IND vs AUS 3rd T20I : तिसऱ्या T20i मध्ये भारताचा ऑस्ट्रेलियावर 5 विकेट्सने दणदणीत विजय

IND vs AUS, 3rd T20I : टीम इंडियाने तिसऱ्या T20 आंतरराष्ट्रीय सामन्यात ऑस्ट्रेलियाला ५ विकेट्सने पराभूत केले आहे. ५ सामन्यांच्या मालिकेत भारताने १-१ अशी बरोबरी साधली आहे.  

India vs Australia, 3rd T20I : भारताने तिसऱ्या T20i सामन्यात ऑस्ट्रेलियाचा ५ विकेट्सने पराभव केला आहे. होबार्टमध्ये खेळल्या गेलेल्या या सामन्यात भारतीय संघाने विजय मिळवून ५ सामन्यांच्या T20i मालिकेत १-१ अशी बरोबरी साधली आहे. ऑस्ट्रेलियन फलंदाजांनी १८७ धावांचे लक्ष्य ठेवले होते, जे टीम इंडियाच्या फलंदाजांनी सहज पार केले. तिलक वर्मा आणि वॉशिंग्टन सुंदर यांनी उत्कृष्ट भागीदारी करून सामना भारताच्या बाजूने झुकवला. तर, अर्शदीप सिंगने गोलंदाजीत कमाल केली. चला संपूर्ण सामन्यावर एक नजर टाकूया...

ऑस्ट्रेलियाने भारताला दिले १८७ धावांचे लक्ष्य

या सामन्यात भारतीय कर्णधार सूर्यकुमार यादवने नाणेफेक जिंकून ऑस्ट्रेलियाला प्रथम फलंदाजीसाठी आमंत्रित केले. प्रत्युत्तरात ऑस्ट्रेलियाने २० षटकांत सहा गडी गमावून १८६ धावा केल्या. टिम डेव्हिडने ३८ चेंडूत ८ चौकार आणि ५ षटकारांच्या मदतीने ७४ धावा केल्या. तर, मार्कस स्टॉइनिसनेही ३९ चेंडूत ८ चौकार आणि दोन षटकारांच्या मदतीने ६४ धावांची खेळी केली. याशिवाय मॅथ्यू शॉर्टने नाबाद २६ धावा केल्या. मिचेल मार्श आणि ट्रॅव्हिस हेड यांना मात्र मोठी खेळी करता आली नाही. हेड ६ आणि मार्श १० धावा करून बाद झाले.

अर्शदीप सिंगची भेदक गोलंदाजी

या सामन्यात अर्शदीप सिंगला भारतीय प्लेइंग इलेव्हनमध्ये स्थान देण्यात आले. हर्षित राणाच्या जागी संघात येताच त्याने अप्रतिम गोलंदाजी केली. चार षटकांत फक्त ३४ धावा देऊन त्याने तीन महत्त्वाचे बळी घेतले. त्याने ट्रॅव्हिस हेड, जोश इंग्लिस आणि मार्कस स्टॉइनिस यांना बाद केले. तर, वरुण चक्रवर्तीने चार षटकांत ३३ धावा देत दोन फलंदाजांना आपल्या जाळ्यात अडकवले. एक विकेट शिवम दुबेच्या खात्यात गेली, पण त्याने तीन षटकांत ४३ धावा दिल्या.

वॉशिंग्टन सुंदर आणि तिलक वर्माने मिळवून दिला विजय

प्रत्युत्तरात भारतीय संघाने १८७ धावांचे लक्ष्य सहज गाठले. फलंदाजीत डावखुरा फलंदाज वॉशिंग्टन सुंदरने सर्वाधिक धावा केल्या. त्याने २३ चेंडूत ३ चौकार आणि ४ षटकारांच्या मदतीने ४९ धावांची नाबाद खेळी केली. त्याच्याशिवाय तिलक वर्मानेही २६ चेंडूत १ चौकार आणि १ षटकाराच्या मदतीने २९ धावा केल्या. अभिषेक शर्मा (१६ चेंडूत २५ धावा), सूर्यकुमार यादव (११ चेंडूत २४ धावा), अक्षर पटेल (१२ चेंडूत १७ धावा), शुभमन गिल (१२ चेंडूत १५ धावा) आणि जितेश शर्माने (१३ चेंडूत २२)* धावा केल्या.