Tiger Shroff Attack : टायगर श्रॉफवरील हल्ला, शूटर्ससाठी पोलिसांचा 'प्लॅन बी'

टायगर श्रॉफवर हल्ला करणाऱ्या तीन शूटर्सना सुरक्षित ठेवण्यासाठी मुंबई पोलिसांनी 'प्लॅन बी' राबवला आहे. सध्या हे आरोपी कोटा येथे असून, ४८ तासांच्या ट्रान्झिट रिमांडवर त्यांना पुढील तपासासाठी मुंबईला आणले जात आहे.

मुंबई : मुंबई पोलिसांनी बॉलिवूड अभिनेता टायगर श्रॉफवर हल्ला करणाऱ्या तीन शूटर्सना सुरक्षित ठेवण्यासाठी रात्री उशिरा आपला प्लॅन बदलला. या 'प्लॅन बी' नुसार, आरोपींना रातोरात मुंबईला आणण्याऐवजी राजस्थानच्या कोटा येथील रेल्वे कॉलनी पोलीस ठाण्यात ठेवण्यात आले.

कोटा रेल्वे कॉलनी पोलीस ठाण्याबाहेर सध्या कडेकोट बंदोबस्त पाहायला मिळत आहे. मुंबई गुन्हे शाखा आणि राजस्थान पोलिसांनी या परिसराला सुरक्षा कवच दिले आहे. सूत्रांनी दिलेल्या माहितीनुसार, आरोपींना सुरक्षितपणे हलवण्यासाठी मुंबई पोलिसांना 'प्लॅन बी' वापरण्याच्या सूचना मिळाल्या होत्या. त्यामुळेच त्यांना रात्रीत मुंबईला आणण्याचा बेत रद्द करून कोटा येथेच थांबवण्यात आले. आता मुंबई पोलीस लवकरच या तिन्ही आरोपींना घेऊन कोटा येथून निघण्याची शक्यता आहे. त्यांना मुंबईत कसे आणले जाईल, याबाबतची अधिक माहिती अद्याप समोर आलेली नाही. पोलीस तपासाची पुढील दिशा ठरवत असून या प्रकरणात आणखी खुलासे होण्याची शक्यता आहे.

४८ तासांचा ट्रान्झिट रिमांड मंजूर

रेल्वे कॉलनी पोलीस ठाण्याचे एसएचओ (SHO) रामस्वरूप मीना यांनी याबाबत सविस्तर माहिती दिली. त्यांनी सांगितले की, "तिन्ही आरोपींना ४८ तासांचा ट्रान्झिट रिमांड मिळाला असून महाराष्ट्र पोलीस त्यांना मुंबईला घेऊन जात आहेत. महाराष्ट्र पोलिसांचे काही अधिकारी आधीच इथे पोहोचले आहेत, तर काही जण अधिकृत हस्तांतरणाची प्रक्रिया पूर्ण करण्यासाठी येत आहेत. कालच आम्ही त्यांना ताब्यात घेतले होते. महाराष्ट्र पोलीस आणि आमच्या टीमने त्यांची चौकशी केली आहे. आता त्यांना महाराष्ट्र पोलिसांच्या ताब्यात दिले आहे. त्यांच्याकडे कोणतेही शस्त्र किंवा पैसे सापडले नाहीत." आरोपींना ट्रेनने, रस्त्याने की आणखी कोणत्या मार्गाने न्यायचे, हा निर्णय महाराष्ट्र पोलीस घेतील, असेही मीना यांनी एएनआय (ANI) शी बोलताना स्पष्ट केले.

हल्ल्याचा थरार आणि तपास

मुंबईतील जुहू परिसरात रविवारी संध्याकाळी ७ च्या सुमारास हा धक्कादायक प्रकार घडला. टायगर श्रॉफ एका फुटबॉल क्लबमधून बाहेर पडत असताना आरोपींनी त्याच्या गाडीवर गोळीबार केला. सुदैवाने या हल्ल्यात टायगर बचावला, पण त्याच्या ड्रायव्हरला दुखापत झाली. पोलिसांनी दिलेल्या माहितीनुसार, आरोपी पळून जाण्याच्या प्रयत्नात असताना त्यांना एका ट्रेनमधून पकडण्यात आले. याप्रकरणी भारतीय न्याय संहिता (BNS) च्या कलम १०९(१) आणि ३(५) सह शस्त्रास्त्र कायद्याच्या (Arms Act) कलम ३ आणि २५ अंतर्गत गुन्हा दाखल करण्यात आला आहे. पोलीस या प्रकरणाचा अधिक तपास करत आहेत.