Mumbai Crime: मुंबईत उबर ड्रायव्हरने मार्ग बदलला, दोन जण गाडीत घुसले; महिला पायलटवर रस्त्यावर थरारक प्रसंग

मुंबईत उबर कॅबमध्ये प्रवास करणाऱ्या एका महिला पायलटवर लैंगिक छळ झाल्याची धक्कादायक घटना घडली आहे. कॅब चालकाने रस्ता बदलून दोन अनोळखी पुरुषांना गाडीत घेतले आणि त्यापैकी एकाने महिलेला अश्लीलरित्या स्पर्श केला. 

मुंबईसारख्या प्रगत शहरात महिलांच्या सुरक्षेसाठी कडक कायदे, टेक्नॉलॉजी-आधारित उपाय योजना, आणि सरकारच्या विविध योजना असतानाही, महिलांवर होणारे अत्याचार थांबताना दिसत नाहीत. अशीच एक धक्कादायक आणि धक्कावणारी घटना नुकतीच मुंबईत उघडकीस आली आहे, ज्यात एका महिला पायलटवर उबर प्रवासादरम्यान थरारक प्रसंग ओढवला.

काय घडलं नेमकं?

28 वर्षांची महिला पायलट गुरुवारी रात्री 11.15 च्या सुमारास दक्षिण मुंबईतील एका रेस्टॉरंटमधून एकटीच घाटकोपरच्या दिशेने निघाली होती. तिच्या पतीने तिच्यासाठी उबर कॅब बुक केली होती. सुमारे 25 मिनिटांच्या प्रवासानंतर अचानक कॅब चालकाने रस्ता बदलला आणि त्याने दोन अनोळखी पुरुषांना गाडीत घेतलं. त्या दोघांपैकी एकाने मागच्या सीटवर महिलेच्या शेजारी येऊन बसताच तिला अश्लीलरित्या स्पर्श करण्यास सुरुवात केली.

आरडाओरड, धमकी आणि पोलीस तपासणीने वाचले प्राण

महिलेने तात्काळ विरोध करत आरडाओरड केली. तिने आरोपीला फटकारले असता त्याने तिला थेट धमकी दिली. धक्कादायक बाब म्हणजे, या संपूर्ण प्रकारात उबर ड्रायव्हर मूकदर्शक बनून सर्व पाहत होता. कोणतीही मदत किंवा हस्तक्षेप न करता! घटनेदरम्यान काही अंतरावर पुढे पोलीस तपासणी सुरू असल्याचं लक्षात येताच, ते दोघं आरोपी घाबरले आणि कॅबमधून उतरून पसार झाले.

घरी पोहचून दिली तक्रार

ही थरारक घटना घडल्यानंतर महिला कसाबसा घरी पोहचली. दुसऱ्या दिवशी सकाळी तिने ही माहिती पतीला दिली आणि दोघांनी मिळून घाटकोपर पोलीस ठाण्यात याप्रकरणी तक्रार दाखल केली. पोलीसांनी दिलेल्या माहितीनुसार, या प्रकरणात उबर चालक आणि त्या दोन्ही अज्ञात आरोपींविरोधात भारतीय न्याय संहिता कलम 75(1) (लैंगिक छळ), 351(2) (गुन्हेगारी धमकी) आणि 3(5) (सामान्य हेतू) अंतर्गत गुन्हा दाखल करण्यात आला आहे.

पोलीस तपास सुरु, आरोपींचा शोध घेतला जातोय

घटनेचं गांभीर्य लक्षात घेता, पोलिसांनी तत्काळ तपास सुरू केला असून आरोपींचा शोध सुरू आहे. उबर चालकाचीही चौकशी करण्यात येत आहे. यासोबतच, महिलांच्या सुरक्षेसाठी अ‍ॅप-आधारित कॅब सेवा किती विश्वासार्ह आहेत? हा प्रश्न पुन्हा एकदा ऐरणीवर आला आहे.

महिलांसाठी सुरक्षित मानल्या जाणाऱ्या अ‍ॅप-बेस्ड टॅक्सी सेवा जर अशा प्रकारे धोका ठरू लागल्या, तर लोकांनी कोणावर विश्वास ठेवायचा? महिला पायलटवर घडलेली ही घटना समाजातील असंवेदनशीलतेचं आणि अपयशाचं भयावह चित्र समोर आणते. आता पाहावं लागेल की, पोलीस आणि प्रशासन या प्रकरणात कितपत कडक पावलं उचलतात.