Mumbai Firecracker Ban : मुंबईत रॉकेट फटाक्यांवर 9 ते 25 नोव्हेंबरपर्यंत बंदी

बृहन्मुंबई महानगरपालिकेने मुंबईतील दाट लोकवस्ती आणि उंच इमारतींच्या भागात आगीच्या दुर्घटना टाळण्यासाठी ९ नोव्हेंबर ते २५ नोव्हेंबर २०२६ या कालावधीत रॉकेट उडवण्यावर अधिकृतपणे बंदी घातली आहे.

मुंबई : बृहन्मुंबई महानगरपालिका क्षेत्रात सार्वजनिक सुरक्षेचा उपाय म्हणून रॉकेट आणि तत्सम फटाक्यांच्या वापरावर प्रतिबंधात्मक बंदी घालण्यात येत असल्याचे बीएमसीने सोमवारी सांगितले. गेल्या दोन दिवसांत मुंबई शहर आणि उपनगरात फटाक्यांमुळे आगी लागल्याच्या अनेक घटना समोर आल्याचे बीएमसीने म्हटले आहे. "विशेषतः, रॉकेट आणि तत्सम फटाके जवळच्या इमारतींच्या छतांवर, बाल्कनी आणि खिडक्यांवर, तसेच ज्वालाग्राही पदार्थांवर पडून आग लागण्याची शक्यता असते."

सुरक्षा आदेशामागील कारण

स्थानिक स्वराज्य संस्थेने सांगितले की, मुंबईतील दाट लोकसंख्या, उंच इमारती, झोपडपट्टी भाग, अरुंद रस्ते आणि मोठ्या संख्येने असलेल्या निवासी आणि व्यावसायिक इमारतींचा विचार करून हा निर्णय घेण्यात आला आहे. बृहन्मुंबई शहर आपत्ती व्यवस्थापन प्राधिकरणाने दिलेल्या सूचनेनुसार, ही बंदी निवासी इमारती, गच्ची, बाल्कनी, अंगण, पार्किंग, झोपडपट्टी भाग आणि इतर सर्व परिसरांना लागू असेल.

हा आदेश ९ नोव्हेंबर २०२६ ते २५ नोव्हेंबर २०२६ रोजी रात्री ११.५९ वाजेपर्यंत लागू राहील. या आदेशाच्या प्रभावी अंमलबजावणीसाठी संबंधित परिमंडळ पोलीस उपायुक्त, महानगरपालिकेच्या प्रशासकीय विभागांचे (वॉर्ड कार्यालये) सहायक आयुक्त आणि प्रमुख अग्निशमन अधिकारी यांना आवश्यक कार्यवाही करण्याचे निर्देश बीएमसीने दिले आहेत. स्वतःच्या आणि इतरांच्या सुरक्षेचा विचार करून नागरिकांनी या आदेशाचे काटेकोरपणे पालन करावे, असे आवाहन बृहन्मुंबई महानगरपालिका प्रशासनाने केले आहे.