मीरा-भाईंदरमध्ये ‘झोम्बी ड्रग’ची भीती; व्हायरल व्हिडिओनंतर नागरिकांमध्ये चिंता

मीरा-भाईंदरमध्ये ‘झोम्बी ड्रग’च्या संशयामुळे खळबळ उडाली आहे. भाईंदर पश्चिमेतील व्हायरल व्हिडिओनंतर नागरिकांनी अमली पदार्थांच्या विक्रीविरोधात कारवाईची मागणी केली असून प्रशासनाकडून अद्याप अधिकृत प्रतिक्रिया आलेली नाही.

Zombie Drug in Mumbai : बंगळूर, बिहार आणि चंदीगडनंतर आता मीरा-भाईंदरमध्येही तथाकथित ‘झोम्बी ड्रग’चा धोका निर्माण झाल्याची चर्चा रंगली आहे. भाईंदर पश्चिमेतील एका व्हायरल व्हिडिओमुळे नागरिकांमध्ये भीतीचे वातावरण निर्माण झाले असून सार्वजनिक सुरक्षेबाबत गंभीर प्रश्न उपस्थित झाले आहेत.

व्हिडिओमुळे खळबळ

‘जेम्स ऑफ एमबीएमसी’ या इंस्टाग्राम हँडलवर शेअर करण्यात आलेल्या व्हिडिओमध्ये भाईंदर पश्चिमेतील ९० फूट रोडवर एक व्यक्ती अत्यंत विचित्र आणि निश्चल अवस्थेत उभी असल्याचे दिसते. संबंधित व्यक्ती अज्ञात पदार्थाच्या प्रभावाखाली असल्याचा संशय व्यक्त केला जात आहे.

‘झोम्बी ड्रग’ म्हणजे काय?

पोस्टमध्ये नमूद केल्याप्रमाणे, ‘झोम्बी ड्रग’ ही संज्ञा अशा अंमली पदार्थांसाठी वापरली जाते, जे व्यक्तीला अत्यंत सुस्त, मंद हालचाल करणारे आणि प्रतिसादशून्य बनवतात. अशा स्थितीत व्यक्तीला स्वतःवर नियंत्रण ठेवणे कठीण होते.

नागरिकांची संतप्त प्रतिक्रिया

व्हिडिओ व्हायरल झाल्यानंतर सोशल मीडियावर संतप्त प्रतिक्रिया उमटल्या आहेत. अनेकांनी परिसरात उघडपणे अमली पदार्थांची विक्री होत असल्याचा आरोप केला असून पोलिसांनी तातडीने हस्तक्षेप करावा, अशी मागणी केली आहे.

अंमली पदार्थ विक्रीचे आरोप

काही युजर्सनी जांगिड कॉम्प्लेक्स सर्कल परिसरात रात्री उशिरा खुलेआम ड्रग्ज विक्री होत असल्याचा दावा केला आहे. “पुढील पिढीवर परिणाम होण्यापूर्वी प्रशासनाने कठोर कारवाई करावी,” अशी मागणी नागरिकांनी केली आहे.

प्रशासनाची प्रतिक्रिया प्रतीक्षेत

या प्रकरणात नेमक्या कोणत्या पदार्थाचा वापर झाला आहे, याबाबत अद्याप अधिकृत माहिती समोर आलेली नाही. तसेच पोलिस किंवा प्रशासनाकडून कोणतेही अधिकृत निवेदन आलेले नसून नागरिकांनी तातडीने कारवाई करण्याचे आवाहन केले आहे.