Raj Thackeray-Uddhav Thackeray : ठाकरे बंधूंचा ४ ऑक्टोबरला महामोर्चा; निवडणूक आयोगाविरोधात मुंबईत शक्तिप्रदर्शन
सार
ठाकरे बंधूंच्या नेतृत्वाखाली ४ ऑक्टोबरला मुंबईत निवडणूक आयोगाविरोधात संयुक्त महामोर्चा काढण्यात येणार आहे.
मुंबई : मुख्य निवडणूक आयुक्त ज्ञानेश कुमार यांच्या नेतृत्वाखालील निवडणूक आयोगाच्या कारभारावर आणि मतदार यादीच्या ‘SIR’ प्रक्रियेवर ठाकरे बंधूंनी आक्षेप नोंदवला आहे. या पार्श्वभूमीवर मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या नेतृत्वाखाली ४ ऑक्टोबर रोजी मुंबईत संयुक्त महामोर्चा काढण्यात येणार आहे. या मोर्चात इतर विरोधी पक्षांनाही सहभागी होण्याचे आवाहन करण्यात येणार आहे.
४ ऑक्टोबरला मुंबईत महामोर्चा
राज ठाकरे यांच्या शिवतीर्थ निवासस्थानी राज ठाकरे आणि उद्धव ठाकरे यांची पत्रकार परिषद झाली. यावेळी राज ठाकरे यांनी मोर्चाची माहिती दिली. त्यांच्या माहितीनुसार, ४ ऑक्टोबर रोजी सकाळी १० वाजता भायखळ्यातील रिचर्डसन अँड क्रुडास कंपनीजवळ कार्यकर्ते आणि नागरिक जमणार आहेत. त्यानंतर सकाळी ११ ते ११.३० वाजण्याच्या सुमारास मोर्चाला सुरुवात होणार आहे. मोर्चाचा समारोप छत्रपती शिवाजी महाराज टर्मिनस परिसरातील मुंबई महापालिका मुख्यालयाजवळ होणार असून, तेथे सभेचे आयोजन करण्यात येणार असल्याचे राज ठाकरे यांनी सांगितले.
‘मोर्चाच्या दिवशीच सविस्तर बोलणार’
निवडणूक आयोगाच्या कारभारावर आणि मतदान प्रक्रियेतील कथित अनियमिततेवर यापूर्वीही भूमिका मांडल्याचे राज ठाकरे यांनी सांगितले. निवडणूक आयोगाकडे तक्रारी करूनही त्याची दखल घेतली नसल्याचा त्यांचा दावा आहे.मोर्चाबाबत पत्रकारांनी विविध प्रश्न विचारले असता, राज ठाकरे यांनी त्यावर सविस्तर भाष्य टाळले. “जे काही बोलायचं आहे, ते मोर्चाच्या दिवशीच बोलू,” अशी भूमिका त्यांनी स्पष्ट केली.
मोर्चात राजकीय झेंडे नाहीत
या मोर्चात कोणत्याही राजकीय पक्षाचे झेंडे आणले जाणार नसल्याचे राज ठाकरे यांनी स्पष्ट केले. केवळ तिरंगा हातात घेऊन सहभागी होण्याचे आवाहन करण्यात येणार आहे. हा मोर्चा लोकशाही आणि संविधानाच्या मुद्द्यावर असल्याचे त्यांनी सांगितले.
विरोधी पक्षांच्या नेत्यांना फोनवरून निमंत्रण
४ ऑक्टोबरच्या मोर्चात इतर विरोधी पक्ष सहभागी होणार का, याबाबतही राज ठाकरे यांनी भूमिका स्पष्ट केली. संबंधित नेत्यांना पत्र पाठवण्याऐवजी फोनवरून मोर्चात सहभागी होण्याचे आवाहन करण्यात येणार असल्याचे त्यांनी सांगितले. ठाकरे बंधूंच्या या संयुक्त मोर्चामुळे निवडणूक आयोगाच्या SIR प्रक्रियेवरून सुरू असलेल्या राजकीय चर्चेला आणखी वेग आला आहे.