Vaibhav Suryavanshi: हा तर खरा सुपरस्टार! १५ वर्षांच्या पोरानं बुमराहला धुतलं, दिग्गज खेळाडूही झाला फॅन

Vaibhav Suryavanshi: राजस्थान रॉयल्सच्या १५ वर्षांच्या वैभव सूर्यवंशीने जसप्रीत बुमराहला पहिल्याच बॉलवर सिक्सर मारून सर्वांचं लक्ष वेधून घेतलं आहे. त्याच्या या खेळीचं दक्षिण आफ्रिकेचा दिग्गज खेळाडू ग्रॅम स्मिथने तोंडभरून कौतुक केलं आहे.

मुंबई: आयपीएल २०२६ मध्ये सध्या एकाच नावाची चर्चा आहे - राजस्थान रॉयल्सचा १५ वर्षांचा खेळाडू वैभव सूर्यवंशी. मुंबई इंडियन्सविरुद्धच्या सामन्यात या तरुण खेळाडूने धुमाकूळ घातला आहे. जगातील नंबर वन टी-२० बॉलर जसप्रीत बुमराहला सामोरं जाताना पहिल्याच बॉलवर सिक्सर मारून वैभवने संपूर्ण क्रिकेट विश्वाला चकित केलं आहे.

त्याच्या या कामगिरीनंतर, दक्षिण आफ्रिकेचा दिग्गज बॅट्समन ग्रॅम स्मिथने वैभवला 'खरा सुपरस्टार' म्हटलं आहे. स्मिथने आपल्या ब्लॉगमध्ये या खेळाडूचं कौतुक केलं. तो म्हणाला, "रोहित शर्मा आणि विराट कोहलीसारख्या सिनियर खेळाडूंना खेळताना पाहणं नेहमीच चांगलं वाटतं. पण या सीझनच्या सुरुवातीच्या आठवड्यांमध्ये राजस्थान रॉयल्सचा वैभव सूर्यवंशी हा पाहण्यासारखा खेळाडू आहे. पहिल्याच बॉलपासून जोरदार फटकेबाजी करण्याची त्याची क्षमता अविश्वसनीय आहे. ही स्पर्धा संपेपर्यंत तो एक मोठा सुपरस्टार बनेल."

स्मिथ २००८ मध्ये आयपीएल जिंकणाऱ्या राजस्थान रॉयल्स टीमचा सदस्य होता. आयपीएलने जागतिक क्रिकेटला पूर्णपणे बदलून टाकलं, असंही त्याने नमूद केलं.

अनिल कुंबळेही झाले प्रभावित

बुमराहसारख्या वर्ल्ड क्लास बॉलरला पहिल्याच बॉलवर सिक्सर मारण्याचा आत्मविश्वास दाखवल्याबद्दल भारताचे माजी कर्णधार अनिल कुंबळे यांनीही वैभवचं कौतुक केलं. पावसामुळे ओव्हर्स कमी केलेल्या या सामन्यात वैभवने फक्त १४ बॉलमध्ये ३९ रन्स ठोकले. विशेष म्हणजे, त्याने एकाच ओव्हरमध्ये बुमराहला दोन सिक्सर मारले.

मुंबई इंडियन्सविरुद्ध २७ रन्सने शानदार विजय मिळवणाऱ्या राजस्थान रॉयल्सच्या बॅटिंग लाईनअपमध्ये वैभव एक मजबूत खेळाडू म्हणून समोर आला आहे. आता या १५ वर्षांच्या खेळाडूच्या पुढील सामन्यांमधील कामगिरी पाहण्यासाठी क्रिकेट चाहते आतुरतेने वाट पाहत आहेत.