Asia Cup 2025 India vs Pakistan : सामना संपल्यावर हस्तांदोलन न केल्याने पाकिस्तान क्रिकेट संघाची भारतीय संघाविरोधात तक्रार

Asia Cup 2025 India vs Pakistan भारतीय खेळाडूंनी काल रविवारी झालेल्या सामन्यानंतर पाकिस्तानी खेळाडूंसोबत हस्तांदोलन केले नाही. त्यामुळे पाकिस्तानी व्यवस्थापनाने भारतीय संघाविरुद्ध तक्रार दाखल केली आहे.

Asia Cup 2025 India vs Pakistan : १४ सप्टेंबर रोजी झालेल्या आशिया कपमधील गट-सामन्यानंतर, पाकिस्तान क्रिकेट संघाने भारतीय खेळाडू आणि सामना अधिकाऱ्यांविरुद्ध औपचारिकपणे निषेध व्यक्त केला आहे. सामना संपल्यानंतर भारतीय खेळाडूंनी पाकिस्तानी खेळाडूंंशी हस्तांदोलन (handshake) न केल्यामुळे पाकिस्तान क्रिकेट बोर्डाने (PCB) आशियाई क्रिकेट परिषदेकडे (ACC) तक्रार दाखल केली आहे.

पीटीआय (PTI) या वृत्तसंस्थेनुसार, पीसीबीने सामनाधिकारी अँडी पायक्रॉफ्ट यांच्या वर्तनावरही चिंता व्यक्त केली आहे. त्यांनी दिलेल्या सूचनांमुळेच हा प्रकार घडला असा आरोप पीसीबीने केला आहे.

या वादाचे मुख्य कारण म्हणजे सामन्यानंतरचे वागणे, जे सहसा हस्तांदोलनाने आणि खिलाडूवृत्तीने (sportsmanship) दर्शवले जाते. पीसीबीचा दावा आहे की, कर्णधार सूर्यकुमार यादवच्या नेतृत्वाखालील भारतीय संघाने पाकिस्तानचा कर्णधार सलमान अली आगा आणि त्याच्या सहकाऱ्यांशी हस्तांदोलन सुरू केले नाही किंवा त्यांनीही हस्तांदोलनाला प्रतिसाद दिला नाही.

पीपीबीने दिलेल्या निवेदनानुसार, "सामन्याच्या वेळी नाणेफेकीच्या वेळी सामनाधिकारी अँडी पायक्रॉफ्ट यांनी कर्णधार सलमान अली आगाला त्याच्या भारतीय समकक्षाशी हस्तांदोलन न करण्यास सांगितले होते. पाकिस्तान संघ व्यवस्थापनाने या वर्तनाला खेळाच्या भावनेच्या (spirit of sports) विरुद्ध असल्याचे सांगत निषेध नोंदवला आहे."

पीसीबीने असेही सांगितले की, या निषेधार्थ सलमान अली आगाने सामन्यानंतरच्या पारितोषिक वितरण समारंभात भाग घेतला नाही. "भारतीय संघाच्या वर्तनाच्या निषेधार्थ सलमान अली आगाने सामन्यानंतरच्या पारितोषिक वितरण समारंभात भाग घेतला नाही, कारण समारंभाचा सूत्रसंचालक (होस्ट) देखील भारतीय होता," असेही त्यात म्हटले आहे.

आंतरराष्ट्रीय क्रिकेट परिषदेच्या (ICC) आचारसंहितेनुसार (code of conduct), सामना संपल्यानंतर प्रतिस्पर्धी संघाचे अभिनंदन करणे अपेक्षित आहे. पीसीबीने म्हटले आहे की, भारतीय संघाने या नियमाचे पालन केले नाही, त्यामुळे त्यांनी या प्रकरणाची तक्रार करण्याचा निर्णय घेतला.

मिळालेल्या माहितीनुसार, सामन्याच्या शेवटी हस्तांदोलन झाले नाही, तसेच नाणेफेकीच्या वेळी किंवा स्पर्धेपूर्वीच्या पत्रकार परिषदेतही कोणत्याही कर्णधाराने हस्तांदोलन केले नाही.

पीसीबीच्या तक्रारीत सामनाधिकारी अँडी पायक्रॉफ्ट यांच्यावरही आरोप आहेत, ज्यांनी सलमान अली आगाला सूर्यकुमार यादवशी हस्तांदोलन न करण्याचा सल्ला दिला होता. संघ व्यवस्थापनाने या सूचनेचा उल्लेख खेळाच्या भावनेचे उल्लंघन (breach of the Spirit of Cricket) म्हणून केला आहे.

आयसीसीच्या नियमांनुसार, खेळाडू, कर्णधार आणि अधिकारी या सर्वांची निष्पक्ष खेळ खेळण्याची जबाबदारी आहे. 'खिलाडूवृत्ती'मध्ये प्रतिस्पर्धी, पंच आणि खेळाचाच आदर करणे हे महत्त्वाचे आहे.

या घटनेने क्रिकेट जगतात आणि चाहत्यांमध्ये लक्ष वेधले आहे. पीसीबीचा आग्रह आहे की अशा कृतींमुळे आंतरराष्ट्रीय क्रिकेटमधील मूल्यांचे महत्त्व कमी होते. आशियाई क्रिकेट परिषद (ACC) आणि आयसीसीने अद्याप या निषेधावर कोणतीही सार्वजनिक प्रतिक्रिया दिलेली नाही.