भाजप म्हणतंय '50 खोके एकदम ओके', एकनाथ शिंदेंची मात्र चक्रावून टाकणारी प्रतिक्रिया!

BJP leader criticized Eknath Shinde led Shiv Sena : चेंबूरमध्ये भाजप कार्यकर्त्यांनी मित्रपक्ष असलेल्या शिंदे गटाच्या उमेदवाराविरोधात '५० खोके एकदम ओके'च्या घोषणा दिल्या आहेत. या अनपेक्षित प्रकारामुळे महायुतीमध्ये मोठी खळबळ उडालीआहे.

BJP leader criticized Eknath Shinde led Shiv Sena : मुंबई महानगरपालिकेच्या सत्तेचा सोपान सर करण्यासाठी राजकीय पक्षांनी कंबर कसली आहे. मात्र, चेंबूरच्या वॉर्ड क्रमांक १७३ मध्ये जे घडले, त्याने 'मैत्रीपूर्ण लढत' म्हणजे नक्की काय, याचा नवाच अंक महाराष्ट्राला पाहायला मिळाला आहे. आतापर्यंत ठाकरे गटाकडून ज्या '५० खोके'च्या घोषणांनी शिंदे गटाची पाठ सोडली नव्हती, त्याच घोषणांचा आवाज आता चक्क भाजपच्या गोटातून आल्याने युतीच्या गोटात मोठी खळबळ उडाली आहे.

जेव्हा मित्रच बनतो 'आरसा'

राजकारणात शत्रूचा शत्रू तो मित्र असतो, पण इथे मित्रानेच शत्रूचे अस्त्र बाहेर काढले आहे. चेंबूरमध्ये शिंदे गटाच्या पूजा कांबळे आणि भाजपच्या शिल्पा केळुस्कर यांच्यात लढत आहे. प्रचाराच्या धुमश्चक्रीत दोन्ही गटांचे कार्यकर्ते समोरासमोर आले आणि अचानक '५० खोके एकदम ओके'च्या घोषणा घुमू लागल्या. धक्कादायक म्हणजे या घोषणा भाजप कार्यकर्त्यांनी दिल्या होत्या. ज्या घोषणांवरून शिंदे गट गेल्या दीड-दोन वर्षांपासून संतप्त होत होता, त्याच घोषणा मित्रपक्षाने दिल्याने शिंदे गटाच्या कार्यकर्त्यांचा संताप अनावर झाला.

'५० नाही, ११ खोके': केळुस्करांचा नवा वार

घोषणा देणारे भाजपचे दत्ता केळुस्कर यांनी तर या वादाला वेगळंच वळण दिलं आहे. "आमच्या तोंडातून चुकीचे शब्द निघाले, ५० नाही तर ११ खोके म्हणायला हवे होते," असे म्हणत त्यांनी थेट उमेदवाराच्या प्रतिज्ञापत्रातील संपत्तीवरच बोट ठेवले. "११ कोटींची जंगम मालमत्ता आली कुठून?" असा सवाल विचारत त्यांनी हा वाद वैयक्तिक पातळीवर नेला आहे. तिकीट वाटपावरून असलेली नाराजी या निमित्ताने चव्हाट्यावर आली आहे.

नेत्यांची सावध 'बॅटिंग'

या प्रकरणावर मुख्यमंत्री एकनाथ शिंदे यांनी नेहमीप्रमाणे संयमी भूमिका घेत "आम्ही ताकदीने लढत आहोत," असे सांगून वादावर पडदा टाकण्याचा प्रयत्न केला. मात्र, दुसरीकडे शिवसेनेचे नेते संजय शिरसाट यांनी आक्रमक पवित्रा घेतला. "घोषणा देण्यापूर्वी आपल्या नेत्यांना (देवेंद्र फडणवीस) विचारा," असा सल्ला देत त्यांनी भाजप कार्यकर्त्यांना घरचा आहेर दिला आहे.

१५ जानेवारीला फैसला

मुंबई महापालिकेच्या २९ जागांसाठी येत्या १५ जानेवारीला मतदान होणार आहे. पण मतदानापूर्वीच युतीमधील ही अंतर्गत धुसफूस विरोधकांसाठी आयते कोलीत ठरत आहे. 'फ्रेंडली फाईट'च्या नावाखाली सुरू असलेला हा 'खोके' ड्रामा मतदारांच्या मनावर काय परिणाम करतो, हे १६ जानेवारीच्या निकालातच स्पष्ट होईल.

चेंबूरची ही घटना केवळ एका वॉर्डपुरती मर्यादित नसून, ती महायुतीमधील कार्यकर्त्यांच्या स्तरावर असलेल्या अविश्वासाचे दर्शन घडवते. वरच्या पातळीवर नेते जरी 'ऑल इज वेल' म्हणत असले, तरी जमिनीवर मात्र 'खोक्यां'चं राजकारण अजूनही धगधगत आहे.