आयपीएल २०२७ पूर्वी स्टीफन फ्लेमिंगने सीएसकेची साथ सोडली. त्यानंतर धोनीने आपला २०११ च्या वर्ल्ड कपमधील सहकारी झहीर खानची हेड कोच म्हणून शिफारस केली. झहीरने सुरुवातीला एका वर्षाच्या करारावर या फ्रँचायझीमध्ये प्रवेश केला आहे.
चेन्नई सुपर किंग्सने आयपीएल २०२७ पूर्वी आपला नवा हेड कोच जाहीर केला आहे. स्टीफन फ्लेमिंगने १८ वर्षांच्या यशस्वी प्रवासानंतर सीएसकेची साथ सोडली. त्याच्या जागी भारताचा माजी वेगवान गोलंदाज आणि २०११ चा वर्ल्ड कप विजेता झहीर खान आता सीएसकेचा नवा कोच असेल.
डिसेंबरमध्ये होणाऱ्या आयपीएल २०२७ साठी सीएसके व्यवस्थापन नव्या कोचच्या शोधात होते. सुरुवातीला इयॉन मॉर्गन आणि ब्रेंडन मॅक्युलम यांच्या नावाची चर्चा होती. पण मुंबई इंडियन्स आणि लखनौ सुपर जायंट्ससोबत काम केलेल्या झहीर खानने बाजी मारली आणि सर्वांनाच आश्चर्याचा धक्का दिला.
25
माजी कोच हेमांग बदानी आघाडीवर होता
झहीर खानची अधिकृत नियुक्ती होण्यापूर्वी दिल्ली कॅपिटल्सचा माजी कोच हेमांग बदानी या शर्यतीत आघाडीवर होता. धोनीला भारतीय कोच हवा होता.
'टाइम्स ऑफ इंडिया'च्या वृत्तानुसार, बदानीने फ्लेमिंगची जागा घेण्यासाठी सर्व निकष पूर्ण केले होते. तो जोबर्ग सुपर किंग्स आणि टेक्सास सुपर किंग्स या सीएसकेच्या इतर फ्रँचायझीही सांभाळेल असा अंदाज होता.
पण अल्बी मॉर्केलने जोबर्ग सुपर किंग्सचा हेड कोच म्हणून पदभार स्वीकारला. त्यामुळे बदानीच्या भूमिकेची व्याप्ती कमी झाली. कराराचा कालावधी आणि रचनेवरून चर्चा थांबली आणि झहीर खानचा मार्ग मोकळा झाला.
35
झहीरला कामाचा मोठा अनुभव
सीएसके फ्रँचायझीमध्ये एमएस धोनीचा शब्द प्रमाण मानला जातो. नवा हेड कोच निवडण्याची अंतिम जबाबदारी त्याच्यावरच होती. फ्रँचायझीचे सीईओ कासी विश्वनाथन यांनी सांगितले की, धोनीनेच आपला माजी सहकारी आणि २०११ च्या वर्ल्ड कप विजेत्या झहीर खानचे नाव सुचवले होते.
"धोनीनेच झहीरचे नाव सुचवले आणि रुपा व ऋतुराज गायकवाड यांचा समावेश असलेल्या क्रिकेट व्यवस्थापन समितीने त्याला होकार दिला," असे सीएसकेच्या सीईओंनी 'द इंडियन एक्स्प्रेस'ला सांगितले.
"त्याच्याकडे आयपीएलमध्ये एमआय आणि एलएसजीसोबत काम करण्याचा अनुभव आहे, त्यामुळे तो योग्य पर्याय वाटला," असेही ते म्हणाले.
चेन्नई सुपर किंग्सने झहीर खानला एका वर्षाच्या करारावर हेड कोच बनवले आहे. हा करार पुढे वाढवण्याचा पर्यायही खुला आहे. 'टीओआय'च्या वृत्तानुसार, हेमांग बदानी आणि एका परदेशी खेळाडूसोबत झालेल्या चर्चेनंतर फ्रँचायझी दीर्घकालीन विचार करत नव्हती.
झहीर खानच्या नावावर शिक्कामोर्तब करण्यापूर्वी धोनीने शॉर्टलिस्ट केलेल्या उमेदवारांसोबत अंतिम फेरीची चर्चा केली. एन. श्रीनिवासन यांची मुलगी आणि सीएसकेची मालकीण रुपा गुरुनाथ यांनीही धोनीच्या शिफारसीला पाठिंबा दिला.
धोनी आणि झहीरने अनेक वर्षे भारतासाठी एकत्र क्रिकेट खेळले आहे. २०११ च्या वर्ल्ड कप विजयातही ते एकत्र होते. या जुन्या मैत्रीचाही या निर्णयात मोठा वाटा आहे.
55
टीमसोबत काम करण्यास सज्ज
सीएसकेचा हेड कोच म्हणून अधिकृत नियुक्ती झाल्यानंतर झहीर खानने आपला आनंद व्यक्त केला. 'इतका मोठा इतिहास असलेल्या फ्रँचायझीसोबत काम करण्यासाठी मी खूप उत्सुक आहे,' असे तो म्हणाला. नव्या सीझनसाठी टीमसोबत काम करण्यास तो सज्ज झाला आहे.
"आयपीएलच्या इतिहासातील सर्वात यशस्वी टीमचा भाग होणे हा माझ्यासाठी मोठा सन्मान आहे. एक क्रिकेटर म्हणून मी मैदानावर सीएसकेचा सामना केला आहे आणि त्या लढतींचा मनसोक्त आनंद लुटला आहे," असे झहीरने सीएसकेने प्रसिद्ध केलेल्या निवेदनात म्हटले आहे.
"चेपॉकमधील सुपरफॅन्स जे वातावरण तयार करतात, ते खूप खास असते. मी या फ्रँचायझीमध्ये सामील होण्याची आतुरतेने वाट पाहत आहे," असेही तो म्हणाला.
क्रिकेट बातम्या (Cricket News): Get the latest and in-depth cricket news in Marathi, including live updates, scores and key developments from IPL and other major cricket series, only on Asianet Marathi News.
