"मराठीसाठी आवाज उठवणं हीच खरी ताकद!", राज ठाकरेंनी खासदार वर्षा गायकवाड यांचं केलं कौतुक

उत्तर भारतीय खासदाराच्या वक्तव्यावरून वर्षा गायकवाड यांनी संसदेत घेतलेल्या भूमिकेचे राज ठाकरेंनी कौतुक केले आहे. इतर खासदारांच्या मौन भूमिकेवरही त्यांनी प्रश्न उपस्थित केले आहेत. 

मुंबई : उत्तर भारतातील खासदाराने मराठी जनतेबाबत केलेल्या आक्षेपार्ह वक्तव्यावर महाराष्ट्रातील काही खासदारांनी संसदेत जाब विचारत ठाम भूमिका घेतली. या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी काँग्रेसच्या खासदार वर्षा गायकवाड यांचं विशेष कौतुक करत त्यांना पत्र पाठवलं आहे.

राज ठाकरेंनी पत्रात म्हटलं आहे की, "मराठी माणसांना पटक पटक करून मारू", अशी वक्तव्य करणाऱ्या निशिकांत दुबे यांना संसदेत घेरणं ही केवळ प्रतिक्रिया नाही, ती एक सहनशीलतेच्या मर्यादेची टोचणी आहे. वर्षा गायकवाड आणि इतर काही खासदारांनी दिल्लीत उभं केलेलं हे चित्र महाराष्ट्रासाठी एक स्फूर्तीदायी उदाहरण असल्याचं राज ठाकरेंनी नमूद केलं.

"इतर ४५ खासदार गप्प का बसले, माहित नाही", राज ठाकरेंचा सवाल

राज ठाकरे म्हणतात, "महाराष्ट्राचे प्रतिनिधित्व करणारे इतर ४५ खासदार या मुद्द्यावर गप्प का होते, हे कळत नाही. पण, तुमची ही कृती म्हणजे मराठी अस्मितेच्या रक्षणासाठी उचललेलं ठोस पाऊल आहे." ते पुढे म्हणतात, "देशाच्या प्रगतीचा विचार करणं महत्त्वाचं आहे, पण तो करताना आपल्या भाषेचा, आपल्या माणसाचा अपमान सहन करणं हे कधीही योग्य नाही. १८५७ च्या उठावात आणि स्वातंत्र्यलढ्याच्या मुळाशी मराठ्यांचं योगदान आहे, हे विसरता कामा नये."

पत्रातील महत्त्वाचे मुद्दे थोडक्यात

उत्तर भारतातील खासदाराच्या मराठीविरोधी वक्तव्यावर संसदेत जाब विचारल्याबद्दल राज ठाकरेंकडून वर्षा गायकवाड यांचं अभिनंदन.

"मराठी भाषेच्या रक्षणासाठी मतभेद बाजूला ठेवून एकत्र येणं ही काळाची गरज आहे."

इतर गप्प बसलेल्या खासदारांवर अप्रत्यक्ष टोला.

महाराष्ट्र, मराठी भाषा आणि मराठी माणसाच्या सन्मानासाठी सतत जागरूक राहण्याचं आवाहन.

उद्धव – राज ठाकरेंची भाषेसाठी एकत्र भूमिका

याच विषयाच्या पार्श्वभूमीवर उद्धव ठाकरे आणि राज ठाकरे यांनी एकत्रितपणे भाषेच्या मुद्द्यावर भूमिका घेतली, हे मराठी जनतेसाठी एक सकारात्मक संकेत मानला जात आहे. राजकारणातील वैचारिक मतभेद बाजूला ठेवून भाषेच्या अस्मितेसाठी एकत्र येणं, ही महाराष्ट्रासाठी अभिमानास्पद बाब आहे.

राज ठाकरेंचं स्पष्ट संदेश

"महाराष्ट्र, मराठी भाषा आणि माणूस यांच्या सन्मानासाठी कोणतीही भूमिका घेण्यास मागे हटू नये. मतभेद क्षुद्र आहेत, पण अस्मिता मोठी आहे."