दु:खावर दु:ख! वडिलांच्या अंत्यविधीनंतर परतीच्या वाटेवर मुलाचाही अपघातात मृत्यू, सोलापुरातील हृदयद्रावक घटना

सोलापूर जिल्ह्यातील वरकुटे गावाजवळ वडिलांच्या अंत्यविधीनंतर परतणाऱ्या ३५ वर्षीय हर्षद झंकर यांचा अपघातात दुर्दैवी मृत्यू झाला. या अपघातात चार जण गंभीर जखमी झाले असून, त्यातील दोघांची प्रकृती चिंताजनक आहे.

सोलापूर: कधी-कधी काळाची फेरी इतकी क्रूर असते की दुःखाचं दुसरं पर्व लगेचच दार ठोठावून जातं. अशीच एक शोकांतिक घटना सोलापूर जिल्ह्यातील वरकुटे गावाजवळ घडली आहे, जिथे वडिलांच्या अंत्यविधीनंतर परतणाऱ्या ३५ वर्षीय हर्षद झंकर यांचा अपघातात दुर्दैवी मृत्यू झाला. ही घटना करमाळा-कुर्डुवाडी रस्त्यावर आज पहाटे साडेचारच्या सुमारास घडली. या अपघातात चार जण गंभीर जखमी झाले असून, त्यातील दोघांची प्रकृती चिंताजनक आहे. या घटनेमुळे संपूर्ण परिसरात हळहळ व्यक्त केली जात आहे.

एक पाठोपाठ एक दुःख, झंकर कुटुंबावर काळाचा घाला

गुजरातमधील झंकर योगी कुटुंब काही दिवसांपूर्वी बंगळुरू येथे कामानिमित्त गेले होते. प्रवासादरम्यान झंकर यांचा रेल्वेतून पडून मृत्यू झाला. त्यांच्या मृतदेहावर अंत्यसंस्कार करण्यासाठी संपूर्ण कुटुंब करमाळा येथे आले होते. अंत्यविधी आटोपून सर्वजण परतीच्या प्रवासाला निघाले होते, मात्र वरकुटे गावाजवळ वाहन झाडावर आदळले आणि या भीषण अपघातात झंकर यांचे ज्येष्ठ पुत्र हर्षद झंकर यांचा जागीच मृत्यू झाला.

गंभीर जखमी चार जण, उपचार सुरू

अपघातात अन्य चार जणही गंभीर जखमी झाले आहेत. करमाळा येथील उपजिल्हा रुग्णालयात त्यांच्यावर तात्काळ उपचार सुरू करण्यात आले. दोन जणांची प्रकृती चिंताजनक असल्याची माहिती पोलिसांनी दिली आहे.

ग्रामस्थांची मदत आणि पोलीस यंत्रणा तत्पर

अपघाताची माहिती मिळताच ग्रामस्थांनी घटनास्थळी धाव घेऊन पोलिसांना माहिती दिली. स्थानिक नागरिकांच्या मदतीने जखमींना गाडीतून बाहेर काढण्यात आले व रुग्णालयात दाखल करण्यात आले. एकाच कुटुंबावर थोड्याच तासांच्या अंतराने दोन जीवघेणे आघात झाल्याने झंकर कुटुंब आणि परिसरात शोककळा पसरली आहे. या हृदयद्रावक घटनेने अनेकांना भावुक केलं असून, काळ किती अनिश्चित आणि बेभरवशी असतो याची जाणीव पुन्हा एकदा झाली आहे.