Blinkit Delivery Boy : ऑनलाइन जुगाराच्या नादात ब्लिंकिटचा डिलिव्हरी बॉय बनला चेन स्नॅचर, 8 लाखांचं सोनं जप्त

ऑनलाइन जुगाराचे व्यसन पूर्ण करण्यासाठी एका २४ वर्षीय ब्लिंकिट डिलिव्हरी बॉयने चक्क महिलांच्या गळ्यातील सोनसाखळ्या चोरण्यास सुरुवात केली. पोलिसांनी त्याला अटक केली असून त्याच्याकडून लाखो रुपयांचे सोने जप्त केले आहे.

मुंबई : ऑनलाइन जुगाराच्या नादात एका २४ वर्षीय ब्लिंकिट डिलिव्हरी बॉयने चक्क चेन स्नॅचिंगचा मार्ग पत्करल्याचा धक्कादायक प्रकार समोर आला आहे. ड्युटी संपल्यानंतर तो रस्त्यावरून जाणाऱ्या महिलांना टार्गेट करायचा. वाशीमध्ये पुढील शिकार शोधत असताना गुन्हे शाखा युनिट-१ च्या दोन कॉन्स्टेबलनी त्याला रंगेहाथ पकडले. कुमार बाबू चव्हाण असे या आरोपीचे नाव असून तो कोपरखैरणे येथील बोनकोडे भागात राहतो. न्यायालयाने त्याला १ ऑक्टोबरपर्यंत पोलीस कोठडी सुनावली आहे.

या प्रकरणात पोलिसांनी कोपरखैरणे येथील ३३ वर्षीय सराफ जगदीशचंद्र रामचंद्र कुमावत यालाही सहआरोपी बनवले आहे. चव्हाणकडून चोरीचे दागिने विकत घेतल्याचा त्याच्यावर आरोप आहे.

पोलिसांनी दिलेल्या माहितीनुसार, चव्हाणच्या अटकेमुळे चेन स्नॅचिंगचे तब्बल आठ गुन्हे उघडकीस आले आहेत. यामध्ये सानपाडा येथील पाच, वाशीतील दोन आणि कोपरखैरणे येथील एका गुन्ह्याचा समावेश आहे. पोलिसांनी त्याच्याकडून ६८.८४ ग्रॅम वजनाचे आठ सोन्याचे मंगळसूत्र आणि साखळ्या जप्त केल्या आहेत. या दागिन्यांची किंमत सुमारे ७.९२ लाख रुपये आहे. तसेच, गुन्ह्यात वापरलेली ५० हजार रुपये किमतीची स्कूटीही जप्त करण्यात आली आहे.

गुन्हे शाखा युनिट-१ चे वरिष्ठ पोलीस निरीक्षक विकास घोडके यांनी सांगितले की, चव्हाणला मोबाईलवर ऑनलाइन जुगार खेळण्याचे भयंकर व्यसन होते. जुगारात पैसे हरल्यानंतर त्याने महिलांच्या गळ्यातील सोन्याच्या साखळ्या आणि मंगळसूत्र चोरण्यास सुरुवात केली. चोरीचे दागिने तो सराफ कुमावतला विकायचा आणि त्यातून मिळालेले पैसे पुन्हा जुगारात लावायचा. हरलेले पैसे वसूल करून नफा कमवण्याच्या नादात तो या गुन्हेगारीच्या जाळ्यात अडकत गेला. पोलिसांनी या संपूर्ण प्रकाराचे वर्णन 'चोरी-ऑनलाइन जुगार-पैसे हरणे-पुन्हा चोरी' असे केले आहे.

एसीपी (गुन्हे) भाऊसाहेब ढोले यांनी सांगितले की, “सानपाडा, कोपरखैरणे आणि वाशी परिसरात चेन स्नॅचिंगच्या घटना वाढल्याने गुन्हे शाखा युनिट-१ कडे याचा समांतर तपास सोपवण्यात आला होता. आमच्या पथकांनी गुन्ह्याच्या ठिकाणांची आणि आरोपीच्या पळून जाण्याच्या मार्गांची बारकाईने पाहणी केली. अनेक सीसीटीव्ही फुटेज तपासल्यानंतर संशयिताची ओळख पटली.”

"२५ सप्टेंबर रोजी संध्याकाळी ६.४० च्या सुमारास वाशीतील सेक्टर ७ मध्ये हा संशयित त्याच्या राखाडी रंगाच्या स्कूटीवर हेल्मेट घालून फिरताना दिसला. कॉन्स्टेबल चंद्रकांत कदम आणि सागर सोनवलकर यांनी त्याला थांबण्याचा इशारा केला, तेव्हा त्याने पळून जाण्याचा प्रयत्न केला. मात्र, पोलिसांनी त्याचा रस्ता अडवून त्याला शिताफीने पकडले. त्याने सुटण्याचा खूप प्रयत्न केला, पण पोलिसांनी त्याला ताब्यात घेऊन वाशी पोलीस ठाण्यात आणले." चव्हाणने आणखी किती गुन्हे केले आहेत आणि सराफाकडून आणखी किती चोरीचे दागिने हस्तगत करायचे आहेत, याचा पुढील तपास पोलीस करत आहेत.