IND vs SA T20 World Cup : दव फॅक्टर गेम फिरवणार? टॉस जिंकून बॅटिंग की बॉलिंग? कॅप्टनचं टेन्शन वाढलं?

IND vs SA T20 World Cup Pitch Report : आज भारत आणि दक्षिण आफ्रिका यांच्यात होणाऱ्या सामन्यात अहमदाबादची खेळपट्टी आणि दव (ड्यू फॅक्टर) महत्त्वाची भूमिका बजावू शकतात. 

IND vs SA T20 World Cup Pitch Report : आज टी-२० वर्ल्ड कपमधला सुपर-८ चा तिसरा सामना खूपच मोठा असणार आहे. एका बाजूला मागच्या वेळेची चॅम्पियन टीम इंडिया आहे, तर दुसऱ्या बाजूला मागच्या वेळेची फायनलिस्ट दक्षिण आफ्रिका. हा सामना अहमदाबादच्या नरेंद्र मोदी स्टेडियमवर (Narendra Modi Stadium) खेळवला जाईल, जे जगातलं सर्वात मोठं स्टेडियम आहे. सामना संध्याकाळी ७ वाजता सुरू होईल आणि टॉस ६:३० वाजता होईल. पिच रिपोर्टनुसार, आजच्या सामन्यात दव म्हणजेच ड्यू फॅक्टर खूप महत्त्वाचा ठरू शकतो.

भारत-दक्षिण आफ्रिका पुन्हा एकदा आमनेसामने

हे दोन्ही संघ मागच्या वेळी फायनलमध्ये भिडले होते. भारताने पहिल्यांदा बॅटिंग करत १७६ रन्स केले होते. याला उत्तर देताना दक्षिण आफ्रिकेचा संघ १६८ रन्सपर्यंतच पोहोचू शकला. भारताने फक्त ७ रन्सनी ट्रॉफी उचलली होती. आज पुन्हा एकदा हे दोन्ही संघ आमनेसामने आहेत. या वेळीसुद्धा खेळपट्टी आणि हवामान खूप महत्त्वाचे ठरणार आहे.

IND vs SA Pitch Report: अहमदाबादची खेळपट्टी काय सांगते?

इथली खेळपट्टी साधारणपणे सपाट मानली जाते. म्हणजे बॅट्समन मोकळेपणाने शॉट्स खेळू शकतात. बॉल बॅटवर चांगला येतो. नवीन बॉलने फास्ट बॉलर्सना सुरुवातीला थोडी मदत मिळू शकते. पण जसजसा सामना पुढे जातो, तसतसे बॅट्समन भारी पडतात. मधल्या ओव्हर्समध्ये स्पिनर्सना थोडा टर्न मिळू शकतो, पण खूप जास्त नाही. इथे आतापर्यंत १२ आंतरराष्ट्रीय टी-२० सामने झाले आहेत. ८ वेळा पहिल्यांदा बॅटिंग करणाऱ्या टीमने विजय मिळवला आहे, तर दुसऱ्यांदा बॅटिंग करणारी टीम फक्त चार वेळाच जिंकू शकली आहे. पहिल्या इनिंगमधला सरासरी स्कोर जवळपास १९० रन्स आहे. इथे २३४ रन्सचा मोठा स्कोरही बनला आहे, ज्यामुळे हे स्पष्ट होतं की रन्सचा पाऊस पडू शकतो.

IND vs SA Toss Factors: टॉसच गेमचेंजर ठरणार का?

आतापर्यंतची आकडेवारी हेच सांगते की इथे पहिल्यांदा बॅटिंग करणं फायद्याचं ठरलं आहे. पहिल्यांदा बॅटिंग करताना जर एखाद्या टीमने मोठा स्कोर उभा केला, तर दुसऱ्या टीमवर दबाव येतो. पण इथे ड्यू फॅक्टरही गेम फिरवू शकतो. सामना संध्याकाळचा आहे. दिवसा गर्मी असेल, पण रात्री दव पडण्याची शक्यता आहे. जेव्हा दव पडतं, तेव्हा बॉल ओला होतो. ओल्या बॉलमुळे बॉलर्सची पकड कमजोर होते, स्पिन करणं अवघड होतं आणि फिल्डिंगमध्येही अडचण येते. अशा परिस्थितीत, दुसऱ्या इनिंगमध्ये बॅटिंग करणं सोपं होऊ शकतं. याच कारणामुळे टॉस जिंकल्यावर कॅप्टन विचारात पडू शकतो की आधी बॅटिंग करायची की चेस करायचं?

अहमदाबादमध्ये टीम इंडियाचा रेकॉर्ड मजबूत

टीम इंडियाने अहमदाबादमध्ये ९ सामने खेळले आहेत आणि ७ सामन्यांमध्ये विजय मिळवला आहे. हेड-टू-हेडबद्दल बोलायचं झालं, तर भारत आणि दक्षिण आफ्रिका यांच्यात आतापर्यंत ३५ टी-२० सामने झाले आहेत. भारताने २१ जिंकले, तर दक्षिण आफ्रिकेने १३ जिंकले आहेत, आणि एक सामना अनिर्णित राहिला आहे. वर्ल्ड कपमध्येही भारत ५-२ ने पुढे आहे.

IND vs SA: टीम इंडियामध्ये बदल होऊ शकतो

मीडिया रिपोर्ट्सनुसार, भारत आणि दक्षिण आफ्रिका सामन्यात उपकर्णधार अक्षर पटेलचं पुनरागमन होऊ शकतं. जर असं झालं, तर कोणत्यातरी एका खेळाडूला बाहेर बसावं लागू शकतं. भारताच्या संभाव्य प्लेइंग इलेव्हनमध्ये ईशान किशन (विकेटकीपर), अभिषेक शर्मा, तिलक वर्मा, सूर्यकुमार यादव (कर्णधार), रिंकू सिंग, हार्दिक पंड्या, शिवम दुबे, अक्षर पटेल, वरुण चक्रवर्ती, जसप्रीत बुमराह आणि अर्शदीप सिंग असू शकतात.

SA vs IND: दक्षिण आफ्रिकेचे संभाव्य ११

दक्षिण आफ्रिकेच्या टीममध्ये एडन मार्करम, क्विंटन डी कॉक, रायन रिकेल्टन, डेवाल्ड ब्रेविस, डेव्हिड मिलर, ट्रिस्टन स्टब्स, मार्को यानसन, कॉर्बिन बॉश, केशव महाराज, लुंगी एनगिडी आणि कगिसो रबाडा असू शकतात.