मुंबईकरांनो सावधान! वडाळा-अँटॉप हिलचा 'हा' महत्त्वाचा रस्ता २ महिने बंद; पाहा नवा ट्रॅफिक प्लॅन आणि पर्यायी मार्ग

Mumbai Traffic Update: बृहन्मुंबई महानगरपालिकेच्या (BMC) सांडपाणी वाहिनीच्या कामामुळे वडाळा परिसरातील आरटीओ चौक ते वडाळा डेपो मोनोरेल स्टेशनपर्यंतची उत्तर वाहिनी २४ मार्च ते २२ मे २०२६ पर्यंत बंद ठेवण्यात येणार आहे. या काळात वाहतूक सुरळीत ठेवण्यासाठी दक्षिण वाहिनी दुहेरी वाहतुकीसाठी खुली करण्यात आली आहे. 

मुंबई: जर तुम्ही वडाळा, सायन किंवा अँटॉप हिल परिसरातून प्रवास करत असाल, तर ही बातमी तुमच्यासाठी अत्यंत महत्त्वाची आहे. बृहन्मुंबई महानगरपालिकेकडून (BMC) सांडपाणी वाहिनीच्या (Sewerage Pipeline) कामासाठी वडाळा परिसरातील एक मुख्य रस्ता पुढील दोन महिन्यांसाठी वाहतुकीसाठी बंद ठेवण्याचा निर्णय घेण्यात आला आहे.

कधीपर्यंत असेल बंदी?

हा बदल २४ मार्च २०२६ च्या मध्यरात्रीपासून लागू झाला असून, २२ मे २०२६ पर्यंत कायम राहणार आहे. अँटॉप हिल वाहतूक विभागाच्या हद्दीत हे काम चालणार आहे.

नेमका कोणता रस्ता बंद राहणार?

बंद रस्ता: आरटीओ (RTO) चौक ते वडाळा डेपो मोनोरेल स्टेशनपर्यंतची उत्तर वाहिनी (North Bound) वाहतुकीसाठी पूर्णपणे बंद असेल.

कारण: मोनोरेल पोल क्र. १ एल-३२२ जवळ महापालिकेकडून २५ फूट व्यास आणि २० फूट खोल खड्डा खोदून पाईपलाईनचे काम केले जात आहे. रस्त्यावर केवळ ३.२५ फूट जागा शिल्लक असल्याने मोठ्या वाहनांना जाणे अशक्य आहे.

असा असेल पर्यायी मार्ग (Traffic Diversion)

वाहतूक पोलिसांनी प्रवाशांचा गोंधळ उडू नये म्हणून खालीलप्रमाणे नियोजन केले आहे.

दक्षिण वाहिनीचा वापर: आरटीओ चौकापासून वडाळा मोनोरेल स्टेशनपर्यंतचा दक्षिणेकडील रस्ता (South Bound) आता 'दुहेरी' (Both Ways) वाहतुकीसाठी खुला ठेवण्यात आला आहे.

मूळ मार्गावर परतणे: वडाळा डेपो मोनोरेल स्टेशनवर पोहोचल्यानंतर, प्रवासी उपलब्ध मोकळ्या रस्त्याचा वापर करून पुन्हा आपल्या मूळ उत्तरेकडील रस्त्यावर (North Bound) जाऊ शकतील.

प्रवाशांना विनंती

या कामामुळे वडाळा परिसरात मोठ्या प्रमाणावर वाहतूक कोंडी होण्याची शक्यता आहे. शक्य असल्यास पर्यायी मार्गांचा वापर करावा किंवा प्रवासासाठी अतिरिक्त वेळ हातात ठेवूनच घराबाहेर पडावे.