Mumbai Thailand Flight Diverted : बॉम्बच्या अफवेने खळबळ, इंडिगो विमानाचे चेन्नईत इमर्जन्सी लँडिंग!

Mumbai Thailand Flight Diverted : मुंबईहून थायलंडला जाणाऱ्या इंडिगो विमानात बॉम्ब असल्याची धमकी मिळाल्यामुळे, विमानाचे चेन्नई विमानतळावर तातडीने लँडिंग करण्यात आले. १८२ प्रवाशांना सुखरूप उतरवण्यात आले.

इंडिगो एअरलाइन्सचे विमान

मुंबईहून १८२ प्रवाशांना घेऊन इंडिगो एअरलाइन्सचे विमान थायलंडच्या फुकेतला जात होते. विमान हवेत असताना, एका अज्ञात व्यक्तीने मुंबई विमानतळावर फोन करून विमानाच्या टॉयलेटमध्ये बॉम्ब असल्याची धमकी दिली आणि फोन कट केला.

बॉम्बची धमकी

यानंतर, मुंबई विमानतळ अधिकाऱ्यांनी तात्काळ इंडिगो विमानाच्या पायलटशी संपर्क साधून बॉम्बच्या धमकीबद्दल सांगितले. हे ऐकून पायलटला धक्का बसला आणि त्याने घाईघाईने विमान चेन्नई विमानतळावर उतरवले. काय झाले हे न कळल्याने प्रवासीही घाबरले होते.

प्रवाशांना विमानातून उतरवले

विमानातील सर्व प्रवाशांना तातडीने खाली उतरवून विमानतळावरील विश्रामगृहात थांबवण्यात आले. त्यानंतर चेन्नई विमानतळ सुरक्षा अधिकारी, बॉम्ब शोधक पथक आणि कमांडोंनी विमानाची तपासणी केली. विमानात कोणतीही संशयास्पद वस्तू न सापडल्याने ही अफवा असल्याचे स्पष्ट झाले.

चेन्नई विमानतळ

त्यानंतर विमान चेन्नईहून थायलंडसाठी रवाना झाले. विमानाला बॉम्बची धमकी देणाऱ्या अज्ञात व्यक्तीचा पोलीस शोध घेत आहेत. या घटनेमुळे चेन्नई विमानतळावर काही काळ तणावाचे वातावरण होते.