नाशिककरांची चंगळ! आता मुंबई-धनबाद एक्स्प्रेस नाशिक रोडवर थांबणार; प्रवाशांना मोठा दिलासा

Mumbai Dhanbad Express Nashik Stop: रेल्वे प्रशासनाने मुंबई ते धनबाद दरम्यान धावणाऱ्या 'हॉलिडे स्पेशल' एक्स्प्रेसला नाशिक रोड रेल्वे स्थानकावर थांबा मंजूर केला. यामुळे उत्तर भारताकडे जाणाऱ्या प्रवाशांची, मुंबईला जाणाऱ्या नोकरदारांची सोय होणार आहे. 

नाशिककरांची चंगळ! आता मुंबई-धनबाद एक्स्प्रेस नाशिक रोडवर थांबणार

नाशिक: उन्हाळ्याच्या सुट्ट्यांचे नियोजन करणाऱ्या नाशिककरांसाठी एक सुखद बातमी समोर आली आहे. रेल्वे प्रशासनाने लोकमान्य टिळक टर्मिनस (LTT) ते धनबाद दरम्यान धावणाऱ्या 'हॉलिडे स्पेशल' एक्स्प्रेसला आता नाशिक रोड रेल्वे स्थानकावर थांबा मंजूर केला आहे. यामुळे उत्तर भारताकडे जाणाऱ्या प्रवाशांचा आणि मुंबईला जाणाऱ्या नोकरदारांचा प्रवास अधिक सुखकर होणार आहे. 

गाडीचे वेळापत्रक आणि मार्ग

ही साप्ताहिक विशेष गाडी ८ एप्रिल पासून रुळावर धावणार असून तिचे नियोजन खालीलप्रमाणे असेल.

गाडी क्र. १३३८० (LTT ते धनबाद): ही गाडी दर बुधवारी पहाटे ०४:५५ वाजता मुंबईतून सुटेल आणि तिसऱ्या दिवशी सकाळी ०८:०० वाजता धनबादला पोहोचेल.

गाडी क्र. १३३७९ (धनबाद ते LTT): ही गाडी दर सोमवारी सकाळी ११:०० वाजता धनबादहून सुटेल आणि तिसऱ्या दिवशी दुपारी ०१:४० वाजता मुंबईत पोहोचेल. 

प्रमुख थांबे

नाशिक रोडसह ही ट्रेन कल्याण, इगतपुरी, मनमाड, चाळीसगाव, जळगाव, भुसावळ, इटारसी, जबलपूर, सिंगरुळी आणि रांची रोड अशा महत्त्वाच्या स्थानकांवर थांबणार आहे. 

कशी असेल रेल्वेची रचना?

प्रवाशांच्या सोयीसाठी या ट्रेनमध्ये सर्व प्रकारचे कोच उपलब्ध करून देण्यात आले आहेत.

२ सेकंड एसी टियर

२ थर्ड एसी टियर

६ एसी थ्री इकॉनॉमी

६ स्लीपर कोच

४ जनरल कोच आणि २ जनरेटर डबे. 

आरक्षण सुरू!

या गाडीसाठीचे बुकिंग ५ एप्रिल पासून सुरू झाले आहे. प्रवासी आयआरसीटीसीच्या (IRCTC) अधिकृत वेबसाईटवर किंवा 'RailOne' ॲपद्वारे आपले तिकीट आरक्षित करू शकतात. उन्हाळी सुट्ट्यांमुळे गर्दी वाढण्याची शक्यता असल्याने प्रवाशांनी लवकरात लवकर आरक्षण करावे, असे आवाहन रेल्वेने केले आहे.