Mumbai Local : लोकल ट्रेनमध्ये भाजीपाल्याची विक्री; व्हायरल व्हिडीओनंतर रेल्वे प्रशासनावर प्रश्न (Watch Video)
सार
Mumani Local : मुंबई लोकल ट्रेनमधला एक व्हिडिओ सध्या व्हायरल झालाय. यात भाजी विक्रेते चक्क डब्यातच जमिनीवर बसून भाजी विकताना दिसत आहेत. यामुळे प्रवाशांना येण्या-जाण्यास त्रास होत असून, रेल्वे प्रशासनाच्या कारवाईवर प्रश्नचिन्ह निर्माण झालं आहे.
Mumbai Local : मुंबई लोकल ट्रेनमधला एक व्हिडिओ सध्या सोशल मीडियावर तुफान व्हायरल झालाय. या व्हिडिओमध्ये अनेक भाजी विक्रेते मुंबई लोकलच्या डब्यातच जमिनीवर बसून भाजी विकताना दिसत आहेत. त्यांनी प्रवाशांच्या येण्या-जाण्याच्या जागेवरच आपला माल पसरला असून, जणू काही डब्यालाच भाजी मार्केटचं स्वरूप आलं आहे.
भाजीवाल्यांनी जागा अडवल्यामुळे प्रवाशांना डब्यातून फिरायलाही जागा नव्हती. विक्रेते मात्र आरामात आपला धंदा करत होते आणि प्रवाशांना भाजी विकत होते. देशातील सर्वात व्यस्त रेल्वे नेटवर्कपैकी एक असलेल्या मुंबई लोकलमधला हा प्रकार पाहून अनेकांनी तीव्र नाराजी व्यक्त केली आहे. इतक्या गर्दीच्या ठिकाणी असं काही करण्याची परवानगी कशी काय दिली जाते, असा सवाल लोक विचारत आहेत.
विक्रेत्यांनी ट्रेनलाच बनवलं भाजी मार्केट
व्हिडिओमध्ये स्पष्ट दिसतंय की, विक्रेत्यांनी येण्या-जाण्याची संपूर्ण जागा अडवली आहे, ज्यामुळे प्रवाशांना चालणंही मुश्किल झालं आहे. आधीच गर्दीने खचाखच भरलेल्या लोकलमध्ये या प्रकारामुळे प्रवाशांनी संताप व्यक्त केला आहे.
Good to see vegetables are sold in Train.
Makes life easier for people, they don't have to go to market for this, saves time and effort. pic.twitter.com/WZK9wJhlco— Woke Eminent (@WokePandemic) June 2, 2026
सोशल मीडियावर यावर वेगवेगळ्या प्रतिक्रिया येत आहेत. काहींनी या प्रकाराला धोकादायक आणि त्रासदायक म्हटलं आहे. तर दुसरीकडे, काही जणांनी भाजीवाल्यांची बाजू घेतली आहे. माल वाहून नेण्यासाठी कोणतीही वेगळी सोय नसल्यामुळे त्यांना असं करावं लागतं, असं काहींचं म्हणणं आहे.या व्हिडिओमुळे मुंबईच्या उपनगरीय रेल्वे प्रणालीतील सुरक्षेचा आणि नियमांच्या अंमलबजावणीचा मुद्दा पुन्हा एकदा चर्चेत आला आहे. रेल्वे प्रशासनाने याआधीही ट्रेनमध्ये अशा अनधिकृत गोष्टींवर बंदी घातली होती, पण तरीही असे प्रकार वारंवार घडत आहेत. अधिकारी या व्हिडिओची पाहणी करून संबंधितांवर कारवाई करायची की नाही, याचा निर्णय घेतील असं समजतंय. भविष्यात असे प्रकार टाळण्यासाठी अधिक कडक देखरेखीची मागणीही जोर धरू लागली आहे.