IND vs SA: हार्दिक पांड्याने जिंकलं चाहत्यांच मन, षटकारामुळे जखमी झालेल्या कॅमेरामनला मारली मिठी

Hardik Pandya Viral Video: भारत विरुद्ध दक्षिण आफ्रिका शेवटच्या T20 सामन्यात हार्दिक पांड्याने आपल्या बॅटने पाच षटकार मारले, पण एक षटकार कॅमेरामनच्या खांद्यावर लागला, ज्याला नंतर हार्दिक स्वतः भेटायला पोहोचला. 

Hardik Pandya Cameraman Injury: अहमदाबादच्या नरेंद्र मोदी स्टेडियमवर भारत आणि दक्षिण आफ्रिका यांच्यात पाच सामन्यांच्या T20 मालिकेतील पाचवा आणि शेवटचा सामना खेळला गेला. हा सामना भारताने 30 धावांनी जिंकला आणि मालिका 3-1 ने आपल्या नावावर केली. हार्दिक पांड्या 'प्लेअर ऑफ द मॅच' ठरला, तर वरुण चक्रवर्ती 'प्लेअर ऑफ द सिरीज' ठरला. हार्दिकने शेवटच्या सामन्यात 63 धावांची तुफानी खेळी केली. पण त्याच्या पहिल्याच षटकातील एक षटकार थेट कॅमेरामनच्या खांद्यावर लागला, ज्याला नंतर हार्दिक पांड्या भेटायला पोहोचला.

कॅमेरामनसोबत हार्दिक पांड्याचा व्हायरल व्हिडिओ

इंस्टाग्रामवर sportstalkcricket नावाच्या पेजवर हार्दिक पांड्याचा सामन्यानंतरचा एक व्हिडिओ शेअर करण्यात आला आहे. या व्हिडिओमध्ये हार्दिक पांड्या त्याच कॅमेरामनजवळ पोहोचला, ज्याला त्याच्या षटकाराने खांद्याला दुखापत झाली होती. या व्हिडिओमध्ये तुम्ही पाहू शकता की, हार्दिक त्या कॅमेरामनची दुखापत कशी पाहत आहे, त्याला प्रेमाने मिठी मारत आहे आणि स्वतः त्याच्या खांद्याला शेक देत आहे. सोशल मीडियावर हार्दिकचा हा व्हिडिओ वेगाने व्हायरल होत आहे आणि चाहतेही कमेंट करत आहेत की हार्दिक पांड्याकडे सोन्याचं काळीज आहे. एका युझरने लिहिले, 'हार्दिक भाई, तू मन जिंकलंस.'

कॅमेरामनला दुखापत कशी झाली?

भारत विरुद्ध दक्षिण आफ्रिका सामन्यात सूर्यकुमार यादव बाद झाल्यानंतर 13व्या षटकात हार्दिक पांड्या फलंदाजीसाठी आला आणि कॉर्बिन बॉशच्या पहिल्याच चेंडूवर षटकार मारून आपले खाते उघडले. त्याने ऑफ स्टंपच्या बाहेरच्या चेंडूवर पुढे येऊन षटकार मारला, पण चेंडू डगआऊटच्या बाजूला उभ्या असलेल्या कॅमेरामनच्या खांद्यावर लागला. हे पाहून तेथे बसलेला प्रत्येकजण थक्क झाला. प्रशिक्षक गौतम गंभीरही हे पाहून घाबरले. नंतर फिजिओने जाऊन त्याला तपासले आणि स्प्रे लावला. भारताचा डाव संपल्यानंतर हार्दिक स्वतः कॅमेरामनला आईस पॅक लावताना दिसला.

हे देखील वाचा- IND vs SA 5th T20i: हार्दिक पांड्याने बॅटने उडवली खळबळ, अभिषेक शर्माचा विक्रम मोडला

दक्षिण आफ्रिकेविरुद्ध भारताचा शानदार विजय

भारत आणि दक्षिण आफ्रिका यांच्यातील शेवटच्या सामन्याबद्दल बोलायचे झाल्यास, भारताने प्रथम फलंदाजी करताना निर्धारित 20 षटकांत 5 गडी गमावून 231 धावा केल्या. यामध्ये हार्दिक पांड्याने 63 आणि सर्वाधिक तिलक वर्माने 73 धावांची खेळी केली. प्रत्युत्तरात दक्षिण आफ्रिकेचा संघ 20 षटकांत 8 गडी गमावून 201 धावाच करू शकला, ज्यामुळे भारताने हा सामना 30 धावांनी आणि मालिका 3-1 ने जिंकली.