Mumbai Property Registrations : दिवाळीत मुंबईत घर खरेदीला उधाण; नोंदणी चार वर्षांच्या उच्चांकावर
सार
मुंबईत दिवाळी २०२६ च्या ११ दिवसांच्या कालावधीत ३,६८३ मालमत्तांची नोंदणी झाली. यातून सरकारला ३८४ कोटी रुपयांचा महसूल मिळाला. गेल्या चार वर्षांतील हा दिवाळीतील सर्वोच्चांक आहे.
मुंबई : मुंबईत २०२६ च्या दिवाळीत मालमत्ता नोंदणीने नवा विक्रम प्रस्थापित केला आहे. नाईट फ्रँक इंडियाच्या अहवालानुसार, ११ दिवसांच्या दिवाळीत मुंबईत ३,६८३ घरांची नोंदणी झाली. गेल्या वर्षी याच काळात ३,६६८ घरांची नोंदणी झाली होती, ज्याच्या तुलनेत यंदा ०.४ टक्के वाढ झाली आहे. या नोंदणीतून राज्याच्या तिजोरीत ३८४ कोटी रुपयांचा महसूल जमा झाला. गेल्या वर्षीच्या ३३९ कोटींच्या महसुलापेक्षा हे प्रमाण १३ टक्क्यांनी जास्त आहे.
गेल्या चार वर्षांच्या दिवाळीच्या काळातील हा सर्वात मोठा आकडा आहे. नाईट फ्रँक इंडियाचे अध्यक्ष आणि व्यवस्थापकीय संचालक शिशिर बैजल म्हणाले, "सणासुदीच्या काळात मुंबईच्या रिअल इस्टेट मार्केटमध्ये चांगलीच उलाढाल पाहायला मिळाली. नोंदणीच्या संख्येत झालेली किरकोळ वाढ पाहता घरांची विक्री स्थिर असल्याचे दिसते, मात्र महसुलातील १३ टक्के वाढ म्हणजे महागड्या घरांची जास्त विक्री झाली आहे."
२०२६ च्या दिवाळीत १ नोव्हेंबर ते ११ नोव्हेंबर दरम्यान हा ११ दिवसांचा काळ ग्राह्य धरण्यात आला, ज्यात ३ सुट्ट्या होत्या. ८ नोव्हेंबरला दिवाळी होती. याआधी २०२५ मध्ये १३ ते २३ ऑक्टोबर दरम्यान ३,६६८ नोंदणी आणि ३३९ कोटी रुपये महसूल मिळाला होता. २०२२ आणि २०२१ मधील दिवाळीच्या ११ दिवसांच्या काळात, ज्यात ४ सुट्ट्या होत्या, तेव्हा कमी नोंदणी झाली होती. २०२४ च्या दिवाळीत २४ ऑक्टोबर ते ३ नोव्हेंबर दरम्यान फक्त २,३३९ नोंदणी (३०% घट) आणि २३१ कोटी महसूल (८% घट) मिळाला होता. २०२३ मध्ये ५ ते १५ नोव्हेंबर दरम्यान ३,३४६ घरांची नोंदणी होऊन २५२ कोटींचा महसूल जमा झाला होता.
"यंदाच्या पहिल्या १० महिन्यांत नोंदणीत झालेली सातत्यपूर्ण वाढ पाहता घर खरेदीदारांचा कल अजूनही कायम आहे. मुंबईच्या गृहनिर्माण बाजारातील मागणी आणि सणांच्या काळात ती टिकवून ठेवण्याची क्षमता यातून दिसून येते," असे बैजल यांनी स्पष्ट केले. ऑक्टोबर महिन्यापासून बाजारात स्थिरता असून, १२,६९० घरांची नोंदणी झाली होती, जी ९ टक्क्यांनी अधिक आहे. जानेवारी ते ऑक्टोबर २०२६ दरम्यान एकूण १,३२,०४० घरांची नोंदणी झाली, जी ७ टक्क्यांनी अधिक आहे. पितृपक्ष आणि नवरात्रीसारख्या इतर मुहूर्तांवरही खरेदीदारांचा उत्साह कायम राहिला. २६ सप्टेंबर ते १० ऑक्टोबर या पितृपक्षात ३,४१९ घरांची नोंदणी झाली, तर ११ ते १९ ऑक्टोबर या नवरात्रीच्या काळात ४,६८० नोंदणी झाल्या.