलेले नाही. दुलीप ट्रॉफीमधील ही दमदार कामगिरी बीसीसीआय निवड समितीचे डोळे उघडेल का, हे पाहणे महत्त्वाचे ठरेल.