Mumbai Local Update : बदलणार प्रवास! मुंबई लोकलसाठी केंद्र सरकारचा मेगा प्लॅन, आता लोकल कशी धावणार? वाचा; प्रत्येक मुंबईकरासाठी महत्त्वाची बातमी!

Mumbai Local Update : मुंबई लोकलच्या वाढत्या गर्दी आणि अपघातांच्या पार्श्वभूमीवर केंद्र सरकारने मोठा निर्णय घेतला आहे. रेल्वे मंत्री अश्विनी वैष्णव यांनी स्वयंचलित दरवाजे असलेल्या दोन नॉन-एसी लोकल तयार होत असल्याची घोषणा केली आहे.

मुंबई लोकलसाठी केंद्र सरकारचा मोठा प्लान!

Mumbai Local News : मुंबई उपनगरीय रेल्वे ही शहराची जीवनवाहिनी मानली जाते. मात्र वाढती गर्दी, अपघातांची मालिका आणि प्रवाशांच्या सुरक्षिततेचा प्रश्न दिवसेंदिवस गंभीर होत चालला आहे. दररोज 60 लाखांहून अधिक प्रवासी मध्य आणि पश्चिम रेल्वेच्या सुमारे 3 हजार लोकल फेऱ्यांमधून प्रवास करतात. अशा परिस्थितीत, मुंब्रा स्थानकाजवळील दुर्घटनेनंतर लोकल प्रवासाच्या सुरक्षिततेबाबत पुन्हा एकदा तीव्र चिंता व्यक्त केली जात आहे. या पार्श्वभूमीवर केंद्र सरकारने मुंबई लोकलसंदर्भात महत्त्वाचा आणि दूरगामी निर्णय घेतला आहे. 

स्वयंचलित दरवाज्यांच्या नॉन-एसी लोकल येणार

रेल्वे मंत्री अश्विनी वैष्णव यांनी लोकसभेत माहिती देताना सांगितले की, स्वयंचलित दरवाजे असलेल्या दोन नॉन-एसी लोकल ट्रेन रेकची निर्मिती चेन्नईतील इंटेग्रल कोच फॅक्टरी (ICF) येथे सुरू आहे. 3 डिसेंबर रोजी खासदार वर्षा गायकवाड आणि संजय दिना पाटील यांनी लोकलमधील गर्दी व अपघातांबाबत प्रश्न उपस्थित केला होता. त्यावर उत्तर देताना रेल्वे मंत्र्यांनी हा महत्त्वाचा खुलासा केला. 

नव्या लोकलमध्ये काय असणार विशेष?

या नव्या ईएमयू (EMU) लोकल रेकमध्ये प्रवाशांच्या सुरक्षितता आणि सोयीसाठी अनेक आधुनिक सुविधा देण्यात येणार आहेत.

स्वयंचलित बंद दरवाजे

दोन डब्यांमधील वेस्टिब्युल जोडणी

छतावर विशेष व्हेंटिलेशन युनिट

दरवाजांजवळ हवेच्या वहनासाठी झडपयुक्त खिडक्या

रेल्वेच्या मते, या सुविधा नॉन-एसी लोकल असूनही प्रवाशांना अधिक सुरक्षित आणि तुलनेने आरामदायी प्रवासाचा अनुभव देतील. 

जुन्या लोकलमध्ये बदल शक्य नाही

दरम्यान, मध्य रेल्वेने यापूर्वी कुर्ला कारशेडमध्ये एका लोकल रेकवर स्वयंचलित दरवाज्यांचा प्रायोगिक प्रयोग केला होता. या रेकच्या चाचण्या घेण्यात आल्या आणि महाव्यवस्थापकांनी त्याची पाहणीही केली होती. मात्र तांत्रिक अडचणींमुळे सध्या धावणाऱ्या साध्या लोकल गाड्यांमध्ये स्वयंचलित दरवाजे बसवणे शक्य नसल्याचे रेल्वेने स्पष्ट केले आहे. त्यामुळे ही सुविधा नव्या लोकल रेकमधूनच लागू केली जाणार आहे. 

पुढील 5 वर्षांत 238 एसी लोकल

याशिवाय, पुढील पाच वर्षांत मुंबई उपनगरीय रेल्वेसाठी 238 नव्या वातानुकूलित (AC) लोकल गाड्या टप्प्याटप्प्याने खरेदी केल्या जाणार असल्याची माहिती रेल्वे प्रशासनाने दिली आहे. या निर्णयाला काही प्रवासी संघटनांचा विरोध असला तरी, सुरक्षित, आधुनिक आणि शिस्तबद्ध प्रवासाच्या दृष्टीने हा निर्णय अत्यंत महत्त्वाचा मानला जात आहे.