
Ishan Kishan : भारतीय क्रिकेटपटू इशान किशन याच्या आयुष्यातील एक अत्यंत भावनिक आणि कठीण प्रसंग नुकताच समोर आला आहे. अंतिम सामना सुरू असताना त्याच्या कुटुंबावर मोठे संकट कोसळले होते. भीषण कार अपघातात त्याची चुलत बहीण आणि तिच्या पतीचा मृत्यू झाला. या दु:खद घटनेमुळे त्याचे वडील अंतिम सामना पाहण्यासाठी जाण्याचा प्रवास रद्द करून तातडीने कुटुंबीयांकडे गेले.
मिळालेल्या माहितीनुसार, हा भीषण अपघात सिलगुरी (Siliguri) येथे घडला. या अपघातात इशानची चुलत बहीण आणि मेहुण्याचा दुर्दैवी मृत्यू झाला. मात्र या दुर्घटनेत एक चमत्कारही घडला. त्यांच्या दोन लहान मुलांनी एक ६ वर्षांचे आणि दुसरे अवघे ३ महिन्यांचे या अपघातातून सुखरूप बचाव केला.
इशान किशनचे वडील प्रणव पांडे आपल्या मुलाचा अंतिम सामना पाहण्यासाठी जय प्रकाश नारायण आंतरराष्ट्रीय विमानतळ येथून अहमदाबाद येथे जाणार होते. मात्र अपघाताची बातमी समजताच त्यांनी तातडीने आपला प्रवास रद्द केला आणि कुटुंबीयांकडे धाव घेतली. या कठीण प्रसंगात ते सिलिगुडी येथे कायदेशीर प्रक्रिया पूर्ण करण्यात आणि कुटुंबाला धीर देण्यात व्यस्त होते.
या वैयक्तिक दुःखाच्या काळातही इशान किशनने आपले लक्ष खेळावर केंद्रित ठेवले. अंतिम सामन्यात त्याने अवघ्या २५ चेंडूत ५४ धावांची दमदार खेळी करत संघाच्या विजयात महत्त्वाची भूमिका बजावली. अनेकांच्या मते, ही खेळी त्याने आपल्या दिवंगत बहिणीसाठी श्रद्धांजली म्हणून साकारली.