57 मिनिटांत 10KM रन, पत्नीच्या मुंबई मॅरेथॉनमधील कामगिरीवर नितीन कामत भावूक

Nithin Kamath Emotional As Wife Seema Runs : 57 मिनिटांत 10KM मॅरेथॉन धाव, पत्नी सीमा कामतच्या कामगिरीबद्दल आणि तिच्या संघर्षाबद्दल उद्योजक नितीन कामत यांनी माहिती दिली आहे. जाणून घ्या या श्रीमंत तरुण उद्योजकाच्या संघर्षाची कहाणी.

Nithin Kamath Emotional As Wife Seema Runs : झिरोधाचे संस्थापक, श्रीमंत तरुण उद्योजक नितीन कामत यांनी त्यांच्या आयुष्यातील एक आनंदाचा क्षण शेअर केला आहे. मुंबई मॅरेथॉनमध्ये नितीन कामत यांची पत्नी सीमा कामत सहभागी झाल्या होत्या. त्यांनी 10 किलोमीटरची धाव 57 मिनिटांत पूर्ण केली. बंगळूरु, दिल्ली, मुंबई मॅरेथॉनमध्ये हजारो लोक सहभागी होऊन फिटनेससाठी धावतात, हे नवीन नाही. यात श्रीमंत, राजकारणी, सेलिब्रिटी सहभागी होतात. पण सीमा कामत यांची मॅरेथॉनमधील धाव खास होती. कारण कॅन्सरविरुद्ध लढा देऊन मृत्यूवर मात केलेल्या सीमा कामत यांनी 57 मिनिटांत मुंबई मॅरेथॉनमध्ये 10 किलोमीटरची धाव पूर्ण केली आहे. या संघर्षाचा प्रवास नितीन कामत यांनी सोशल मीडियावर शेअर केला आहे.

2.5 वर्षांनंतर मॅरेथॉनमध्ये धाव

गेल्या 2.5 वर्षांनंतर सीमा कामत मुंबई मॅरेथॉनमध्ये 10 किलोमीटर धावल्या आहेत. गेल्या अडीच वर्षांपासून कॅन्सरविरुद्ध लढा देणाऱ्या सीमा कामत आता बऱ्या झाल्या आहेत. अत्यंत कठीण दिवसांमधून गेलेल्या सीमा यांनी केमोथेरपीसह अनेक कठोर उपचार घेतले आहेत. अडीच वर्षांच्या सततच्या लढ्यानंतर आता त्यांनी मुंबई मॅरेथॉनमध्ये यशस्वीरित्या धाव पूर्ण केली आहे.

नितीन कामत यांनी आनंद व्यक्त केला

टाटा मुंबई मॅरेथॉनमध्ये सहभागी झालेल्या विशेष दिव्यांग व्यक्तींमधील उत्साह, आनंद आणि संघर्ष शब्दांत वर्णन करणे अशक्य आहे. ही मॅरेथॉन पाहिल्यावर मला वाटले की, आयुष्यात कोणत्याही गोष्टीबद्दल तक्रार करण्याचा आपल्याला काय अधिकार आहे? आपण स्वतःला प्रश्न विचारला पाहिजे. कारण माझ्या वैयक्तिक आयुष्याबद्दल बोलायचे झाल्यास, पत्नी सीमा कामत 2.5 वर्षांनंतर कॅन्सरच्या लढाईत मृत्यूवर मात करून परत आली आहे. कॅन्सरमधून बऱ्या झाल्यानंतर आज मुंबई मॅरेथॉनमध्ये 10 किलोमीटरची धाव 57 मिनिटांत पूर्ण केली आहे, असे नितीन कामत यांनी म्हटले आहे.

सीमा कामत नेहमी चांगल्या आहारपद्धतीचे पालन करत होत्या. फिटनेस, जिमचा सराव यासह सर्व व्यायाम त्या करत असत. पण 2021 मध्ये सीमा कामत यांना स्तनाचा कॅन्सर असल्याचे निदान झाले. निदान झाले तेव्हा तो स्टेज 2 चा कॅन्सर होता. कॅन्सरचे निदान झाल्याने सीमा कामत यांना मोठा धक्का बसला होता. जवळच्या व्यक्तींशिवाय त्यांनी ही गोष्ट कोणालाही सांगितली नव्हती. पती नितीन कामत प्रत्येक पावलावर त्यांच्यासोबत खंबीरपणे उभे होते. स्टेज 2 मध्ये कॅन्सरचे निदान झाल्यामुळे सीमा कामत यांनी उपचार सुरू केले. सामान्यतः कॅन्सरचे उपचार अत्यंत वेदनादायी असतात. केमोथेरपीपासून ते सर्व थेरपी जगण्याचा उत्साहच हिरावून घेतात. या सर्व परिस्थितीत सीमा कामत यांनी खंबीरपणे लढा दिला. आता मृत्यूवर मात करून त्या मुंबई मॅरेथॉनमध्ये सहभागी झाल्या आहेत.

याबद्दल सीमा कामत यांनी त्यांच्या पेजवर लिहिले आहे. त्यांनी आपल्या संघर्षाचा प्रवास आणि उपचारांदरम्यानच्या अडचणींबद्दल सांगितले आहे. सीमा कामत अनेकांसाठी प्रेरणास्थान ठरल्या आहेत. सोशल मीडियावर सीमा यांच्या कामगिरीचे कौतुक होत आहे.