Vaibhav Suryavanshi: ६ महिन्यात वैभव टीम इंडियात येणार, संजू सॅमसन नाही तर 'हे' २ खेळाडू बाहेर जाणार; कैफची भविष्यवाणी

cricket: अफगाणिस्तानविरुद्धची टी-२० मालिका आणि जपानविरुद्धच्या एकमेव टी-२० सामन्यात वैभवला प्लेइंग इलेव्हनमध्ये जागा मिळाली नव्हती.

लखनौ: युवा खेळाडू वैभव सूर्यवंशी येत्या सहा महिन्यात भारतीय टी-२० संघात आपली जागा पक्की करेल, असा दावा भारताचा माजी क्रिकेटपटू मोहम्मद कैफने केला आहे. आपल्या यूट्यूब चॅनलवर बोलताना कैफ म्हणाला की, जेव्हा वैभव प्लेइंग इलेव्हनमध्ये येईल, तेव्हा संजू सॅमसनला बाहेर जावं लागणार नाही. त्याऐवजी सध्याचा उपकर्णधार तिलक वर्मा किंवा अष्टपैलू शिवम दुबे यापैकी एकाला वैभवसाठी आपली जागा रिकामी करावी लागेल.

अफगाणिस्तानविरुद्धच्या टी-२० मालिकेत आणि जपानविरुद्धच्या एकमेव टी-२० सामन्यात वैभवला प्लेइंग इलेव्हनमध्ये संधी मिळाली नव्हती. पण दुलीप ट्रॉफीसारख्या स्पर्धांमध्ये दमदार कामगिरी करणाऱ्या वैभवला टीम मॅनेजमेंट जास्त काळ बाहेर ठेवू शकणार नाही, असं कैफने निदर्शनास आणून दिलं. तो म्हणाला, "मला माहितीये की तिलक वर्मा संघाचा उपकर्णधार आहे. पण याआधीही उपकर्णधारांना संघातून डच्चू मिळाला आहे. दुसरीकडे शिवम दुबेलाही धावा करता येत नाहीयेत. शिवाय त्याचं खराब क्षेत्ररक्षण आणि पार्ट-टाइम गोलंदाजी ही त्याच्यासाठी मोठी अडचण ठरत आहे."

त्यामुळे येत्या सहा महिन्यात तिलक किंवा दुबे यापैकी एक जण भारतीय संघातून बाहेर जाईल आणि त्यांच्या जागी वैभव प्लेइंग इलेव्हनमध्ये येईल, असं कैफने स्पष्ट केलं. वैभवच्या आक्रमक फलंदाजीची तुलना वीरेंद्र सेहवागशी करताना कैफने सांगितलं की, वैभव आता गोलंदाजीवरही लक्ष केंद्रित करत आहे. एक अष्टपैलू खेळाडू म्हणून तो संघासाठी खूप फायदेशीर ठरेल.

एशियानेट न्यूज लाईव्ह पाहण्यासाठी इथे क्लिक करा