गौतम गंभीरचे स्पष्ट वक्तव्य; रोहित-विराटसोबत मतभेदांच्या चर्चांवर पहिल्यांदाच भाष्य

Gautam Gambhir statement : भारतीय क्रिकेट संघाचे मुख्य प्रशिक्षक गौतम गंभीर यांनी अखेर रोहित शर्मा आणि विराट कोहली यांच्यासोबतच्या मतभेदांच्या चर्चांवर प्रतिक्रिया दिली आहे. त्यांनी स्वतःकडूनही चुका झाल्याची कबुली देत ड्रेसिंग रूममधील प्रामाणिकपणा महत्त्वाचा असल्याचे सांगितले. तसेच संजू सॅमसनच्या पुनरागमनाबाबतही त्यांनी स्पष्टीकरण दिले.

भारतीय क्रिकेट संघाचे मुख्य प्रशिक्षक गौतम गंभीर यांनी वरिष्ठ खेळाडू रोहित शर्मा आणि विराट कोहली यांच्यासोबतच्या नात्याबाबत सुरू असलेल्या चर्चांवर पहिल्यांदाच स्पष्ट भूमिका मांडली आहे. बॉर्डर-गावसकर ट्रॉफीनंतर संघातील वातावरणावर प्रश्नचिन्ह उपस्थित केले जात असताना, गंभीर यांनी या सर्व चर्चांवर खुलासा करत आपली भूमिका स्पष्ट केली.

“चुका होऊ शकतात”, गंभीरची कबुली

मतभेदांच्या चर्चांबाबत विचारले असता गंभीर यांनी प्रामाणिक उत्तर दिले. ते म्हणाले की, “मीही एक माणूस आहे आणि इतरांप्रमाणे माझ्याकडूनही चुका होऊ शकतात. गेल्या काही महिन्यांत काही निर्णय चुकीचे ठरले असतील, मात्र मी त्यापासून कधीही पळ काढलेला नाही.” त्यांनी पुढे स्पष्ट केले की, योग्य हेतूने घेतलेले चुकीचे निर्णय स्वीकारार्ह असतात, पण चुकीच्या हेतूने घेतलेले निर्णय कधीही योग्य ठरत नाहीत.

ड्रेसिंग रूममधील प्रामाणिकपणाला प्राधान्य

सोशल मीडिया आणि माध्यमांमध्ये सुरू असलेल्या टीकेवर भाष्य करताना गंभीर यांनी सांगितले की, त्यांच्यासाठी ड्रेसिंग रूममधील प्रामाणिकपणा सर्वात महत्त्वाचा आहे. “जोपर्यंत मी माझ्या सहकाऱ्यांशी आणि खेळाडूंशी प्रामाणिक आहे, तोपर्यंत मी माझ्या जबाबदारीशी प्रामाणिक आहे,” असे ते म्हणाले.

रोहित-विराटच्या निवृत्तीवरही चर्चा

विशेष म्हणजे, इंग्लंड मालिकेपूर्वीच रोहित शर्मा आणि विराट कोहली यांनी कसोटी क्रिकेटमधून निवृत्ती घेतल्यामुळे चर्चांना अधिक उधाण आले होते. या पार्श्वभूमीवर संघातील अंतर्गत मतभेदांच्या बातम्यांनाही जोर आला होता.

संजू सॅमसनच्या पुनरागमनावर स्पष्टीकरण

दरम्यान, संजू सॅमसन याला टी-20 वर्ल्डकपदरम्यान प्लेइंग इलेव्हनमध्ये पुन्हा स्थान देण्याच्या निर्णयावरही गंभीर यांनी भाष्य केले. त्यांनी स्पष्ट केले की हा निर्णय संघ अधिक आक्रमक करण्याच्या धोरणाचा भाग होता. “आमची विचारसरणी स्पष्ट आहे—मैदानावर उतरा आणि आक्रमक क्रिकेट खेळा,” असे त्यांनी सांगितले.