Gen Z: 'या पिढीने सरकारला गुडघ्यावर आणलं', उद्धव ठाकरेंचा केंद्रावर हल्लाबोल

शिवसेना (UBT) पक्षप्रमुख उद्धव ठाकरे यांनी विद्यार्थ्यांवरील पोलीस कारवाईची तुलना जालियनवाला बाग हत्याकांडाशी केली आहे. 'Gen Z' ने केंद्र सरकारला 'गुडघ्यावर' आणलं आहे, असा दावाही त्यांनी केला. तसेच, पंतप्रधान मोदी 'गद्दारांना' भेटतात पण विद्यार्थ्यांना नाही, अशी टीकाही त्यांनी केली.

शिवसेना (UBT) पक्षप्रमुख उद्धव ठाकरे यांनी शनिवारी केंद्र सरकारवर जोरदार हल्ला चढवला. त्यांनी विद्यार्थी आंदोलकांवरील कथित पोलीस कारवाईची तुलना थेट "जालियनवाला बाग" हत्याकांडाशी केली आणि दावा केला की "Gen Z" ने केंद्र सरकारला "गुडघ्यावर आणले आहे."

'जालियनवाला बागसारखी दडपशाही'

माध्यमांशी बोलताना माजी मुख्यमंत्री म्हणाले की, प्रशासनाने तरुणांच्या आकांक्षांवर "अत्यंत निर्दयी कारवाई" करून उत्तर दिलं. "सध्या Gen Z ने सरकारला कसं गुडघ्यावर आणलं, याची चर्चा सुरू आहे. पण या पिढीला पाठिंबा देण्याऐवजी, त्यांच्यावर अत्यंत निर्दयीपणे दडपशाही करण्यात आली... देशात हे काय चाललंय?... तरुण पिढीवर जालियनवाला बागसारखा लाठीचार्ज आणि पेलेट गनचा वापर होतोय? आज संपूर्ण देश आणि विरोधक पंतप्रधान आणि गृहमंत्र्यांना जाब विचारत आहेत की, 'तुम्ही तरुणांवर हे अत्याचार का करत आहात?' पण पंतप्रधान बोलायला तयार नाहीत आणि गृहमंत्र्यांमध्ये हिंमत नाही! ही संपूर्ण सिस्टीमच बदलायला हवी," असं ठाकरे म्हणाले.

'पंतप्रधान गद्दारांना भेटतात, तरुणांना नाही'

पंतप्रधानांच्या निवडक भेटीगाठींवर टीका करताना ठाकरे म्हणाले की, सर्वोच्च नेतृत्त्वाला राजकीय पक्ष बदलणाऱ्यांसाठी वेळ आहे, पण आंदोलन करणाऱ्या तरुणांना भेटायला वेळ नाही. "पंतप्रधान 'गद्दारांना' भेटत आहेत, पण तरुण पिढीला नाही. शिवसेनेचे गद्दार खासदार पंतप्रधानांना भेटायला गेले... न्यायासाठी आणि हक्कांसाठी आंदोलन करणाऱ्या तरुणांना भेटायला तुमच्याकडे वेळ नाही का? आणि तुम्ही निर्लज्जपणे त्या गद्दारांना भेटून 'मी तुमच्यासोबत आहे' असं सांगता?" असा सवाल ठाकरेंनी केला. "मोदी या गद्दारांना सांगतात 'घाबरू नका, मी तुमच्यासोबत आहे.' हेच वाक्य तरुणांना सांगायला हवं होतं, पण पंतप्रधानांना या विद्यार्थ्यांच्या प्रश्नांना उत्तर द्यायला वेळ नाही," असंही ते म्हणाले.

'इन्स्टाग्राम सरकार'

सध्याच्या सरकारला 'इन्स्टाग्राम सरकार' संबोधत त्यांनी नेतृत्त्व आणि विद्यार्थ्यांमध्ये असलेल्या अंतरावर प्रश्नचिन्ह उपस्थित केलं. "पंतप्रधान मध्यरात्री तरुणांना भेटत नाहीत... म्हणून ते इन्स्टाग्रामवर मेसेज पाठवतात. मी जेव्हा फेसबुक लाईव्ह करायचो, तेव्हा मला उपदेश दिला जायचा, आणि आता यांना इन्स्टाग्रामवर सरकार चालवावं लागतंय. काँग्रेस जे करू शकली नाही, ते यांनी केलं... काँग्रेसलाही कधी इतके टोमणे ऐकावे लागले नसतील," असं ते पुढे म्हणाले.

'तरुण संतप्त, RSS चंही ऐकत नाहीत: ठाकरे'

RSS प्रमुख मोहन भागवत यांनी Gen Z पर्यंत पोहोचण्याच्या केलेल्या प्रयत्नावरही ठाकरेंनी भाष्य केलं. ते म्हणाले की, तरुण पिढी आता RSS नेतृत्वाचं ऐकण्याच्या मनस्थितीत नाही. "मोहन भागवत यांचं ऐकायला तरुण पिढी तयार नाही. त्यांचा संवाद ऐकल्यानंतर विद्यार्थी काय उत्तरं देत आहेत, हे आम्ही ऐकलं आहे," असं शिवसेना (UBT) नेते म्हणाले. "देशातील तरुण आता संतप्त झाला आहे आणि मोदींनी कितीही प्रयत्न केले तरी तो त्यांचं ऐकायला तयार नाही," असंही त्यांनी जोडलं.

केंद्रीय गृहमंत्री अमित शाह यांच्याविरोधात विरोधी पक्षांनी आघाडी उघडली आहे. कॉकरोच जनता पार्टीच्या (CJP) नेतृत्वाखाली २० जुलै रोजी झालेल्या मोर्चादरम्यान दिल्ली पोलिसांनी आंदोलकांवर लाठीचार्ज आणि पेलेट गनचा वापर केल्याचा आरोप आहे. याच पार्श्वभूमीवर उद्धव ठाकरे यांनी ही विधानं केली आहेत. (ANI)